مەملەكەت باسشىسى ىشكى ىستەر مينيسترلىگىنىڭ القا ماجىلىسىندە ىشكى ىستەر ورگاندارىنا ۇنەمى قولداۋ كورسەتىلەتىندىگىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«سوڭعى ءۇش جىلدىڭ ىشىندە ناقتى شارالار اتقارىلدى. جالاقىنى بىرنەشە رەت كوتەردىك. تۇرعىن ءۇي تولەمدەرىن الاتىن قىزمەتكەرلەر كوبەيدى. قازىر ولاردىڭ سانى 38 مىڭنان استى. ۇلتتىق ۇلانعا قولداۋ كورسەتىلۋدە. ماتەريالدىق-تەحنيكالىق بازانى نىعايتۋ ءۇشىن جىل سايىن قوماقتى قارجى ءبولىنىپ وتىر. يننوۆاتسيالىق تەحنولوگيالار ەنگىزىلىپ جاتىر.
جالپى ىشكى ىستەر ورگاندارىنا قولداۋ كورسەتىلە بەرەدى. وسىنىڭ ءبارى ازاماتتاردى قورعاۋ جانە قوعامدىق ءتارتىپتى نىعايتۋ ءۇشىن كەرەك. تەمىردەي ءتارتىپ – تۇراقتىلىق پەن تىنىشتىقتىڭ كەپىلى», دەدى مەملەكەت باسشىسى.
سونىمەن قاتار پرەزيدەنت مينيسترلىك باسشىلىعىنىڭ جۇرتپەن كەزدەسىپ جۇرەتىندىگىن اتاپ ءوتتى. تۇرعىنداردى تولعاندىراتىن ماسەلەلەردىڭ از ەمەس ەكەنىن دە ەسكەردى. سونىڭ بارلىعىن كوزبەن كورىپ, اقىلداسىپ, بىرلەسىپ شەشۋدىڭ دۇرىستىعىن, سول ءۇشىن بۇگىن ىشكى ىستەر ورگاندارىنىڭ جۇمىسىنا قاتىستى وزەكتى ماسەلەلەر تالقىلاناتىنىن ايتتى.