ءماجىلىس دەپۋتاتى جارقىنبەك امانتاي ۇلى ەنەرگەتيكا ءمينيسترى الماسادام ساتقاليەۆقا اقسۋ قالاسىنداعى جىلۋ ماسەلەسىنە بايلانىستى دەپۋتاتتىق ساۋال جولداپ, ەكىباستۇزداعى جاعدايدىڭ قايتالانۋى مۇمكىن ەكەنىن ەسكەرتتى, دەپ حابارلايدى Egemen.kz.
ءماجىلىس دەپۋتاتى اقسۋ قالاسىنا جەكە قازاندىق قويۋ ماسەلەسى قولعا الىنعانىمەن, ءىستىڭ اياعىنا دەيىن جەتپەي قالعانىن ايتتى. وعان سەبەپ قاراجاتتىڭ جەتكىلىكسىز بولۋى.
«بۇگىنگى ءبىزدى تولعاندىرىپ وتىرعان ماسەلە – پاۆلودار وبلىسىنا قاراستى اقسۋ قالاسىنىڭ جىلۋ ماسەلەسى. اتاپ ايتار بولساق, 73 مىڭداي حالىق تۇراتىن شاھار بۇگىندە اقسۋ فەرروقورىتپا زاۋىتىنىڭ قازاندىعى ارقىلى جىلىتىلىپ كەلەدى. ونىڭ دا قازاندىقتارىنىڭ توزىعى جەتىپ تۇرعاندىعى جاسىرىن ەمەس. وعان قالانىڭ ەسكىرگەن ىشكى جىلۋ جۇيەسىن قوسىڭىز. الدا-جالدا اپات ورىن الا قالسا, ەكىباستۇزدىڭ كۇيىنە ءتۇسۋى مۇمكىن ەكەندىگىن ەسكەرتەمىز. 2016 جىلدان قولعا الىنىپ, 2017 جىلدىڭ قالاعا جەكە قازاندىق سالۋ جۇمىسى باستالعان. «اقسۋ قالاسىنىڭ قۇرىلىس ءبولىمىنىڭ» تاپسىرىسى بويىنشا 10 ميلليارد 698 ميلليون تەڭگە ءبولىنىپ قۇرىلىس جۇمىستارى باستالعان. الايدا قارجى جەكىلىكسىز دەپ تانىلىپ, وسى ۋاقىتقا دەيىن جالپى العاندا 12 ميللياردقا جۋىق قاراجات جۇمسالدى», دەدى جارقىنبەك امانتاي ۇلى.
دەپۋتات «قىستىڭ قامىن جاز ويلا» دەپ وسى باستان دابىل قاعىپ وتىرعانىن جەتكىزدى. سونداي-اق قۇرىلىسقا جاۋاپتىلاردى انىقتاۋ كەرەگىن دە اتاپ ءوتتى.
«ەندى, ەل بيۋدجەتىنەن ميللياردتاعان قاراجات جۇمسالعان قۇرىلىس ءۇشىن كىم جاۋاپ بەرەدى؟ بۇل ارنايى تەكسەرىستى, جەكە-دارا قاراۋدى قاجەت ەتەتىن ساۋال. سوندىقتان ەرتەڭ قىستىڭ كوزى قىراۋدا اقسۋ قالاسىنىڭ تۇرعىندارى دا جىلۋسىز قالۋى مۇمكىن دەگەن قاۋىپپەن دابىل قاعىپ وتىرمىز. ءارى ارنايى شارالار قابىلدانىپ, ماسەلە شۇعىل شەشىمىن تابۋى كەرەك», دەدى ءماجىلىس دەپۋتاتى جارقىنبەك امانتاي ۇلى.