جۋىقتا ۇلتتىق ارحيۆ مەكەمەسىنىڭ ۇيىمداستىرۋىمەن قازاقستاننىڭ ەڭبەك سىڭىرگەن قايراتكەرى, وتاندىق ونكولوگيا سالاسىنىڭ بىلگىر مامانى پروفەسسور ءاليحان دوساحانوۆتىڭ جەكە قورىن مۇراعاتقا تابىستاۋ ءراسىمى ءوتتى. اتاپ ايتار بولساق, ارحيۆكە ۇلتجاندى دارىگەردىڭ العان سىيلىقتارى, قولجازبالارى, عىلىمي ەڭبەكتەرى, فوتودەرەكتەرى تابىستالدى.
اتالعان ءىس-شاراعا مادەنيەت جانە سپورت مينيسترلىگى, ارحيۆ, قۇجاتتاما جانە كىتاپ ءىسى كوميتەتىنىڭ توراعاسى قۋات بوراش, حيميا عىلىمدارىنىڭ دوكتورى, اكادەميك ارىستان عازاليەۆ, الاشتانۋشى عالىم سۇلتان حان ءجۇسىپ, الاشوردالىق دارىگەر باقتىعالي بيسەنوۆتىڭ قىزى روزا بيسەنوۆا جانە تاعى باسقا تانىمال تۇلعالار قاتىسىپ, قور يەسى تۋرالى ەستەلىكتەرىمەن ءبولىستى.
ءاليحان حامزا ۇلى ەڭبەك جولىن 1966 جىلى الماتى قالاسىنداعى №2 قالالىق كلينيكالىق اۋرۋحانانىڭ حيرۋرگيا بولىمىنەن باستاپ, قازاق ونكولوگيا جانە راديولوگيا عىلىمي زەرتتەۋ ينستيتۋتىندا ەڭبەك جولىن جالعاستىرىپتى. زەينەت جاسىنا شىققانعا دەيىن وتاندىق مەديتسينا سالاسىندا ابىرويلى ەڭبەگىمەن ەلەنىپ, كوپتەگەن عىلىمي ەڭبەك جازدى. ونىڭ سىرتىندا مەديتسينا عىلىمدارىنىڭ دوكتورى, پروفەسسور دەڭگەيىنە كوتەرىلدى.
ول كاسىبي دارىگەر رەتىندە ونكولوگيا جانە راديولوگيا عىلىمي زەرتتەۋ ينستيتۋتى عالىمدارى جۇرگىزگەن عىلىمي جۇمىستاردىڭ قورىتىندىلارىن تاجىريبەگە ەنگىزۋ, اۋىر ناۋقاستاردى ءتيىمدى ەمدەۋ ءتاسىلىن جۇزەگە اسىرۋمەن قاتار, قاتەرلى ىسىكتەردىڭ ساۋلەلىك تەراپياسىمەن اينالىساتىن ءۇش قۇرىلىمدى ءىرى كلينيكالىق راديولوگيا بولىمىنە جەتەكشىلىك جاساعان.
وسىلاي وتاندىق مەديتسينا سالاسىنا جارتىعاسىرلىق ەڭبەك ءسىڭىرىپ, ۇلت دەنساۋلىعىن جاقسارتۋ جانە ەلىمىزدە مەديتسينا عىلىمىن دامىتۋ جولىندا تەر توكتى. ناتيجەسىندە, «قازاقستاننىڭ ەڭبەك سىڭىرگەن قايراتكەرى» اتاعىمەن جانە «قۇرمەت» وردەنىمەن ماراپاتتالىپ, مەديتسينا عىلىمىنىڭ دامۋىنا قوسقان ماڭىزدى ۇلەسى ءۇشىن حالىقارالىق «Hippocrat», «Avicenna», «پيروگوۆ» وردەندەرىنىڭ يەگەرى اتاندى. سونىمەن قاتار پ.م.پوسپەلوۆ اتىنداعى جانە ۇلتتىق مەديتسينا قاۋىمداستىعى مەدالىن الىپ «التىن دارىگەر» اتاعى بەرىلدى.
ءاليحان حامزا ۇلىنىڭ وتاندىق مەديتسينا تاريحىنا قاتىستى جازعان قۇندى تۋىندىلارىنىڭ ءبىرى – «العاشقى الاش دارىگەرلەرى» اتتى كىتابى. بۇنىڭ باستاپقى بولىگى 70-80 جىلدارى جازىلىپ, كەڭەستىك تسەنزۋرا تاراپىنان جويىلعانى بەلگىلى. قازىرگى نۇسقاسى ۇلتتىق مەديتسينانىڭ دامۋى مەن قالىپتاسۋى جولىنداعى العاشقى ءبىرتۋار دارىگەرلەردىڭ قايراتكەرلىگى مەن مۇراسىن باياندايدى.