اۋىزدى قۋ شوپپەن سۇرتە بەرگەننەن اينالاڭ گۇلدەنىپ كەتپەيتىنى انىق. باردى باعالاپ, جىرتىقتى جاماپ, تەسىكتى بۇتىندەي ءتۇسۋ وركەنيەت كوشىنە ىلەسكەن حالىقتىڭ ارەكەتى بولسا كەرەك. ءبىزدىڭ ايتپاعىمىز – ەلىمىزدىڭ تەحنولوگيالىق الەۋەتىنىڭ كىشكەنتاي ءبىر بولىگى. ونىڭ الەۋمەتكە تيگىزىپ جاتقان از-كەم پايداسىن پايىمداۋ.
تەحنولوگيا سالاسىنداعى ءاربىر جىلت ەتكەن جاڭالىقتى ەلەڭ قىلماي ءوتۋ مۇمكىن ەمەس. ويتكەنى ونىڭ ماڭىزى – كۇندەلىكتى تۇرمىستا كادەگە جاراۋىندا. قازىر بولاشاقتىڭ عىلىمي بولجامىنا بويلاۋ مۇمكىن ەمەس بولىپ بارادى. ادام قيالى جەتكەننىڭ بارىنە قول جەتكىزە الاتىنىن كورىپ كەلەمىز. ءتىپتى فۋتۋرولوگ عالىمدارىڭ پايىمىنشا, الدا ادامداردىڭ ومىرىندە قۇپيا قالمايتىن ءتارىزدى. بۇعان قوسا الدا نە بولاتىنى دا كۇنى بۇرىن ەسكەرىلىپ وتىرماق. ءبىزدىڭ ەلدە دە مۇنداي جەتىستىكتەردىڭ العاشقى لەگى توبە كورسەتە باستادى. ماسەلەن, جۋىردا «ۇلتتىق اقپاراتتىق تەحنولوگيالار» اق ءبىر-ەكى جاڭالىقتىڭ شەتىن شىعاردى. ولاردىڭ سوزىنە سەنسەك, الدا قۇجاتتاردىڭ جارامدى مەرزىمىنىڭ اياقتالۋى تۋرالى, جاقىندارىڭىزدىڭ تۋعان كۇندەرى تاعى باسقا ماڭىزدى كۇندەر تەحنولوگيانىڭ كومەگىمەن الدىن الا, وزدىگىنەن ەسكەرىلىپ وتىرادى.
ولاردىڭ ايتۋىنشا, ءارتۇرلى قۇتتىقتاۋ حاتتار مەن ەسكەرتۋلەر eGov Mobile قوسىمشاسىنداعى push حابارلامالارى ارقىلى جىبەرىلەدى. ءتىپتى, ۇيلەنۋ تويى تۋرالى الدىن الا حاباردار ەتىلەتىن كورىنەدى (حابارلاما مەرەيتويعا دەيىن 3 كۇن بۇرىن جىبەرىلەدى). سونداي-اق حابارلامالاردىڭ ماتىننەن باسقا, ءتيىستى قوسىمشانى نەمەسە سەرۆيستى اشىپ, قۇجاتقا قول قويا الاتىن تەتىكتەر پايدا بولدى.
«ۇلتتىق اقپاراتتىق تەحنولوگيالار» اق توراعاسى روستيسلاۆ كونياشكيننىڭ ايتۋىنشا, ازاماتتار بەلگىلى ءبىر مەملەكەتتىك قىزمەتتەردى نەمەسە پرواكتيۆتى قىزمەتتەر تۋرالى حابارلامالاردى الۋ بويىنشا ۇسىنىستار الادى.
– قازىر Invisible Government تۇجىرىمداماسى اياسىندا مەملەكەت ازاماتتارعا ءارتۇرلى ومىرلىك جاعدايلاردا وزدىگىنەن كومەكتەسەدى, قىزمەتتى ءوز بەتىنشە ۇسىنادى, ونىڭ قاجەتتىلىكتەرىن قامتاماسىز ەتەدى. حالقىمىزدىڭ ومىرىندەگى ماڭىزدى كۇندەرىن ەسكە ءتۇسىرۋ ءۇشىن ءبىز eGov Mobile قوسىمشاسىندا push حابارلامالارىن ىسكە قوستىق. وندا كوپتەگەن فۋنكتسيا بار, – دەيدى ول.
سونىمەن قاتار eGov Mobile قوسىمشاسى جاقىن ارادا حابارلاندىرۋلاردىڭ جاڭا ساناتتارىن قوسپاق جانە ادەتتەگى حابارلامالاردان وزگە ۇسىنىلاتىن قىزمەتكە ءوتۋ ءۇشىن جاڭا باتىرماسى بار پرواكتيۆتى قىزمەتتەر قولجەتىمدى بولماق. مۇنداي حابارلاندىرۋلاردى Push ءموبيلدى قوسىمشاسىنىڭ «حابارلاندىرۋلار» بولىمىنەن كورۋگە بولادى. ەگەر قوسىمشا ورناتىلماعان بولسا, 1414 نومىرىنە حابارلاسۋ ارقىلى قوسىمشانى جۇكتەپ الۋعا مۇمكىندىك بار. ءموبيلدى قوسىمشانى iOS جۇيەسىن پايدالانۋشىلارى App Store پلاتفورماسىنان, سونداي-اق Android جۇيەسىن پايدالانۋشىلارى Play Market جانە App Gallery-دەن جۇكتەۋگە بولادى.