اتىراۋداعى تاريحي-ولكەتانۋ مۋزەيىندە ەل تاريحىنا قاتىستى قۇندى دەرەكتەر دە, سيرەك كەزدەسەتىن جادىگەرلەر دە از ەمەس. مۋزەيدە ىسكەرلىگىمەن, شىعارماشىلىعىمەن, ونەرىمەن ءدۇيىم جۇرتقا تانىلعان قايراتكەرلەردىڭ تۇتىنعان زاتتارى دا بار.
مۋزەي ديرەكتورى مۇحانبەتقالي كيپيەۆتىڭ ايتۋىنشا, قوردا قازاقتىڭ كۇي ونەرىن كەيىنگى ۇرپاققا جەتكىزۋگە ۇلەس قوسقان كومپوزيتورلار مەن كۇيشىلەردىڭ دومبىراسى بار. بىلتىردان بەرى قوس ىشەكتى اسپاپتىڭ قاتارىنا بىرنەشە دومبىرا قوسىلعان.
ماسەلەن, مەملەكەت جانە قوعام قايراتكەرى, ۇلتتىق ونەردىڭ جاناشىرى يمانعالي تاسماعامبەتوۆ ءۇش دومبىرا تاپسىرىپتى. ونىڭ ءبىرىنشىسى – كۇيشى, كومپوزيتور, قازاقستاننىڭ ەڭبەك سىڭىرگەن ءارتىسى سەكەن تۇرىسبەكوۆتىڭ دومبىراسى. ۇلتتىق اسپاپتىڭ شاناعى – بۇيرا قايىڭ, بەتى – ەۋروپالىق شىرشا, مويىنى – قاراعاي, تيەگى – بۋبينگا, ويۋى سۇيەك ۇنتاعىمەن كومكەرىلگەن. بۇل دومبىرانى شەبەر قۋانىش تولەباەۆ جاساعان.
ەكىنشى دومبىرا – كۇيشى-دومبىراشى, قازاقستاننىڭ ەڭبەك سىڭىرگەن ءارتىسى ايگۇل ۇلكەنباەۆانىڭ كوپ جىل ۇستاعان اسپابى. دومبىرا جاساۋدىڭ شەبەرى نۇربەك ادىلبەكوۆ قوس ىشەكتى اسپاپتىڭ كۇمبىر قاققان دىبىسىن اسقاقتاتۋ ءۇشىن شاناعىنا, مويىنى جانە باسىنا كانادالىق ۇيەڭكىنى, بەتىنە شىرشانى پايدالانعان.
ءۇشىنشى اسپاپ – كۇيشى-دومبىراشى, قازاقستاننىڭ ەڭبەك سىڭىرگەن قايراتكەرى اسىلبەك ەڭسەپوۆتىڭ دومبىراسى. بۇل دومبىرانى جاساعان كەزدە شەبەر جولاۋشى تۇردىعۇلوۆ اسپاپتىڭ شاناعى مەن تيەگىنە قارا اعاشتى, بەتىنە تيان-شان شىرشاسىن, موينىنا ماي قاراعايدى قولدانعان. اسپاپتىڭ مويىن بەتىنە قىزىل اعاشتى, باسى مەن قۇلاعىنا ۇيەڭكىنى قيۋلاستىرعان.
مۋزەيدە قازاقستاننىڭ ەڭبەك سىڭىرگەن قايراتكەرى, پروفەسسور كاريما ساحار-باەۆانىڭ تاپسىرعان دومبىراسى ساقتاۋلى تۇر. ەكى ىشەكتى, ون سەگىز پەرنەلى دومبىرانىڭ بەت تاقتايىنا ورنەك سالىنعان. دومبىرا ساز اسپاپتارىن جاساۋشى شەبەر بيسەنعالي مىرزاعاليەۆتىڭ قولىنان شىققان.
تاعى ءبىر اسپاپ – «اسىل دومبىرا – 2022» اقىندار ايتىسىنىڭ اقتىق سايىسىندا ونەر كورسەتكەن جەرگىلىكتى اقىندار شىناربەك قابيەۆ, سىرىمبەك سارسەمباەۆ, شالقارباي ءىزباساروۆ ۇتىپ العان دومبىرا. ال بيىلعى 17 مامىردا كونەدەن جەتكەن دومبىرانىڭ ءبىرىن ق.قايسەنوۆ اتىنداعى №33 ورتا مەكتەپ مۋزەيىنىڭ جەتەكشىسى ت.جيەناليەۆا اكەلىپتى. دومبىرانى جەرگىلىكتى تۇرعىن ب.دوسباي ۇلى ۇرپاعىنا اماناتتاپ, بىرنەشە بۋىنعا جەتكىزگەن. كەيىن كونەنىڭ كوزىندەي ساقتالعان ۇلتتىق اسپاپتى كەلىنى ك.نابيەۆا 2011 جىلى مەكتەپ جانىنداعى مۋزەيگە بەرگەن. بۇل دومبىرا بيىل وبلىستىق تاريحي-ولكەتانۋ مۋزەيىندە وتكىزىلگەن «قوعامدىق مۋزەيلەر قازىناسى» وبلىستىق كورمە-بايقاۋىندا ۇزدىك تۋىندى رەتىندە تانىلعان.
اتىراۋ وبلىسى