استانادا بالالار اراسىندا قىزىلشا اۋرۋىن جۇقتىرعاندار كوبەيگەن. بۇل تۋرالى ەلوردانىڭ سانيتارلىق ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى جاننا پراليەۆا ايتتى, دەپ حابارلايدى Egemen.kz.
جاننا پراليەۆانىڭ ايتۋىنشا, 13 ماۋسىمداعى جاعداي بويىنشا قالادا 34 بالا قىزىلشا اۋرۋىن جۇقتىرعان. بەلگىلى بولعانداي, ولاردىڭ اتا-اناسى قىزىلشاعا قارسى جوسپارلى ەكپەدەن باس تارتقان.
«وكىنىشكە قاراي, اتا-انالاردىڭ ەكپەدەن باس تارتۋى بالانىڭ دەنساۋلىعىنا عانا ەمەس, جاقىندارىنا دا قاۋىپ توندىرەدى. قالاداعى ەكى مەكتەپكە دەيىنگى بالالار ۇيىمىندا قىزىلشا اۋرۋى تىركەلدى. ءبىرىنشى جاعدايدا قىزىلشامەن اۋىرعان بالا ءتيىستى ەكپەنى الماعان 8 بالاعا جۇقتىرعان. ال ەكىنشى جاعدايدا بالا وزىنەن باسقا ۆاكتسينا الماعان 4 بالاعا جۇقتىردى. بارلىق بالانىڭ اتا-اناسى قىزىلشاعا قارسى ۆاكتسينادان باس تارتقان», دەدى ج.پراليەۆا.
ونىڭ ايتۋىنشا, قازىر بالالار «قىزىلشانىڭ تيپتىك ءتۇرى» دياگنوزىمەن اۋرۋحانادا جاتىر. ولاردىڭ جاعدايى كۇردەلى دارەجەدە, اۋرۋ ودان ءارى ءورشۋى مۇمكىن.
وسى ورايدا جاننا پراليەۆا جوسپارلى پروفيلاكتيكالىق ەكپەلەردەن باس تارتپاۋدىڭ ماڭىزىن ءتۇسىندىردى. ونىڭ ايتۋىنشا, ەكپەنىڭ اسەرى 95-97 پايىزعا دەيىن جەتەدى.