پرەزيدەنت استانا قالاسىنىڭ اكىمىن قابىلدادى

مەملەكەت باسشىسىنا ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى تۋرالى باياندالدى.

اكىمدىكتىڭ مالىمەتى بويىنشا بيىلعى 5 ايدا تارتىلعان ينۆەستيتسيا كولەمى 425 ميلليارد تەڭگەدەن اسىپ, بىلتىرعى وسى كەزەڭمەن سالىستىرعاندا ءوسىم 20 پايىزدان ارتتى. سونداي-اق 2023 جىلى 25 ينۆەستيتسيالىق جوبانى ىسكە قوسۋ جوسپارلانىپ وتىر. بۇل 87 ميلليارد تەڭگە كولەمىندە قارجى تارتۋعا جانە 1,8 مىڭ جۇمىس ورنىن اشۋعا مۇمكىندىك بەرەدى.

سونىمەن قاتار پرەزيدەنتكە تۇرعىن ءۇي الاپتارىن دامىتۋ, اپاتتى جاعدايداعى ەسكى تۇرعىن ۇيلەردى بۇزۋ, الەۋمەتتىك نىساندار سالۋ, قۇرىلىسى ۇزاققا سوزىلعان نىسانداردى اياقتاۋ, شاعىن جانە ورتا بيزنەستى قولداۋ, جۇمىس ورىندارىن اشۋ جانە قالانى اباتتاندىرۋ ماسەلەلەرى جونىندە ەسەپ بەرىلدى.

جەڭىس قاسىمبەكتىڭ ايتۋىنشا, بيىل 6 مىڭعا جۋىق الەۋمەتتىك جەڭىلدىكپەن بەرىلەتىن پاتەر جانە 16 ۇلەسكەرلىك قۇرىلىس نىسانىن سالۋ جۇمىستارىن اياقتاۋ جوسپارلانىپ وتىر. سونداي-اق ەلوردانىڭ كولىك ينفراقۇرىلىمىن دامىتۋ ماقساتىندا بيىل تاۋەلسىزدىك داڭعىلىنداعى كوپىر قۇرىلىسى اياقتالىپ, قالانىڭ قوعامدىق كولىك باعدارلارى بويىنشا 400 جاڭا اۆتوبۋس پايدالانۋعا بەرىلەدى.

بۇدان بولەك, مەملەكەت باسشىسىنا اۋىزسۋ ستانتسياسى (سسس-3), جىلۋ ەلەكتر ورتالىقتارى, گاز جىلۋ ستانتسيالارى قۇرىلىسىنىڭ بارىسى تۋرالى مالىمەت بەرىلدى. مىسالى, سسس-3 ستانتسياسى پايدالانۋعا بەرىلگەننەن كەيىن ونىڭ قۋاتى تاۋلىگىنە 100 مىڭ تەكشە مەتر سۋ جەتكىزۋگە جەتەدى. سسس-3 ستانتسياسىنىڭ ءبىرىنشى كەزەڭىن ماۋسىم ايىنىڭ سوڭىندا, ەكىنشى كەزەڭىن بيىل تامىزدا ىسكە قوسۋ جوسپارلانىپ وتىر. بۇعان دەيىن استانا سۋ قويماسىنان سۋ قۇبىرىن تارتۋ جۇمىستارى باستالعان ەدى.

مەملەكەت باسشىسىنىڭ تاپسىرماسى بويىنشا قالانى كوگالداندىرۋ جانە اباتتاندىرۋ جۇمىستارى جۇيەلى جۇرگىزىلىپ جاتىر. بيىل 150-دەن استام اۋلا مەن قوعامدىق ورىنداردى اباتتاندىرۋ جوسپارلانعان.

كەزدەسۋ سوڭىندا قاسىم-جومارت توقاەۆ استانانىڭ الەۋمەتتىك جانە ينجەنەرلىك ينفراقۇرىلىمىن ودان ءارى دامىتۋ, قالانى اباتتاندىرۋ, كوگالداندىرۋ, سونداي-اق جىلىتۋ ماۋسىمىنا دايىندىق جونىندە بىرقاتار تاپسىرما بەردى.