قازاقستاننىڭ جۇپتىق سىنداعى ءبىرىنشى, الەمنىڭ 53-راكەتكاسى الەكساندر نەدوۆەسوۆ يلكلي ( ۇلىبريتانيا) چەللەندجەر ءتۋرنيرىنىڭ فينالىنا شىقتى, دەپ حابارلايدى Egemen.kz قتف باسپاسوز قىزمەتىنە سىلتەمە جاساپ.
جارىستىڭ ءبىرىنشى راكەتكاسى بولىپ تىركەلگەن نەدوۆەسوۆ پەن ەكۆادورلىق گونسالو ەسكوبار اۋەلى اۋستراليالىقتار ەندريۋ حارريس – ليۋك سەۆيلدى 6:2, 6:4 ەسەبىمەن تىزە بۇكتىردى.
قازاقستاندىق-ەكۆادورلىق دۋەت شيرەك فينالدا گەرمانيالىقتار كونستانتين فرانتسەن – حەندريك يەبەنسپەن شەبەرلىك بايقاستى.
نەدوۆەسوۆ – ەسكوبار 6:4, 3:6, 10:4 ەسەبىمەن جەڭدى.
الەكساندر مەن گونسالو جارتىلاي فينالدا بەلگيالىقتار زيزۋ بەرگس – يوريس دە لورەمەن كەزدەستى.
ءبىرىنشى پارتيادا بەلگيالىق جۇپ تاي-برەيكتە ءساتتى وينادى – 7:6 (7:3).
ەكىنشى سەتتە ەسەپ 5:5 بولعان مەزەتتە قازاقستاندىق-ەكۆادورلىق جۇپ برەيك جاساپ, سوسىن ءوز گەيمدەرىن الدى – 7:5. سودان كەيىن سۋپەر تاي-برەيكتە مۇمكىندىكتەرىن جىبەرگەن جوق – 10:5.
الەكساندر نەدوۆەسوۆ پەن گونسالو ەسكوبار فينالدا دودانىڭ 3-راكەتكالارى, امەريكالىق روبەرت گەللوۋەي – اۋستراليالىق دجون پاتريك سميتپەن باس جۇلدەنى ساراپقا سالادى.