1 شىلدە كۇنى ەلوردانىڭ 25 جىلدىعىنا وراي اشىق اسپان استىندا «ايالاعان استانا» گالا-كونتسەرتى وتەدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
«ايالاعان استانا» – دارىندى بالالاردى ساحنا ونەرىنىڭ بارلىق قۇپيالارى مەن شوۋ-بيزنەس نەگىزدەرىنە ۇيرەتەتىن ەلىمىزدىڭ جاس جۇلدىزدارىنىڭ ناعىز فابريكاسى. جوبا تالىمگەرلەرى – رەجيسسۋرا, ۆوكال, حورەوگرافيا, اكتەرلىك كاسىپ, يميدج جانە ستيل شەبەرلەرى. جوبانىڭ ارقاسىندا قاتىسۋشىلار شىعارماشىلىق ورتادا بولىپ, كەرەمەت كاسىبي تاجىريبەنى ۇيرەنۋ مۇمكىندىكتەرىنە يە بولادى. بۇگىنگى كۇنى «ايالاعان استانا» جوباسى ناعىز ۇلتتىق برەندكە اينالدى», دەلىنگەن مالىمەتتە.
رەسپۋبليكالىق بالالار بايقاۋى 2 كەزەڭمەن وتەدى. ءبىرىنشى كەزەڭ – وڭىرلەر بويىنشا ىرىكتەۋ, ەكىنشى كەزەڭ – فينال. بايقاۋدا 8 – 12 جاس ارالىعىنداعى بالالار ەسترادالىق-ۆوكال جانرىندا ونەر كورسەتىپ, باق سىنايدى.
ايتا كەتەيىك, «ايالاعان استانانىڭ» العاشقى كەزەڭى 2013 جىلى ۇيىمداستىرىلدى, سودان بەرى 9 كەزەڭ ءوتتى. جوبا ارقاسىندا كوپتەگەن جۇلدىزدار, ولاردىڭ ىشىندە مۇحامەدالي جۇگىنىسوۆ, دانەليا تولەشوۆا, بولات باتىرباەۆ, جانەل سادۋاقاس سىندى جاس ونەرپازدار تانىلدى. جەڭىمپازدار مەن لاۋرەاتتار قازىر بەدەلدى حالىقارالىق فەستيۆالداردا ونەر كورسەتىپ ءجۇر.
1 شىلدە كۇنى (باستالۋى – ساعات 20.00-دە, تۇران داڭعىلى, 2/6/ امفيتەاتر) وتەتىن گالا-كونتسەرتكە الەمدىك دەڭگەيدە جەتىستىككە جەتكەن وتكەن جىلدارعى بايقاۋ فيناليستەرى قاتىسادى.
ال بيىلعى جىلى ۇزدىك اتانعان قاتىسۋشى بالالاردىڭ «نوۆايا ۆولنا» حالىقارالىق بايقاۋىندا قازاقستان نامىسىن قورعايدى.