جاقىندا يتاليادا وتكەن بايداركا مەن كانوە ەسۋدەن جاستار اراسىنداعى الەم چەمپيوناتىنىڭ جەڭىمپازى ماريا بروۆكوۆا ەلگە ورالدى. الەم چەمپيونىن وبلىس اكىمى قابىلداپ, قۇرمەت كورسەتتى.
جەڭىسىمەن الەمدى مويىنداتقان سپورتشىنى اۋەلى اۋەجايدان باتىس قازاقستان وبلىستىق سپورت جانە تۋريزم باسقارماسىنىڭ باسشىلىعى باستاعان جانكۇيەرلەر توبى قۇشاق گۇلمەن قارسى الدى. باسقارما باسشىسىنىڭ مىندەتىن اتقارۋشى جەڭىس نىعمەتۋللين جەڭىمپازدى قۇتتىقتاپ, باتىس قازاقستان وبلىسىنىڭ عانا ەمەس, بۇكىل قازاقستاننىڭ ماقتانىشىنا اينالعانىن جەتكىزدى. «2024 جىلعى پاريج وليمپياداسىنا جولداما الادى دەپ سەنەمىز», دەدى ج.نىعمەتۋللين.
ايتا كەتەيىك, ورالدىق 18 جاستاعى سپورتشى يتاليادا وتكەن دۇنيەجۇزىلىك دودادا ءبىر التىن, ءبىر كۇمىس جانە ءبىر قولا ەنشىلەدى.
– وسى جارىستا ماجارستاننان كەلگەن اگنەسا كيسسپەن سايىسۋ ەرەكشە قيىن بولدى. وتە مىقتى قارسىلاس. وسى جولى جەڭىلسەم دە, بولاشاقتا ءالى تالاي كەزدەسەرىمە, جەڭىسكە جەتەرىمە سەنەمىن, دەيدى م.بروۆكوۆا.
ەلىمىزدىڭ تۋىن يتاليا اسپانىندا اۋەلەتكەن سپورتشى مەن ونىڭ جەكە جاتتىقتىرۋشىسى ءارى اناسى ەلەنا ەۆگەنيقىزىن باتىس قازاقستان وبلىسىنىڭ اكىمى ناريمان تورەعاليەۆ قابىلداپ, قۇرمەت كورسەتتى.
– بۇل الەم چەمپيوناتىنا الەمنىڭ 65 مەملەكەتىنەن مىڭعا جۋىق سپورتشى قاتىستى. وسىنداي تارتىستى باسەكەدە ەلىمىزدىڭ سپورت قورجىنىنا ءبىر التىن, ءبىر كۇمىس, ءبىر قولا مەدال سالعان ماريانىڭ جەڭىسى – وتە ۇلكەن جەڭىس! مۇنداي جەڭىس وڭايلىقپەن كەلمەيدى, بۇل – تالاي جىل توگىلگەن تەردىڭ, تىنىمسىز ەڭبەكتىڭ ناتيجەسى. بۇل جەڭىستە سپورتشىنىڭ دا, جاتتىقتىرۋشىنىڭ دا, فەدەراتسيانىڭ دا ۇلەسى بار. سوندىقتان بارشاڭىزعا شىنايى العىسىمدى ايتامىن. وسى باعىتتان اينىماي, العا باسا بەرىڭىزدەر, – دەدى ن.تورەعاليەۆ.
كەزدەسۋدە ەسكەك سپورتىنىڭ وڭىردەگى كەيبىر تۇيتكىلدەرى دە ءسوز بولدى. چەمپيوننىڭ اناسىنىڭ ايتۋىنشا, ورال قالاسىنا ەسكەك سپورتى كەشەنى كەرەك. ويتكەنى ورال قالاسى ءۇش وزەننىڭ ورتاسىندا تۇرعانىمەن, قىس كەزىندە جاتتىعۋ ءۇشىن جىلى جاققا كەتۋگە تۋرا كەلەدى. فەدەراتسيا بولگەن قاراجاتتىڭ دەنى ىسساپارعا كەتەدى. بۇعان قوسا جاتتىعۋ بازاسىن دا جاڭعىرتۋ قاجەت. عيمارات توزعان, جوندەۋ كۇتىپ تۇر. سونداي-اق جارىسقا قاجەتتى جۇردەك قايىقتار دا جەتىسپەيدى. الەمدىك نارىقتا جاقسى بايگە قايىق 3 مىڭ ەۋرودان كەم تۇرمايدى ەكەن. وسى جانە باسقا دا ماسەلەلەردى سپورتشىنىڭ ءوز اۋزىنان ەستىگەن وبلىس اكىمى جۋىق ارادا چەمپيوننىڭ جاتتىعۋ بازاسىن ءوز كوزىمەن كورۋگە, ءتۇيىندى ماسەلەلەردى شەشۋگە بارىنشا كومەكتەسۋگە ۋادە بەردى.
كەزدەسۋ سوڭىندا ن.تورەعاليەۆ م.بروۆكوۆاعا العىسحات جانە 500 مىڭ تەڭگەلىك سەرتيفيكات تابىس ەتتى.
ايتا كەتەيىك, م.بروۆكوۆا 2005 جىلى 31 قاڭتاردا ورال قالاسىندا تۋعان. 2022 جىلى وبلىستىق مامانداندىرىلعان وليمپيادالىق رەزەرۆتەگى مەكتەپ-ينتەرنات-كوللەدجىن بىتىرگەن. 2017 جىلدان بايداركا مەن كانوە ەسۋدەن بقو قۇراما كومانداسىنىڭ مۇشەسى. 2018-2022 جىلدارى قازاقستان چەمپيوناتتارىنىڭ جەڭىمپازى ءھام جۇلدەگەرى. 2021 جىلى براتيسلاۆادا (سلوۆاكيا) وتكەن حالىقارالىق رەگاتا جەڭىمپازى. تايلاندتا (2022) وتكەن ازيا چەمپيوناتىنىڭ كۇمىس جۇلدەگەرى. ماريا جاستار اراسىندا بايداركا مەن كانوە ەسۋدەن ەكى مارتە الەم چەمپيونى, 2022 جىلى سەگەدتە (ماجارستان) وتكەن الەم چەمپيوناتىنىڭ جەڭىمپازى جانە قولا جۇلدەگەرى, 2023 جىلى مامىر ايىندا دا وسى قالادا الەم كۋبوگىندا جەڭىمپاز اتانعان.
باتىس قازاقستان وبلىسى