پرەزيدەنت قاسىم-جومارت توقاەۆتىڭ شاقىرۋىمەن 19-21 ماۋسىم كۇندەرى گەرمانيانىڭ فەدەرالدى پرەزيدەنتى فرانك-ۆالتەر شتاينمايەر قازاقستانعا مەملەكەتتىك ساپارمەن كەلەدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«ساپار اياسىندا ەكى ەل باسشىلارى كەلىسسوزدەر جۇرگىزەدى. كەلىسسوزدەر بارىسىندا ساۋدا-ەكونوميكالىق, ينۆەستيتسيالىق سالالارداعى ىنتىماقتاستىقتى كەڭەيتۋگە, كولىك-لوگيستيكالىق جانە ەنەرگەتيكالىق قاتىناستاردى دامىتۋعا, سونداي-اق گۋمانيتارلىق بايلانىستاردى تەرەڭدەتۋگە باسا ءمان بەرىلەدى. قازاقستان مەن گەرمانيا اراسىنداعى ستراتەگيالىق سەرىكتەستىكتىڭ جاي-كۇيى مەن ونى نىعايتۋ پەرسپەكتيۆالارى قاراستىرىلادى», دەلىنگەن حابارلامادا.
كەلىسسوزدەر قورىتىندىسى بويىنشا ەكىجاقتى بىرقاتار قۇجاتقا قول قويىلادى دەپ جوسپارلانىپ وتىر.
سونىمەن قاتار گەرمانيانىڭ فەدەرالدى پرەزيدەنتى قازاقستان مەن گەرمانيا ۋنيۆەرسيتەتتەرى رەكتورلارىنىڭ فورۋمىندا ءسوز سويلەيدى.
بۇدان بولەك, ەكى ەل پرەزيدەنتتەرى قازاق-گەرمان بيزنەس فورۋمىنا قاتىسادى.
فرانك-ۆالتەر شتاينمايەر ساپار اياسىندا ماڭعىستاۋ وبلىسىنا بارىپ, ءوڭىردىڭ ەكونوميكالىق الەۋەتىمەن تانىسادى.
گفر پرەزيدەنتى قازاقستان-گەرمانيا ينجينيرينگ ينستيتۋتىنىڭ اشىلۋىنا جانە Svevind شۆەد-گەرمان كومپانياسىنىڭ جاسىل سۋتەگى وندىرەتىن زاۋىتىنىڭ سىناما بۇرعىلاۋ جۇمىستارىن باستاۋ راسىمىنە قاتىسادى دەپ جوسپارلانىپ وتىر. فرانك-ۆالتەر شتاينمايەر ماڭعىستاۋ وبلىسىنا ساپارمەن باراتىن العاشقى ەۋروپالىق پرەزيدەنت بولماق.