پارلامەنت سەناتىنىڭ دەپۋتاتتارى جاننا اسانوۆا مەن نۇريا نيازوۆا قر ۇقك شەكارا اكادەمياسىنىڭ باسشىلىعىمەن كەزدەستى. وندا ۇلتتىق قاۋىپسىزدىكتى قامتاماسىز ەتۋ سالاسىنداعى زاڭنامانى ودان ءارى جەتىلدىرۋ ماسەلەلەرىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا وقۋىن بىتىرگەن تۇلەكتەرگە سۇرانىس دەڭگەيى, ولاردىڭ جۇمىسقا ورنالاسۋ پايىزى, شەكاراشىلاردى جوعارى وقۋ ورنىنان كەيىن جانە وعان قوسىمشا وقىتۋ تارتىبىنە قاتىستى ماسەلەلەر كوتەرىلدى.
«اكادەميا جالپى گەوساياسي جاعدايعا بايلانىستى وفيتسەرلىك كادرلاردى دايارلاۋعا قويىلاتىن تالاپتاردىڭ دا ءوسىپ كەلە جاتقانىن ەسكەرۋى ءتيىس. سەناتتىڭ حالىقارالىق قاتىناستار, قورعانىس جانە قاۋىپسىزدىك جونىندەگى كوميتەتى اكادەميا تۇلەكتەرىن قازاقستان رەسپۋبليكاسىنىڭ شەكاراسىن قورعاۋ جونىندەگى مىندەتتەردى ابىرويمەن اتقارۋعا مۇمكىندىك بەرەتىن قازىرگى زامانعى كاسىبي قۇزىرەتتەردى يگەرۋ ءۇشىن بارلىق قاجەتتى جاعدايمەن قامتاماسىز ەتۋدى ماڭىزدى دەپ سانايدى», دەدى سەناتور اسانوۆا.
كەزدەسۋگە قاتىسۋشىلار اكادەميانىڭ عىلىمي-زەرتتەۋ قىزمەتى جانە ونىڭ ۇلتتىق قاۋىپسىزدىك پەن اسكەري سالاداعى ىرگەلى جانە قولدانبالى زەرتتەۋلەر ماسەلەلەرىن دە تالقىلادى.
سەناتورلار ءبىلىم بەرۋ ۇدەرىسىن تەحنيكالىق جابدىقتاۋ ماسەلەلەرىنە, سونداي-اق اكادەميا قابىلداعان يدەولوگيالىق دۇنيەتانىم مەن قازاقستاندىق ءپاتريوتيزمدى قالىپتاستىرۋ شارالارىنا ەرەكشە نازار اۋداردى.