30 ماۋسىمدا جاس جۋرناليستەرگە ارنالعان Media Bootسamp جازعى مەكتەبىنىڭ اشىلۋ سالتاناتى ءوتتى, دەپ حابارلايدى Egemen.kz.
مەديا مەكتەپ اقپاراتتىق اعىمعا ىلەسە الاتىن, زاماناۋي تالاپتارعا ساي, قارىمدى دا قابىلەتتى جۋرناليستەردى دايارلاۋ ماقساتىندا ۇيىمداستىرىلىپ وتىر. جوباعا ءار وڭىردەن ىرىكتەلىپ الىنعان باكالاۆر, ماگيسترانت دارەجەسىندەگى 50 ستۋدەنت قاتىسادى.
جازعى مەكتەپ جۋرناليستەردىڭ قابىلەتىن شىڭداپ, ءبىلىمىن تاجىريبەگە اينالدىرۋعا ۇلكەن مۇمكىندىك بەرەتىنى ءسوزسىز. سەبەبى جوبادا كاسىبي ماماندار ستۋدەنتتەرگە باعدار بەرىپ, بىرىگىپ جۇمىس ىستەيدى.
ايتا كەتەيىك, قاتىسۋشىلارعا م.س.نارىكباەۆ اتىنداعى كازگيۋ ۋنيۆەرسيتەتىنىڭ Adjunct Assistant پروفەسسورى, PhD الما سايلاۋقىزى, رەجيسسەر, كينوستسەناريست مۇرات ەسجان, م.س.نارىكباەۆ اتىنداعى كازگيۋ ۋنيۆەرسيتەتىنىڭ وقىتۋشىسى جولداس ءورىسباي, كاسىبي پودكاستەر ەلدار قۇدايبەرگەنوۆ جانە «Media 24» كومپانياسىنىڭ باس ديرەكتورى مارعۇلان اقان ءدارىس وقىپ, ۋوركشوپ وتكىزەدى.
ءىس-شارانىڭ اشىلۋ سالتاناتىنا قر اقپارات جانە قوعامدىق دامۋ مينيسترلىگىنىڭ ازاماتتىق قوعام ىستەرى كوميتەتى توراعاسىنىڭ ورىنباسارى پەريزات سادۋاقاس, قازاقستاندىق قوعامدىق دامۋ ينستيتۋتىنىڭ باسقارما توراعاسى نۇربەك ماتجاني قاتىستى.
جۋرناليستيكا - بارلىق سالانىڭ ماتورى. ءدال قازىرگى اقپاراتتىق قوعامدا ونسىز ەشتەڭە جۇزەگە اسپايدى. سوندىقتان جۋرناليست اشىق, ساپالى ءارى ساۋاتتى ساراپتامالاردى دەر كەزىندە ۇسىنا ءبىلۋى ءتيىس. نۇربەك ماتجاني جۋرناليستيكانىڭ ءار سالاداعى وسىنداي ماڭىزىن تىلگە تيەك ەتىپ, مەديا مەكتەپتىڭ ماقساتىنا توقتالدى.
«Media Bootcamp جازعى مەكتەبىنىڭ وقۋ جوسپارى تەوريالىق بىلىممەن بىرگە تاجىريبەلىك جۇمىستار ارقىلى كوممۋنيكاتيۆتىك داعدىلار مەن كاسىبي ويلاۋ قابىلەتىن دامىتۋعا, تسيفرلى تەحنولوگيالارعا نەگىزدەلگەن جاڭا ءادىس-تاسىلدەردى مەڭگەرۋگە باعىتتالعان», دەدى ول.
جۋرناليستيكا تەحنولوگيانىڭ دامۋىمەن وزگەرىسكە ۇشىراپ جاتىر. اقپارات تاراتۋدىڭ جاڭا تاسىلدەرى كوبەيگەن. جۋرناليستەرگە ارنالعان جازعى مەكتەپ ءدال سول باعىتتاردا جۇمىس ىستەيتىن بولادى.
Media Bootcamp-ءتىڭ وقۋ باعدارلاماسى «جاساندى ينتەللەكتىنىڭ جۋرناليستيكاعا اسەرى», «جۋرناليستيكا تاريحى: الەمدىك جۋرناليستيكانىڭ دامۋى مەن ەرەكشەلىكتەرى», «جۋرناليستيكاداعى زاماناۋي ءادىس-تاسىلدەر», «پودكاست: تۇجىرىمداما, ارحيتەكتۋرا, ىسكە قوسۋ», «دەرەكتى فيلم: يدەيادان ەفيرگە دەيىن», «Digital First Content: الەۋمەتتىك جەلىگە كونتەنتتى بەيىمدەۋ مەحانيزمى مەن ەرەكشەلىكتەرى», «جۋرناليستىك ەتيكا جانە ستاندارتتار» سىندى زاماناۋي باعىتتاردى قامتيدى.
قورقىت اتا اتىنداعى قىزىلوردا ۋنيۆەرسيتەتىنىڭ 3-كۋرس ستۋدەنتى كاريما جۇماعاليدىڭ ايتۋىنشا, Media Bootcamp – جۋرناليستيكا سالاسىنداعى ءبىلىمى مەن بىلىكتىلىگىن ارتتىرۋعا بەرىلگەن تاماشا مۇمكىندىك.
«ساندىق مەديا, مۋلتيمەديالىق اڭگىمەلەر, الەۋمەتتىك مەديا جانە دەرەكتەر جۋرناليستيكاسى تۋرالى كۋرستاردى قامتيتىن ءىس-شارانىڭ وقۋ جوسپارى ءدال وسى سالالارداعى داعدىلارىمدى جەتىلدىرۋ ءۇشىن قاجەت», دەدى قاتىسۋشى.
ايتا كەتەيىك, بۇل يگى باستاما قر اقپارات جانە قوعامدىق دامۋ مينيسترلىگى, قازاقستاندىق قوعامدىق دامۋ ينستيتۋتىنا قاراستى MediaLab ورتالىعىنىڭ قولداۋىمەن وتەدى.