قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلىنىڭ بيىلعى جىلدى «يسلام جانە ىزگى قوعام» جىلى دەپ جاريالاعانى بەلگىلى.
وسى اتاۋلى جىلعا وراي وبلىستىق ورتالىق مەشىت يمامدارىنىڭ ۇيىتقى بولۋىمەن جانە جومارت جانداردىڭ دەمەۋشىلىگىمەن قوناەۆ قالاسىندا قازاق كۇرەسىنەن تۇڭعىش رەت «يمامدار بارىسى» ءتۋرنيرى ءوتتى. ونىڭ باستى ماقساتى – ءدىن قىزمەتكەرلەرى اراسىندا سالاماتتى ءومىر سالتىن ناسيحاتتاپ, ۇلتتىق سپورتتىڭ دامۋىنا اتسالىسۋ.
يمامدار اراسىندا العاش رەت ۇيىمداستىرىلعان سپورتتىق ءىس-شارانىڭ اشىلۋ سالتاناتىنا وبلىستىق سپورت جانە دەنە شىنىقتىرۋ باسقارماسىنىڭ باسشىسى نۇرباقىت تەڭىزباەۆ, ءدىن ىستەرى باسقارماسىنىڭ ءبولىم باسشىسى ەرلان ماتاەۆ, قوناەۆ قالالىق ارداگەرلەر كەڭەسىنىڭ توراعاسى امانكەلدى بەسپاەۆ پەن اقساقالدار كەڭەسىنىڭ توراعاسى بەيسەتاي قاشاقباەۆ قاتىسىپ, كورەرمەندەرمەن بىرگە بەلدەۋلەردى تاماشالادى.
ادەتتە مەشىتتە عانا كورىنەتىن اق سالدەلى يمامداردىڭ بوزكىلەمدە ءبىرىن-ءبىرى جۇلقا تارتىپ, شالت قيمىلمەن جامباسقا سالۋعا تىرىسقان بەلدەسۋلەرىن قىزىق كورىپ, تاماشالاۋعا كەلگەن جانكۇيەرلەردىڭ دەلەبەسىن قوزدىرعان جارىس جەرەبە تارتۋ راسىمىنەن باستاۋ الدى. ىرىكتەۋ كەزەڭىندە جارىسقا قاتىسۋشى يمامدار 80 كيلوعا دەيىنگى, ودان جوعارى سالماق دارەجەسى بويىنشا ەكى توپتا سىنعا ءتۇستى. ايلا مەن ءادىس, ەپتىلىك پەن كۇشتىلىك سىنالعان تۇستا تالعار, ىلە, جامبىل, قاراساي, ەڭبەكشىقازاق, ۇيعىر اۋداندارىنىڭ مەشىت قىزمەتكەرلەرى كاسىبي سپورتشىلاردان كەم ەمەس ونەر كورسەتكەنىن ايرىقشا اتاماقپىز. قارسىلاسىنىڭ جاۋرىنىن جەرگە تيگىزگەن مىقتى يمامداردى قازىلار القاسى انىقتاپ, تۋرنيرگە تورەلىك ەتتى.
تارتىسقا تولى تۋرنير قورىتىندىسىندا 80 كيلوعا دەيىنگى سالماق دارەجەسى بويىنشا ەڭبەكشىقازاق اۋدانى اۆات اۋىلدىق مەشىتىنىڭ باس يمامى دامير وڭعاربەك 1-ورىندى جەڭىپ السا, 2 جانە 3-ورىنداردى تالعار اۋدانىنىڭ جاڭالىق اۋىلدىق مەشىتىنىڭ يمامى رۋسلان يساباەۆ پەن نۇرا اۋىلدىق مەشىتىنىڭ نايب يمامى المات قابىلحان يەلەندى.
ال 80 كيلودان جوعارى سالماقتاعى بەلدەسۋلەردە باس جۇلدەنى قاراساي اۋدانىنا قاراستى جاڭاشامالعان اۋىلدىق «بىرلىك» مەشىتىنىڭ نايب يمامى اسانحوجا سابىروۆ يەلەنسە, قاسكەلەڭ قالاسىنداعى ء«ىرشات» مەشىتىنىڭ باس يمامى ابدۋلماجيت ابدۋلقادىر ۇلى 2-ورىنعا, ال جامبىل اۋدانى ۇزىناعاش اۋىلدىق مەشىتىنىڭ يمامى بەيسەنبى اۆراي 3-ورىنعا تابان تىرەدى. جارىس جەڭىمپازدارىنا – ۋمراعا جولداما, 2-ورىنعا – 200 مىڭ تەڭگە, 3-ورىنعا 100 مىڭ تەڭگە اقشالاي سىيلىق تابىس ەتىلدى.
«شاريعاتىمىز ادامنىڭ رۋحاني قۋاتتىلىعىمەن قاتار, ونىڭ دەنە ءبىتىمىنىڭ دە قۋاتتى بولۋىن تالاپ ەتەدى. مۇحاممەد پايعامبارىمىزدىڭ حاديسىندە ء«السىز مۇسىلماننان قۋاتتى مۇسىلمان اللاعا سۇيكىمدىرەك» دەلىنگەن. سوندىقتان «شىنىقساڭ شىمىر بولاسىڭ» دەپ دانا حالقىمىز ايتقانداي, بۇل يمامدار مەشىتتە وتىرىپ, ءدىني راسىمدەردى عانا ورىنداپ قويماي, سونىمەن قاتار ۇلتتىق سپورتقا دا بەيىم ەكەنىن ناسيحاتتاۋ بارىسىندا ۇيىمداستىرىلعان ءىس-شارا بولدى. باسەكەلى جارىستا يمامدار اراسىندا قازاق كۇرەسىنە يكەمدى, شەبەر بەلدەسە بىلەتىن يمامدار بار ەكەنىن بىلدىك. سپورت سالاسىنىڭ ماماندارى بۇل جارىسقا جوعارى باعا بەردى. مۇنداي ءىس-شارالار الداعى ۋاقىتتا دا جالعاسىن تابادى», دەيدى وبلىستىڭ باس يمامى ماديار پىرىمقۇلوۆ.
الماتى وبلىسى