تۇركىستاندا وتكەن ۇلتتىق قۇرىلتايدا مەملەكەت باسشىسى قاسىم-جومارت توقاەۆ ۇلتتىق يدەولوگيامىزدى دامىتۋ جونىندە ناقتى باعىت-باعداردى بەلگىلەپ بەردى.
ەلىمىزدە تاۋلىك بويى جۇمىس ىستەيتىن پرەزيدەنت كىتاپحاناسىن اشۋ باستاماسىن كوتەردى. بۇل – جاس بۋىندى وتانشىلدىق, ەلجاندىلىق جانە ۇلتتىق رۋحتا تاربيەلەۋدىڭ قاينار كوزى رەتىندە كىتاپحانا جۇمىسىن جانداندىرۋعا يگى ىقپال ەتەتىن ومىرشەڭ باستاما. ۇلتتىق مۇددەگە ساي كىتاپتاردى كوپتەپ باسىپ شىعارۋ تۋرالى پرەزيدەنت باستاماسىنىڭ ماڭىزى زور. ونداي كىتاپتاردى ارنايى سەريامەن, جۇيەلى جانە جوسپارلى تۇردە باسىپ شىعارعان ءجون.
قازىر بالالاردىڭ ءتىلى كەشتەۋ شىعاتىن بولدى. ونداي كەلەڭسىزدىككە بالالاردىڭ بەسىكتەن بەلى شىقپاي جاتىپ سمارتفوندى پايدالانۋى اسەر ەتەرى انىق. مەملەكەت باسشىسىنىڭ وسى وتكىر ماسەلەگە نازار اۋدارعانى – قۇپتارلىق جايت.
الداعى ۋاقىتتا وسى تاقىرىپ بويىنشا ۇلكەن ءىس-شارالار ۇيىمداستىرىلسا, بالالاردىڭ كىتاپقا قىزىعۋشىلىعىن وياتۋ, ءبىلىمدى, تاربيەلى ۇرپاق تاربيەلەۋدە كىتاپ, كىتاپحانا, وقىرمان اراسىندا تىعىز بايلانىس ورناتۋ ءۇشىن اۋقىمدى جۇمىستار جۇرگىزىلسە, نۇر ۇستىنە نۇر بولار ەدى.
ۇلتتىق قۇرىلتايدا پرەزيدەنت كوتەرگەن كەلەلى تاقىرىپتار كوپشىلىككە تەرەڭ وي سالىپ, الدا اۋقىمدى شارالار قولعا الىنىپ, ۇلتتى ورتاق ىستەرگە ۇيىتۋ, جاڭارعان ەلىمىزدى ودان ءارى وركەندەتۋ جولىندا ىرگەلى ىستەر اتقارىلاتىنىنا كوزىمىزدى جەتكىزدى.
نۇرلان قالقا,
بالالار اقىنى,
حالىقارالىق «الاش» ادەبي
سىيلىعىنىڭ لاۋرەاتى