ايدىڭ-كۇننىڭ امانىندا ايتپاي كەلگەن الاپات – ءتىلسىز جاۋدان قاپىدا قازا تاپقانداردىڭ ورنى تولماس. بەيبىت كۇندە شەيىت كەتكەندەردىڭ تۋعان-تۋىستارىنا جاراتقان سابىر بەرسىن! مۇنداي قاسىرەتتى ەندىگى جەردە ەشكىمنىڭ باسىنا بەرمەسىن.
بەيبىت كۇندە 14 ازاماتتان ايرىلۋ – حالقىمىز ءۇشىن اسا اۋىر قايعى. وسىعان وراي مەملەكەت باسشىسى ق.توقاەۆتىڭ وكىمىمەن ەلىمىزدە جالپىۇلتتىق ازا تۇتۋ كۇنى جاريالاندى. بۇل كۇنى ەلدە ويىن-ساۋىق شارالارى دوعارىلىپ, ءبىر ءسات سەرپىلەتىن, ويلاناتىن, ونداي اۋىر جاعداي, قيىن احۋالعا جول بەرمەۋدى ويلاستىراتىنىمىز انىق. پرەزيدەنت قىرشىن كەتكەن بوزداقتاردىڭ جاقىندارىنا مەملەكەت تاراپىنان ماتەريالدىق, مورالدىق كومەك كورسەتىلەتىندىگىن قاداپ ايتتى.
مۇنداي قيىن احۋال بۇدان بىلاي قايتالانباسا ەكەن دەپ تىلەيىك. جاۋاپسىزدىق تانىتقان, نەمقۇرايلىق جاساعان باسشى-شەندىلەر بۇل ىسكە قاتاڭ جاۋاپ بەرۋلەرى ءتيىس. اپات اۋقىمى تۋرالى قاتە بولجام جاسالعان. ءتىپتى ءورت ءسوندىرۋ كولىكتەرى وتالماي, تەحنيكا دايىن بولماعان, بايلانىس قۇرالدارى, راتسيا سەكىلدى جابدىقتار جەتكىلىكسىز كورىنەدى. ولار ءبىر-بىرىنە سىلتەپ, قاۋىپتىڭ الدىن الماعانى كورىنىپ تۇردى. مۇنداي جاۋاپسىزدىققا جول بەرگەندەر جاۋاپقا تارتىلۋلارى ءتيىس. بۇل – ءبىزدىڭ ەلدىگىمىزگە سىن.
الدا ءۇش اي جاز. ىستىق اپتاپ كۇندەر ءالى دە جالعاسۋى مۇمكىن. توتەنشە جاعدايلار سالاسىنىڭ ماماندارى, ولاردىڭ باسشىلارى بىلتىرعى قوستاناي وڭىرىندەگى الاپات ورتتەن ساباق الماعاندارى كورىنىپ تۇردى. دەمەك, بۇدان بىلاي ءار ايماقتا مۇنداي توتەنشە جاعدايلارعا اركىم دە دايىن بولۋلارى كەرەك.
ەندىگى مىندەت – سول ايماقتاعى قاتەردىڭ بەتىن قايتارۋ, ءورت وشاقتارىن تۇبەگەيلى جويۋ. ەلىمىزدىڭ ءار ايماعىنداعى سالا ماماندارى, اكىمدەر مەن سوعان جاۋاپ بەرەتىن ءاربىر ادام ءوز مىندەتتەرىن مۇلتىكسىز اتقارعاندارى ءجون. ءورت بولجامىن الدىن الا زەرتتەپ, اۋەدەن ءجيى باقىلاپ, اۋا رايىن ءسات سايىن قاداعالاپ, ورماندا بەيسەۋبەت جۇرگەندەردى قاداعالاپ, ساقتىق شارالارىن قاداعالاۋدى كۇشەيتكەندەرى ابزال.
ساياسات بەيىسباي,
فيلوسوفيا, ساياساتتانۋ جانە
ءدىنتانۋ ينستيتۋتىنىڭ باس ساراپشىسى