استانادا بەلبەۋ كۇرەسىنەن ەرلەر مەن ايەلدەر اراسىنداعى الەم چەمپيوناتى اياقتالدى. ەكى كۇنگە سوزىلعان باسەكەگە 30 ەلدىڭ 250-گە جۋىق سپورتشىسى قاتىستى.
ەلورداداعى «Beeline Arena» سپورت كەشەنىندەگى بىلەكتى بالۋاندار باسەكەسىندە جەرلەستەرىمىز ۇزدىكتەر قاتارىنان كورىنىپ, جالپى سانى 23 مەدال (6 التىن, 4 كۇمىس جانە 13 قولا) جەڭىپ الدى. بۇل كورسەتكىشپەن وتانداستارىمىز تەك رەسەي قۇراماسىن العا جىبەرىپ, جالپىكوماندالىق ەسەپتە ەكىنشى ورىنعا يە بولدى. ۇزدىك ۇشتىكتى تۇرىكمەنستاننىڭ بالۋاندارى تۇيىندەدى.
ەلىمىزدە وسىمەن ءتورتىنشى مارتە ۇيىمداستىرىلعان الەم چەمپيوناتىندا ەل نامىسىن 42 سپورتشى (32 ۇل, 10 قىز) قورعادى. جارىستىڭ سوڭعى كۇنىندە قازاقستان سپورتشىلارىنان قالمۇحان تۇرماحانبەت (57 كگ), ادىلەت شالعىنبەك ۇلى (62 كگ), اقتورە سۇلتانبەك ۇلى (75 كگ), توقتاربەك ايداربەك (90 كگ) جانە بەكبول نۇرلان ۇلى (100 كگ) التىن تۇعىردان كورىنسە, دانيار كۇنكىباەۆ (68 كگ) پەن ەسكەرحان وسكانوۆ (100 كگ) كۇمىس, ايبەك قازاقباەۆ (62 كگ), راحمەت ساپيەۆ (82 كگ) جانە نۇرسۇلتان قوجاگەلدى ۇلى (+100 كگ) جاھاندىق دودانىڭ قولا جۇلدەسىنە يە بولدى.