پرەزيدەنت قاسىم-جومارت توقاەۆ استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان بايمەنوۆتى قابىلدادى. كەزدەسۋ بارىسىندا مەملەكەتتىك قىزمەت سالاسىنداعى قازىرگى ۇردىستەر مەن دامۋ پەرسپەكتيۆالارى تالقىلاندى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت استانا حابى مەملەكەتتىك باسقارۋ جۇيەسىن دامىتۋ ماسەلەلەرى بويىنشا ساراپتامالىق تۇرعىدا ماڭىزدى قولداۋ كورسەتىپ وتىرعانىن اتاپ ءوتتى.
قاسىم-جومارت توقاەۆ مەملەكەتتىك اپپاراتتى بيۋروكراتيادان ارىلتۋ, بيلىك وكىلەتتىكتەرىن ورتالىقسىزداندىرۋ جانە مەملەكەتتىك ورگاندار قىزمەتىنە جوبالىق ءادىستى بەلسەندى ەنگىزۋ ارقىلى اكىمشىلىك رەفورمانى ءتيىمدى جۇزەگە اسىرۋ ماڭىزدى ەكەنىن ايتتى.
سونىمەن قاتار كەزدەسۋدە قوعامدى ودان ءارى ۇيىستىرۋ, اتاپ ايتقاندا, زاڭ مەن ءتارتىپتى ساقتاۋ, كاسىبيلىك جانە ەڭبەك ادامىنىڭ ءرولىن ارتتىرۋ سەكىلدى قۇندىلىقتاردى قالىپتاستىرۋدىڭ ماڭىزدىلىعى قاراستىرىلدى.
بۇدان بولەك, ءاليحان بايمەنوۆ پرەزيدەنتكە دۇنيەجۇزىلىك توعىزقۇمالاق فەدەراتسياسىنىڭ جۇمىسى تۋرالى مالىمەت بەردى. مەملەكەت باسشىسى ۇلتتىق ويىنىمىزدى ەلىمىزدە جانە شەتەلدە ودان ءارى دارىپتەۋ ماڭىزدى ەكەنىن اتاپ ءوتتى.
قاسىم-جومارت توقاەۆ كەلەسى جىلى قازاقستاندا وتەتىن دۇنيەجۇزىلىك كوشپەندىلەر ويىندارىن جوعارى دەڭگەيدە ۇيىمداستىرۋ قاجەتتىگىنە نازار اۋداردى.