الماتى قالاسىندا وتكەن حالىقارالىق حەيليبەري فەرست چەمپيوناتىندا (International Haileybury first championship) ورالدىق وقۋشىلاردان قۇرالعان كوماندا ءابسوليۋتتى چەمپيون اتاندى.
جارىس ماۋسىمنىڭ سوڭىندا, الماتى قالاسىندا وتكەن. ەكى كۇنگە سوزىلعان حالىقارالىق جارىسقا ورال قالاسىنان بارعان «HighTech» جانە «Jaiyq» كوماندالارى بەلسەنە قاتىسىپ, 35 كوماندانىڭ اراسىنان دارا شىعىپ, 5 كۋبوك جەڭىپ الدى. «Jaiyq» كومانداسى ءوز كاتەگورياسىندا چەمپيون اتانسا, «HighTech» فينالدا بىرىككەن اراب امىرلىكتەرىنىڭ دۋباي قالاسىنان كەلگەن كوماندامەن باق سىناسىپ, ءابسوليۋتتى چەمپيون اتانعان.
– جارىستا وقۋشىلاردىڭ تەك روبوت قۇراستىرۋ عانا ەمەس, الەمدەگى كۇردەلى ماسەلەلەردى شەشۋگە ارنالعان جوبالار ۇسىنۋى دا كەرەك بولدى. ءار كوماندا وزدەرىنىڭ جان-جاقتىلىعىن كورسەتە ءبىلۋى قاجەت ەدى. ولار 5 ءتۇرلى باعىت بويىنشا سىنعا ءتۇستى. كوماندانىڭ اۋىزبىرشىلىگى, pid زونا, روبوت ديزاينى جانە تاعى دا باسقا سىناقتار بولدى. ءبىزدىڭ وقۋشىلار سەنىمدى اقتادى, – دەيدى ورالدىق وقۋشىلاردى باستاپ بارعان قوس جەتەكشىنىڭ ءبىرى ابدوللا ابۋتولىبوۆ.
ورالدىق قوس كومانداداعى 12 وقۋشىنىڭ جەتەۋى – نازارباەۆ زياتكەرلىك مەكتەبىنىڭ وكىلدەرى. فينالدىق كەزەڭدە دۋبايدان كەلگەن كوماندانى جەڭىپ, «Robot Performance Award», «Champions award» كاتەگوريالارى بويىنشا ءابسوليۋتتى چەمپيون اتاعىنا لايىق دەپ تانىلعان «HighTech» تۇگەلگە جۋىق زياتكەرلەردەن قۇرالعان. كوماندا جەتەكشىسى نۇربول قىرىقباەۆ «ەڭ ۇزدىك مەنتور» اتاندى.
– روبوتتەحنيكا – بولاشاقتىڭ باعدارى. قازاقستاندا قارقىن الىپ كەلە جاتقان وسى سالاعا NIS وقۋشىلارىنىڭ قىزىعۋشىلىعى جوعارى. بۇگىندە مەكتەبىمىزدە ءبىلىم الىپ جۇرگەن رامازان قازبەكوۆ, ارسەن ەسەنعاليەۆ, ءادىلجان تەمىرزاحوۆ, داۋلەت مۇقانوۆ, ءاليحان سەرىك, تايىر نازار, ءادىل ەرگەن سىندى زياتكەرلەرىمىز كەلەشەكتە ەلىمىزدىڭ روبوتتەحنيكا سالاسىن وركەندەتۋگە سۇبەلى ۇلەس قوسارىنا سەنەمىز, – دەيدى ورال قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ ءباسپاسوز حاتشىسى ءمولدىر لاتيفوۆا.
جوعارىداعى زياتكەرلەرگە قوسا, جەڭىمپاز كوماندا مۇشەلەرى قاتارىندا ورال قالاسىنداعى اقپاراتتىق تەحنولوگيالار كوللەدجىنىڭ 2-كۋرس ستۋدەنتى عۇبايدوللا بەكسۇلتان, №46 مەكتەپتىڭ 7-سىنىپ وقۋشىسى تورەحان اسحات ۇلى, №5 مەكتەپتىڭ 10-سىنىبىندا وقيتىن ارتۋر جاقسىعاليەۆ, №41 مەكتەپتىڭ 8-سىنىپ وقۋشىسى رايىمبەك عابدۋللين, №46 مەكتەپتىڭ 8-سىنىپ وقۋشىسى ءاليسلام قۇرمانعاليەۆ تە بار.
جەڭىمپازداردى باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ قابىلداپ, العىسحات جانە ەستەلىك سىيلىقتارمەن ماراپاتتادى. تالانتتى وقۋشىلاردى بولاشاقتا دا قولداپ تۇرۋعا ۋادە بەردى.
ايتا كەتەيىك, مۇنداي قولداۋ كوپ كەشىكپەي-اق قاجەت بولۋى مۇمكىن: قازىر ورالدىق وقۋشىلار تامىز ايىندا قىتايدىڭ ماكاو قالاسىندا وتەتىن جارىستىڭ ىرىكتەۋ تۋرىنا دايىندىققا كىرىسىپ تە كەتتى. حالىقارالىق بەدەلى زور سايىسقا قازاقستانداعى ىرىكتەۋ تۋرىنان جەڭىمپاز اتانعان كوماندا عانا بارادى. سوندىقتان ورالدىقتار وزدەرىنىڭ ۇزدىك ەكەندىگىن تاعى ءبىر مارتە دالەلدەۋگە تىرىسپاق.
ورال قالاسىنداعى وقۋشىلار سارايىندا روبوتتەحنيكا ۇيىرمەسى اشىلعانىنا 5-6 جىل بولعان. ۇيىرمە جۇمىسى زاماناۋي قۇرال-قوندىرعىعا تاۋەلدى ەكەنى ءسوزسىز. وتكەن ايدا عانا وقۋشىلار سارايىندا ء«سابي» قورى قۇنى 28 ملن تەڭگە تۇراتىن جاڭا ۇلگىدەگى «روبوتتىق تەحنيكا» كابينەتىن تارتۋ ەتكەن ەكەن. ناتيجەسى بىردەن كورىنىپ وتىر. وبلىس اكىمىنىڭ ورىنباسارى باقىتجان حابەر ۇلى حايتەكشى جاسوسپىرىمدەرگە وسىنداي زاماناۋي قوندىرعىلارمەن بولاشاقتا دا قامتاماسىز ەتۋگە ۋادە ەتىپ, وبلىستىق ءبىلىم باسقارماسىنا تاپسىرما بەرگەن.
باتىس قازاقستان وبلىسى