ساقتان اۋىلىنىڭ سالەمى

الايدا اۋدان ورتالىعى مەن ءىرى مەگاپوليستەن 30 شاقىرىمداي جەردە ورنالاسقان اۋىل ءىشى جولى­نىڭ جوندەۋ كورمەگەنىنە 30 جىلدان اسىپ, حالىقتىڭ مۇڭ-زارىنا اينالعان. جىلدار بويى شەشىمىن سارىلا كۇتكەن جولدىڭ «جىرى» بيىل ءبىتىپ, تۇرعىنداردىڭ جۇزىنە قۋانىش ۇيالادى. مۇنداعى ەڭبەك­تە­گەن بالادان ەڭكەيگەن قارتقا دە­يىن ءماز-مەيرام بولىپ, ءتىپتى اۋىل تۇرعىندارى اتىنان اليما وسپانوۆا وسى ءبىر جۇرەكجاردى قۋانىشتارىن پرەزيدەنت قاسىم-جومارت توقاەۆقا جولداعان ەكەن.

– بۇل اۋىلعا قونىس اۋدار­عا­نىمىزعا التى جىل بولدى. سودان بەرى وسى جول ماسەلەسىن جىل سا­يىن ايتىپ كەلەمىز. تۇرعىنداردىڭ دەنى, سونىڭ ىشىندە ءوزىم دە الماتى مەن وتەگەن باتىر كەنتىنە, تالعارعا قاتىناپ جۇمىس ىستەيمىز. جاۋىن-شاشىندا اياعىمىز باتپاققا باتسا, اشىق كۇندەرى بورپىلداق شاڭعا كومىلەتىنبىز. سودان كەيىن بالا-شاعاعا اياق كيىم دە شاق كەلمەيتىن. وسى ماسەلەنى ايتىپ 2019 جىلى اۋىل تۇرعىندارى اتىنان وبلىس اكىمىنە «جولىمىزدى جوندەپ بەرسە» دەگەن حات جولداعان ەدىك. كوپ ۇزاماي جاۋابىمىزدى الدىق. وندا قارجى بولىنەتىنى تۋرالى ايتىلعان. الايدا سول كەزدەگى كوروناۆيرۋس پاندەمەياسىنا بايلانىستى كارانتين باستالدى. ودان كەيىنگى جىلدارى وبلىسىمىز ەكىگە ءبولىندى, وسىلايشا, كوتەرگەن ماسەلەمىز كۇرمەۋلى كۇيدە قالىپ قويعان. سوسىن بيىل تۇرعىندار جينالىپ مەملەكەت باسشىسى قاسىم-جومارت توقاەۆتىڭ اتىنا ءوتىنىش حات جولدادىق. ناتيجەسىندە, پرەزيدەنت اكىمشىلىگىنەن جانعا جاعىمدى جاۋاپ الدىق. كوپ ۇزاماي مىنە, كوشەلەرىمىزگە اسفالت توسەلىپ, قۇربان ايتتىڭ سوڭعى كۇندەرىندە جارقىراعان جاڭا, تەگىس جولمەن ءجۇرىپ ايتتادىق. تۇرعىندار قۋانىشىندا شەك بولمادى. قاراپايىم اۋىل تۇرعىندارىنىڭ ءبىر اۋىز وتىنىشىنە قۇلاق اسىپ, كوڭىل بولگەنى ءۇشىن مەملەكەت باسشىسىنا ءوزىمنىڭ جانە تۇرعىنداردىڭ اتىنان العىسىمدى جەتكىزدىم, – دەيدى ساقتان اۋىلىنىڭ تۇرعىنى اليما وسپانوۆا.

«حالىق ۇنىنە قۇلاق اساتىن مەملەكەت» تۇجىرىمداماسىنىڭ ارقا­سىن­دا اۋىلدىڭ اجارى اشىلىپ, كور­كى كىرگەنىنە تۇرعىنداردىڭ ۇلكەن-كىشىسى كۋا.

– بۇرىن ۇيدەن ۇزامايتىن نەمەرەلەرىمىز بەن بالالارىمىز كوشەگە ۆەلوسيپەد, ساموكاتتارىن سۇيرەپ شىعىپ, اۋىل ءىشى ءماز-مەيرام كۇيگە بولەندى. ءبىر-بىرىمەن ارالاسىپ, ويناپ, جاز كۇندەرىن كوڭىلدى دە قىزىقتى وتكىزە باستادى. بۇرىنعىداي كەدىر-بۇدىر, وي-شۇقىرى جوق, اسفالتتالعان جولمەن ءجۇرۋ ۇلكەندەردىڭ دە ەڭسەسىن تىكتەپ, جۇزدەرىن جادىراتتى, – دەيدى ءۇش نەمەرەنىڭ اجەسى اليما وسپانوۆا.

مەملەكەت باسشىسى قاسىم-جومارت توقاەۆتىڭ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا ءدال وسى اۋىل جولدارىنىڭ پروبلەماسىنا باسا نازار اۋدارعان بولاتىن.

«اۆتوجول قۇرىلىسىنا, سونىڭ ىشىندە جەرگىلىكتى جولداردىڭ ساپاسىنا باسا ءمان بەرۋ كەرەك. بيۋدجەتتەن قىرۋار قارجى بولىنسە دە, بۇل ماسەلە ءالى شەشىمىن تاپپاي وتىر. مەن 2025 جىلعا دەيىن جەرگىلىكتى جولداردىڭ كەمىندە 95 پايىزىن جاقسارتۋ جونىندە تاپسىرما بەردىم. ۇكىمەت بۇل ماسەلەنى تىكەلەي باقىلاۋعا السىن. جول قۇرىلىسىنداعى زاڭسىز­دىق­تار­دى انىقتاۋ قاجەت. بۇل جۇمىستان ناقتى ناتيجە شىعارۋ كەرەك», دەگەن ەدى پرەزيدەنت سول جولداۋىندا.

ساقتاندىقتاردىڭ بۇگىنگى قۋا­نى­شى – وسى پرەزيدەنت تاپسىر­ما­سىنىڭ جۇزەگە اسۋىنىڭ ايقىن ءبىر كورىنىسى.

– قاينار اۋىلدىق وكرۋگىنە قاراستى ساقتان اۋىلىندا 219 تۇر­عى­نى بار 39 اۋلا تىركەلگەن. نەگىزىنەن تۇرعىندار سانى 300-دەن اسادى. ۇزىندىعى 2 شاقىرىمدىق ورتالىق كوشەنىڭ اسفالتتانۋىن تۇرعىندار ون جىلدان بەرى كۇتكەن. بيىلعى جىلدىڭ ءبىرىنشى جارتى جىلدىعىندا وسى ورتالىق كوشەگە اسفالت توسەلدى. جىل باسىندا اۋىلدىڭ ەسكى ەلەكتر باعاندارى جاڭاعا اۋىستىرىلدى. الداعى ەكىنشى جارتى جىلدىقتا ورتا­لىق كوشەنى, ياعني 2 شاقىرىم كوشەنى جارىقتاندىراتىن 60 باعانا قويىلادى. مەملەكەتتىك ساتىپ الۋ قورىتىندىسىنا سايكەس مەردىگەر انىقتالدى, ءبىر-ەكى اي كولەمىندە جۇمىس جاسالادى, – دەيدى قاينار اۋىلدىق وكرۋگى اكىمىنىڭ ورىنباسارى نۇربول ەسەنباەۆ.

بۇلتتان شىققان كۇندەي جۇزدەرى جاي­ناعان ساقتان اۋىلىنىڭ تۇرعىن­دارى ەندىگى كەزەكتە تىم بولماسا قۇل­جا كۇرەجولىنا جەتكىزەتىن قوعام­دىق كولىك پەن اۋىلعا گاز تارتۋ, مەكتەپ سالۋ ماسەلەسى دە ەسكەرىلسە دەگەن تىلەك­تەرىن ايتىپ قالدى.

الماتى وبلىسى