بۇگىن سەناتتا جۋرناليستەر اراسىنداعى «پاراسات» بايقاۋىنىڭ لاۋرەاتتارىن ماراپاتتاۋ ءراسىمى ءوتتى. ءىس-شارا بارىسىندا سەنات توراعاسى ماۋلەن اشىمباەۆ بۇقارالىق اقپارات قۇرالدارى وكىلدەرىن كەلە جاتقان كاسىبي مەرەكەلەرىمەن قۇتتىقتادى, دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
ءوز سوزىندە پالاتا سپيكەرى قازىر اقپارات زامانى ەكەنىن, وسىنداي كەزەڭدە جۋرناليستەر قاۋىمى قوعامنىڭ ىلگەرى جىلجۋىندا ماڭىزدى ءرول اتقاراتىنىن ايتتى. سونداي-اق ماۋلەن اشىمباەۆ بۇگىندە سەنات مەملەكەت باسشىسىنىڭ باستاماسىمەن ىسكە اسىرىلىپ جاتقان رەفورمالاردى زاڭنامالىق تۇرعىدان قامتاماسىز ەتۋ باعىتىندا اۋقىمدى جۇمىس اتقارىپ كەلە جاتقانىنا نازار اۋداردى. بۇل رەتتە دە پالاتا باق-پەن اشىق ءارى تىعىز بايلانىس ورناتۋعا ۇلكەن كوڭىل ءبولىپ كەلەدى.
«مەملەكەت باسشىسى تۇركىستاندا وتكەن ۇلتتىق قۇرىلتايدىڭ ەكىنشى وتىرىسىندا ماسس-مەديا – ەلىمىزدى جاڭعىرتۋ ىسىنە ەرەكشە ىقپال ەتەتىن سالا دەپ اتاپ ءوتتى. شىن مانىندە, جۋرناليستەر قاۋىمىن بيلىك پەن قوعام اراسىنداعى پارمەندى بايلانىس قۇرالى دەپ قابىلدايمىز. سوندىقتان ىسكە اسىرىلىپ جاتقان بارلىق رەفورمالاردىڭ ناتيجەلى بولۋىندا باق وكىلدەرىنىڭ ءرولى ايرىقشا مانگە يە. ولار قوعامنىڭ مەملەكەتكە دەگەن سەنىمىن قالىپتاستىرۋ جولىندا دا ماڭىزدى ءرول اتقارادى. سول ارقىلى ەلدەگى تۇراقتىلىق پەن كەلىسىمنىڭ ساقتالۋىنا ۇلكەن ۇلەس قوسۋدا. وسى ورايدا جۋرناليستەردىڭ پارلامەنتتىك پۋلىنا جەكە توقتالعىم كەلىپ وتىر. سەناتتىڭ جۇمىسىن جانە قابىلدانعان زاڭداردىڭ ءمانى مەن ماڭىزىن ازاماتتارعا جەدەل ءارى ساپالى جەتكىزە وتىرىپ, سىزدەر دەموكراتيالى, ادىلەتتى قازاقستان قۇرۋ ىسىنە ءوز ۇلەستەرىڭىزدى قوسىپ كەلەسىزدەر», دەدى سەنات توراعاسى.
سونىمەن قاتار ماۋلەن اشىمباەۆ سەنات وڭىرلەردىڭ مۇددەسىن قورعايتىن پالاتا رەتىندە ايماقتاردىڭ جان-جاقتى دامۋىنا, تۇرعىداردىڭ ءومىر ءسۇرۋ ساپاسىن ارتتىرۋعا باسا ءمان بەرەتىنىن ايتتى. وسىعان وراي سەناتورلاردىڭ اتالعان باعىتتاعى دەپۋتاتتىق ساۋالدارىن, كوميتەتتەردىڭ جۇمىسىن, قابىلدانعان زاڭداردى حالىققا جەتكىزىپ, ولاردىڭ ءمانىن ءتۇسىندىرۋ ىسىندە باق-تىڭ ماڭىزى زور.
ايتا كەتەيىك, «پاراسات» بايقاۋىنا بيىل 100-گە جۋىق جۇمىس كەلىپ ءتۇستى. اۆتورلاردىڭ قاتارىندا ورتالىقپەن بىرگە وڭىرلەردەگى تەلەارنا, راديو, گازەت, اقپارات پورتالدارىنىڭ جۋرناليستەرى بار.
2023 جىلعى «پاراسات» بايقاۋىنىڭ جەڭىمپازدارى:
ۇزدىك تەلەۆيزيالىق ماتەريال: ءازيزا يساباي («كتك» تەلەارناسى), نىسانالى ىعىلوۆ («Jibek joly» تەلەارناسى), نازەركە سۇلتانقۇلوۆا («حابار24» تەلەارناسى).
ۇزدىك راديوماتەريال: گۇلنۇر دوسكەەۆا («شالقار» راديوسى).
مەرزىمدى باسپاسوزدەگى ۇزدىك ماتەريال: ميرگۇل جىلقىشىنوۆا («ليتەر» گازەتى), لەيلا تاستانوۆا («ۆرەميا» گازەتى).
ينتەرنەت-باسىلىمداعى ۇزدىك جاريالانىم: نازگۇل ابجەكەنوۆا («گولوس نارودا» اقپارات اگەنتتىگى), وكسانا دايروۆا («Zakon.kz» اقپارات اگەنتتىگى).
الەۋمەتتىك جەلىلەردەگى ۇزدىك جازبا: الماس شوراەۆ – قوعام قايراتكەرى.
جىلدىڭ ارنايى سىيلىعى – «ۇزدىك اناليتيكالىق ماتەريال»: «كوكشە»تەلەارناسىنىڭ ۇجىمى, اقمولا وبلىسى («Qazaqstan» كورپوراتسياسى); اسەلىم ءابىلدينوۆا –«تدك-42» تەلەارناسى, باتىس قازاقستان ءوبلىسى; اليا المۇحامبەتوۆا – «پەرۆىي كانال ەۆرازيا»تەلەارناسى; قالماحانبەت مۇقامەتقالي – «Egemen Qazaqstan» گازەتى.