مەملەكەت باسشىسى تۇركىستاندا وتكەن جيىندا «ۇلتتىق قۇرىلتاي – حالقىمىزدى ورتاق ماقساتقا ۇيىستىراتىن بىرەگەي قۇرىلىم» ەكەنىنە باسا نازار اۋداردى. وتكەن جىلدىڭ ناۋرىز ايىنداعى جولداۋىندا وسى قۇرىلتايدى شاقىرۋ تۋرالى باستاما كوتەرىلگەنىنەن جاقسى حاباردارمىز.
پرەزيدەنتتىڭ بۇل قادامى ەلىمىزدەگى قوعامدىق ديالوگتى نىعايتا ءتۇسۋ ءۇشىن جاسالعانى ءمالىم. وسى ماڭىزدى دا, قاجەتتى ۇسىنىستان كەيىن, حالىق اراسىندا قوعامدىق بىرلەستىكتەر, ۇيىمدار قۇرىلىپ, جوعارى جانە ورتا دەڭگەيدەگى ۇكىمەت ورگاندارىمەن حالىق ورتاسىنان شىققان ۇجىمدار اراسىنداعى تىكەلەي بايلانىستار, «التىن كوپىر» پايدا بولا باستادى. الدىن الا ايتا كەتەيىك. ءبىزدىڭ تۇركىستان وبلىسىندا وتكەن جىلى ء«ادىل بيلەر» قوعامدىق بىرلەستىگى قۇرىلىپ, جەرگىلىكتى مەملەكەتتىك ورگاندارمەن, اۋدان جانە اۋىل وكرۋگتەرىنىڭ اكىمدەرىمەن بىرگەلەسە ەل مەن ەلدەگى جەر تۋرالى, وتباسىلىق ارازدىقتار مەن ءوزارا كيكىلجىڭدەر, تۇرمىستىق-الەۋمەتتىك جانە دە باسقا دا ماسەلەلەردى ۋاقتىلى, دەر كەزىندە شەشۋدە اۋقىمدى جۇمىستار جۇرگىزىپ كەلەدى. بۇل دەگەنىڭىز – اۋداندىق قۇقىق قورعاۋ ورىندارىنىڭ ونسىز دا قوردالانىپ قالعان جۇمىستارىنا وڭدى, ناتيجەلى كومەك دەگەن ءسوز.
سونىمەن قاتار ء«ادىل بيلەر» قوعامدىق بىرلەستىگىنىڭ بيلەرى مەن القا مۇشەلەرى قالالار مەن كەنتتەردەگى, ەلدى مەكەندەردەگى تازالىق, كوگالاندىرۋ, اۋىز سۋمەن, تابيعي گاز, ەلەكترجۇيەسىمەن قامتۋ, از قامتىلعان وتباسىلارىن قولداۋ, كومەك بەرۋ ماسەلەلەرىمەن دە تىكەلەي اينالىسۋدا. وسى ءبىر, اتا-بابامىزدان, سان عاسىرلار بويى كەلە جاتقان «بيلەر مەكتەبىن» جانداندىرىپ, قايتا قۇرۋ ءۇردىسى تەك قانا ءبىزدىڭ وبلىستا عانا ەمەس, اقمولا, جامبىل, قىزىلوردا جانە باسقا دا وبلىستارداعى اۋداندار مەن ەلدى مەكەندەرگە ۇلگى رەتىندە تاراتىلۋدا. پرەزيدەنتىمىزدى ءىس جۇزىندە قولداۋ دەگەنىمىزدىڭ ناقتى مىسالى دەپ, ء«ادىل بيلەر» قوعامدىق بىرلەستىگىنىڭ جۇمىسىن ايتساق بولادى.
ۇلتتىق قۇرىلتايدا پرەزيدەنت ەل كوكەيىندە جۇرگەن ماسەلەلەر بويىنشا ءوز وي-پىكىرىن دە ورتاعا سالادى. ءبىز قولعا العان ساياسي-ەكونوميكالىق رەفورمالاردى قوعامداعى تەرەڭ الەۋمەتتىك-مادەني وزگەرىستەرمەن قاتار ىسكە اسىرۋىمىز كەرەك. ادىلەتتى قازاقستاندى قۇرۋ ءۇشىن ءاربىر وتانداسىمىز ادال ازامات بولۋعا ۇمتىلۋى قاجەتتىگى ايتىلدى. ۇلتتىق بىرەگەيلىگىمىزدى نىعايتىپ, ەلىمىزدىڭ جاڭا قۇندىلىقتارىن ورنىقتىرۋ ءۇشىن جۇيەلى جۇمىس جاسالۋعا ءتيىس دەي كەلە, مەملەكەت باسشىسى وسى جۇمىستاردىڭ سەگىز باعىتىن ناقتىلادى.
بۇگىندە مەملەكەتىمىز كوپتەگەن قۇندى ءىس-شارا جاساۋدا. سونىڭ ماڭىزدىلارىنىڭ ءبىرى – عىلىم اكادەمياسىن قايتا قۇرۋ. ۇلتىمىزدىڭ دامۋ جولىندا جانە دە ءبىر ماڭىزدى ماسەلە, ول مەملەكەتتىك انا تىلىمىزگە دەگەن قولداۋ. نەگىزى, اتا زاڭىمىزدا انىق, ناقتى ايتىلعان: قازاقستان رەسپۋبليكاسىنىڭ ءاربىر ازاماتى ءبىلىم الۋعا, عىلىمي ىزدەنىستەر, جۇمىستار جۇرگىزۋگە قۇقىلى. سوندىقتان دا ءاربىر ازاماتقا قاي جەردە دە, قالالىق نە, اۋىلدىق جەردە تۇرماسىن عىلىمي جۇمىستارمەن اينالىسۋىنا تولىق مۇمكىندىكتەر جاسالۋعا ءتيىس. راسىن ايتساق, قازاق ءتىلىنىڭ جان-جاقتى دامۋىنىڭ بىردەن-ءبىر جولى ول – قازاق ادەبيەتىنىڭ, سونىڭ ىشىندە فيلولوگيا سالاسىنىڭ اۋقىمىن ارتتىرۋ. ياعني عىلىمي جۇمىستارىن تەك قانا كۇندىزگى جوعارى وقۋ ورىندارىندا عانا ەمەس, نەگىزگى مەكەنجايى, جۇمىس ورنىنان قول ۇزبەستەن, سىرتتاي, وسى ءبىر ۇلتىمىزعا وتە قاجەتتى قازاق ادەبيەتى – فيلولوگيا عىلىمىن دامىتۋعا شەكتەۋ جاسالماستان مۇمكىندىك بەرۋ. بۇل – ءبىزدىڭ, ءاربىر ازاماتىمىزدىڭ بىرەگەي عىلىممەن اينالىسۋىنا تولىق جول اشىلادى دەگەن ءسوز.
ايىپبەرگەن بالتاباي ۇلى,
قازاقستان جازۋشىلار وداعىنىڭ مۇشەسى