ولار – ءبىر ماماندىقتى ومىرلىك كاسىپ ەتىپ, قوعام تىنىشتىعىن كۇزەتىپ جۇرگەن جۇبايلار. وتانمەن بىرگە وتباسىنىڭ دا بىرلىگى مەن تاتۋلىعىن ساقتاپ ءومىر ءسۇرۋ – جاۋاپتى ءىس. پوليتسيا قىزمەتىنىڭ بار اۋىرتپالىعىن بىرگە كوتەرىپ, تاتۋ-ءتاتتى عۇمىر كەشىپ جاتقان ءتارتىپ ساقشىلارىنىڭ قاتارىندا جانىبەك پەن ايگەرىمنىڭ شاڭىراعىن دا ەرەكشە ايتۋعا بولادى.
ولار ىشكى ىستەر ورگاندارىنا جۇرەك قالاۋلارىمەن كەلدى. جانىبەك تولەپوۆ 2012 جىلى, ال ايگەرىم ساناباەۆا 2015 جىلى پوليتسيا قاتارىنا قابىلدانعان. سودان بەرى وقالى فورما كيىپ, پوگون تاققان جاس جۇبايلار بۇل سالاعا كەلگەندەرىنە وكىنگەن ەمەس. ەكەۋى دە قازىر اتىراۋ وبلىسىنىڭ جىلىوي اۋداندىق پوليتسيا بولىمىندە ەڭبەك ەتەدى.
– مەن وسى قىزمەتكە العاش كەلگەن كەزدە ءوزىمنىڭ بولاشاق جۇبايىمدى كەزىكتىردىم. كەيىن وتباسىن قۇردىق. ول كەزدە مەن جىلىوي اۋداندىق پوليتسيا ءبولىمىنىڭ كامەلەتكە تولماعانداردىڭ ۋچاسكەلىك پوليتسيا ينسپەكتورى ەدىم. ال جانىبەك ۋچاسكەلىك پوليتسيا ينسپەكتورى بولاتىن, – دەيدى ايگەرىم ساناباەۆا.
بۇگىندە ەرلى-زايىپتىلاردىڭ ەكەۋى دە پوليتسيا كاپيتانى. ءوز قىزمەتتەرىنە بەرىلگەن ولار قاجىرلى ەڭبەكتەرىمەن كوزگە ءتۇسىپ ءجۇر. بۇل سالادا ءوز باسىن قاتەرگە تىگىپ, ادام ومىرىنە اراشا بولۋدا ەرلىكتىڭ حاس ۇلگىسىن كورسەتكەن جاندار از ەمەس. سولاردىڭ ءبىرى – ءبىزدىڭ كەيىپكەرىمىز جانىبەك تولەپوۆ. ىشكى ىستەر ورگاندارى قىزمەتكەرلەرى جۇمىس بابىندا نەبىر شىتىرمان وقيعالاردى باستان كەشىرەتىنى بەلگىلى. ويتكەنى ءتارتىپ ساقشىلارى ۇنەمى قىلمىس, قۇقىق بۇزۋشىلىق, توتەنشە جاعدايلاردىڭ باسى-قاسىندا جۇرەدى. كەيىپكەرىمىز سونداي وقيعالاردىڭ بىرىمەن ءبولىستى.
– 2021 جىلى 11 ءساۋىر كۇنى تاڭعى ساعات 04.17 شاماسىندا جىلىوي اۋداندىق پوليتسيا بولىمىنە قۇلسارى قالاسىنىڭ كوپقاباتتى ۇيلەرىنىڭ بىرىندە ءورت شىققاندىعى تۋرالى حابار ءتۇستى. توتەنشە جاعدايلار قىزمەتكەرلەرىنە حابار بەرىلگەنىنە قاراماستان, ولاردىڭ كەلۋىن كۇتپەي جانىمداعى ارىپتەستەرىم, «قايسار» تۇنگى توسقاۋىل توبىنىڭ قىزمەتكەرى, پوليتسيا اعا لەيتەنانتى المات شاحاەۆ, پاترۋلدىك پوليتسيا ۆزۆودىنىڭ ينسپەكتورلارى, پوليتسيا اعا لەيتەنانتى مارات انسات جانە پوليتسيا كىشى لەيتەناتى اقجول تويعۇلوۆپەن بىرگە ءورت شىققان ءۇيدىڭ تۇرعىندارىنا كومەكتەسۋگە كىرىستىك.
وقيعا ورنىنا جەتكەنىمىزدە, ءتىلسىز جاۋ كۇش الىپ, ءۇيدىڭ ءىشىن قويۋ ءتۇتىن باسقان. ءتۇتىن اراسىنان جول تاۋىپ, كوپقاباتتى ءۇي ءىشىن تەكسەرىپ, كورشىلەس پاتەرلەردەن ءتورت جانە التى جاس ارالىعىنداعى بالالار مەن ەرەسەك ادامداردى سىرتقا شىعارىپ, جەدەل جاردەم قىزمەتكەرلەرىنە تاپسىردىق. ىشتەگى جانداردىڭ ءبارى دە سىرتقا شىعارىلعانىنا كوزىمىز جەتكەنشە ۇيگە كىرىپ, تۇتىنگە ورانعان بولمەلەردى قايتا-قايتا تەكسەردىك. قانداي جاعداي بولسىن ءبىرىنشى كەزەكتە حالىققا كومەكتەسۋ – مىندەتىمىز. بۇل ارەكەتىمىزدى ەرلىك نەمەسە باتىرلىق دەپ سانامايمىز. باستىسى, جەدەل ارەكەت ەتىپ, شەشىم قابىلداعانىمىزدىڭ ارقاسىندا ادامدار ءدىن امان, – دەيدى ۋچاسكەلىك پوليتسيا ينسپەكتورى.
سول كۇنى پوليتسەيلەر مەن توتەنشە جاعداي قىزمەتكەرلەرىنىڭ باتىل شەشىمى ارقاسىندا ادام شىعىنى بولعان جوق. باستارىن قاتەرگە تىككەن جىلىوي اۋداندىق پوليتسيا ءبولىمىنىڭ قىزمەتكەرلەرى ناعىز ازاماتتىقتىڭ ۇلگىسىن كورسەتكەن بولاتىن. كەيىن ادام ءومىرىن قۇتقارۋدا كورسەتكەن ەرلىگى ءۇشىن جانىبەك تولەپوۆ ىشكى ىستەر مينيسترلىگىنىڭ «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن ماراپاتتالدى.
حالىقپەن ءتىل تابىسۋ – ۋچاسكەلىك پوليتسيا ينسپەكتورلارى ءۇشىن ەڭ باستى تالاپ. جانىبەك پەن ايگەرىم حالىقتىڭ سەنىمى پوليتسيا جۇمىسىنىڭ باستى كورسەتكىشى ەكەنىن ايتادى. بۇگىندە قوس بىردەي پوليتسيا كاپيتانى – ەل تىنىشتىعىن قورعايتىن ساقشى عانا ەمەس, سونىمەن قاتار وتباسىنىڭ بەرەكەسىن ساقتاپ, جانسايا مەن ايزەرە اتتى ەكى قىزدى ءوسىرىپ وتىرعان اتا-انا. قىستىڭ ىزعارى مەن جازدىڭ اپتابىنا قاراماي, ەل مۇددەسى, تۇرعىنداردىڭ تىنىش ۇيقىسى مەن جارقىن بولاشاعى جولىندا تىنىمسىز قىزمەت ەتىپ جۇرگەن ءتارتىپ ساقشىلارىنىڭ ەڭبەگى قانداي ماقتاۋعا دا لايىق.