قر يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ توراعالىعىمەن كەڭەس وتكىزىلىپ, وندا جىلۋمەن جابدىقتاۋ جوبالارىن ىسكە اسىرۋ, تۇرعىن ءۇي جانە الەۋمەتتىك نىسانداردىڭ الداعى جىلۋ بەرۋ ماۋسىمىنا دايىندىعى, سونداي-اق مەملەكەتتىك تۇرعىن ءۇي قورىنان باسپانا الۋعا كەزەككە تۇرعانداردى تۇگەندەۋ ماسەلەلەرى قارالدى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
جيىنعا قۇرىلىس جانە تكش ىستەرى كوميتەتىنىڭ وكىلدەرى جانە وبلىس اكىمدەرىنىڭ ورىنباسارلارى قاتىستى. ونىڭ بارىسىندا قۇرىلىس جانە تكش ىستەرى كوميتەتى توراعاسىنىڭ ورىنباسارى ازىمبەك پازىلبەك ۇلى وڭىرلەردىڭ بيىلعى جىلۋ بەرۋ ماۋسىمىنا دايىندىعى تۋرالى ايتىپ بەردى.
ماسەلەن, كوشپەلى تەكسەرۋلەردىڭ قورىتىندىسىنا سايكەس, قازىر جوسپارلانعان 127 شاقىرىمنىڭ 26 شاقىرىمىنا جىلۋ جەلىلەرى تارتىلدى. ەلىمىز بويىنشا 600-گە جۋىق شاقىرىمداي جىلۋ ينفراقۇرىلىمىن جوندەۋ جوسپارلانعان. قازىر ونىڭ 224 شاقىرىمى نەمەسە 38% جوندەلدى.
الداعى جىلۋ بەرۋ كەزەڭىنە 13 مىڭنان ارتىق (13 525) دەربەس جۇمىس ىستەيتىن قازاندىقتى دايىنداۋ قاجەت. قازىر ولاردىڭ 5 مىڭنان استامى نەمەسە 37%-ى دايىن تۇر.
سۋمەن جابدىقتاۋ جەلىلەرىنە كەلسەك, 1,4 مىڭ شاقىرىمداي جەرگە جوندەۋ جۇرگىزۋ كوزدەلگەن. ونىڭ شامامەن 400 شاقىرىمىنا نەمەسە 30% جوندەلدى. سۋ بۇرۋ جەلىلەرى بويىنشا 228 شاقىرىمعا سوزىلعان ينفراقۇرىلىمدى رەتكە كەلتىرۋ جوسپارلانىپ وتىر. قازىر 72 شاقىرىم جەلى نەمەسە 30% جوندەلىپ اياقتالدى.
سونداي-اق ءا.پازىلبەك ۇلى الەۋمەتتىك نىساندار مەن تۇرعىن ۇيلەردىڭ دايىندىعى تۋرالى اقپاراتتى جەتكىزدى. ونىڭ ايتۋىنشا, قازىر جوسپارلانعان 10,7 مىڭ نىساننىڭ 5 مىڭى قىسقى كەزەڭگە دايىن. ولاردىڭ دەنى ءبىلىم بەرۋ ۇيىمى. بۇعان قوسا 5,5 مىڭنان اسا دەنساۋلىق ساقتاۋ نىسانىن دايىنداۋ جۇمىستارى قارقىن العان. قازىر ولاردىڭ 3 مىڭى نەمەسە 52% دايىن.
كەڭەستى تۇيىندەگەن م.قاراباەۆ 2023-2024 جىلعى جىلۋ بەرۋ كەزەڭىن ويداعىداي وتكىزۋ ءۇشىن اكىمدىكتەرگە ينجەنەرلىك ينفراقۇرىلىمنىڭ جوندەۋ جۇمىستارىنىڭ قارقىنداتىپ, قىركۇيەكتىڭ سوڭىنا دەيىن اياقتاۋدى قامتاماسىز ەتۋدى, سونىمەن بىرگە تۇرعىن ءۇي, دەنساۋلىق ساقتاۋ نىساندارىنىڭ ۋاقتىلى دايىندىعىن ۇيىمداستىرۋدى تاپسىردى.