اقمولا وبلىسى اۋماعىنداعى قىزىلۇيىم اۋىلى ماڭىنداعى قورعاندى قازۋ كەزىندە ادام سۇيەگى تابىلدى. مامانداردىڭ بولجامىنشا, ول قولا داۋىرىندە ءومىر سۇرگەن بولۋى مۇمكىن, دەپ حابارلايدى Egemen.kz اقمولا وبلىسى مادەنيەت باسقارماسىنىڭ ءباسپاسوز قىزمەتىنە سىلتەمە جاساپ.
ورتالىق ماماندارىنىڭ مالىمەتىنە سۇيەنسەك, ادام سۇيەگى وڭ جاعىمەن, باسىن سولتۇستىك-باتىسقا قاراي قاراتىپ, قول-اياعى بۇگىلگەن كۇيدە ورنالاسقان.
«ناشار ساقتالعان وستەولوگيالىق قالدىقتار تابىلدى, ونىڭ ىشىندە باس سۇيەكتىڭ بولىكتەرى, بىلەك سۇيەكتەرى, اياقتىڭ تىرسەك سۇيەكتەرى, ازداپ جامباس سۇيەكتەرى جارىم-جارتىلاي ساقتالعان», دەلىنگەن اقمولا وبلىسى مادەنيەت باسقارماسىنىڭ تاريحي-مادەني مۇرانى قورعاۋ جانە پايدالانۋ ورتالىعى تاراتقان حابارلامادا.
سۇيەك قالدىقتارىنىڭ مويىن بولىگىندە 20-دان استام پاستالى مونشاقتارى (القا) تابىلدى.