بۇگىن – دەنيس تەننىڭ تۋعان كۇنى. ەگەر كوزى ءتىرى بولعاندا ەلىمىزدىڭ اتاقتى مانەرلەپ سىرعاناۋشىسى 30 جاسقا تولاتىن ەدى. بىراق اسا دارىندى سپورتشىعا بۇل كۇندى كورۋگە جازباعان ەكەن. ول 2018 جىلدىڭ 19 شىلدەسىندە تاپا تال تۇستە الماتىنىڭ قاق ورتاسىندا قاندىقول قاراقشىلاردىڭ قولىنان قازا تاپتى. ول نەبارى 25 جاستا ەدى.
دەنيس 1993 جىلدىڭ 13 ماۋسىمىندا الماتىدا دۇنيەگە كەلدى. بالا كەزىنەن ول تاەكۆاندو, تەننيس, اكروباتيكا, كاراتە, ءجۇزۋ سەكىلدى سپورتتىڭ سان الۋان تۇرىمەن اينالىستى. سونىمەن قوسا, فورتەپيانو, بي جانە كەسكىندەمە مەكتەبىندە ءتالىم الىپ, بالالار حورىندا ءان ايتتى. التى جاسىنان مانەرلەپ سىرعاناۋعا مىقتاپ دەن قويدى. تەن قىسقا عانا مەرزىم ارالىعىندا وراسان زور تابىسقا قول جەتكىزدى. الماتىداعى ساۋدا ۇيلەرىندە ورنالاسقان مۇز ايدىندارىندا جاتتىعىپ-اق, جاسوسپىرىمدەر مەن جاستار بۋىنى اراسىنداعى جارىستاردا جاسىنداي جارقىلدادى. شەبەرلىگىن شىڭداي ءتۇسۋ ماقساتىمەن ول اناسىمەن بىرگە ماسكەۋگە قونىس اۋداردى. كەيىننەن اقش-قا اتتاندى. ءار جىلدارى اسقان دارىن يەسى نيكولاي موروزوۆ, فرەنك كەرولل, رافاەل ارۋتيۋنيان, ەلەنا بۋيانوۆا, تاتيانا تاراسوۆا سىندى مايتالمانداردىڭ قول استىندا جاتتىقتى.
2005 جىلى تەن العاش رەت قازاقستان چەمپيوناتىندا توپ جارسا, سودان كەيىن تاعى ءتورت رەت جەڭىس تۇعىرىنىڭ ەڭ بيىك ساتىسىنا كوتەرىلدى. 2009 جانە 2012 جىلدارى جاستاردىڭ الەم بىرىنشىلىگىندە ءتورتىنشى ورىنعا تابان تىرەدى. ءوز قاتارلاستارى جانە ەرەسەكتەر اراسىندا ءتۇرلى حالىقارالىق جارىستاردا ولجاعا كەنەلدى. 2010 جىلى 17 جاسىندا ۆانكۋۆەر وليمپياداسىندا باق سىناپ, 11-ورىنعا تۇراقتادى.
ەرەسەكتەر دۋىنداعى دەنيستىڭ ەڭ العاشقى ەلەۋلى تابىسى – 2011 جىلى ەلىمىزدە وتكەن قىسقى ازيا ويىندارىنىڭ التىن مەدالى. 2013 جىلى كانادادا وتكەن الەم چەمپيوناتىندا وتانداسىمىز ءمىنسىز ونەر كورسەتىپ, كۇمىس مەدالدى يەلەندى. ول تەك پاتريك چاننان 1,3 ۇپاي عانا قالىپ قويدى. نەگىزىندە بۇل باسەكەدە تەننىڭ مەرەيى ۇستەم بولعان ەدى. ونى بارشا مامان مويىندادى. بىراق ادىلدىكتى بەلدەن باسقان تورەشىلەر جەڭىستى جەرگىلىكتى سپورتشىعا اپەردى. ونىڭ اقىرى داۋ-دامايعا ۇلاستى. جارىس اياقتالعان بەتتە وسى سپورت ءتۇرىنىڭ جاناشىرلارى حالىقارالىق فەدەراتسياعا «پاتري چان بۇل اتاققا لايىق ەمەس. سول سەبەپتى دە باس جۇلدەنى دەنيس تەنگە تابىس ەتۋ كەرەك» دەگەن تالاپ قويدى. بۇل باستامانى جەر-جاھاننىڭ ميلليونداعان جانكۇيەرلەرى قولدادى. بىراق فەدەراتسيا باسشىلىعى ءوز شەشىمىن وزگەرتكەن جوق. قالاي بولعاندا دا, جەرلەسىمىزدىڭ ەسىمى الەمدىك دودادا جۇلدە العان قازاقستاننىڭ تۇڭعىش مانەرلەپ سىرعاناۋشىسى رەتىندە تاريحتا قالدى.
2014 جىلى سوچيدە الاۋى تۇتانعان وليمپيا ويىندارىندا تەننىڭ اسقان شەبەرلىگىنە تاعى دا ءتانتى بولدىق. شىنى كەرەك, ول كەزدە جەرلەسىمىز جەڭىس تۇعىرىنا كوتەرىلەدى دەپ ەشكىم ويلاعان جوق. ويتكەنى قىسقا باعدارلامادا 84,06 ۇپاي جيناعان دەنيس توعىزىنشى ورىندى قاناعات تۇتتى. ونىڭ ۇستىنە, ءبىر رەت قۇلاپ تۇرعانى بار. ەسەسىنە ەركىن باعدارلامادا ەڭ ءبىر كۇردەلى ەلەمەنتتەردى ءمىنسىز ورىنداعان ول 171,04 ۇپاي ولجالادى. ناتيجەسىندە, جاتتىعۋدىڭ ەكى تۇرىندە 255,10 ۇپايعا يەلىك ەتكەن وتانداسىمىز قولا مەدالدى موينىندا جارقىراتتى. بۇل جارىستىڭ باس جۇلدەسى جاپونيالىق يۋدزۋرۋ حانيۋعا بۇيىرسا, كۇمىس جۇلدەنى كانادالىق پاتريك چان ەنشىلەدى. وسىلايشا, تەن ءوز ەلىنە وليمپيادانىڭ العاشقى مەدالىن سىيلادى.
2015 جىلى شانحايداعى الەم چەمپيوناتىندا يسپانيالىق حاۆەر ەرناندەس پەن جاپونيالىق يۋدزۋرۋ حانيۋدى العا جىبەرگەن دەنيس قولا جۇلدەنى ولجالادى. ودان بولەك, اتاقتى سپورتشى ء«تورت قۇرلىق چەمپيوناتى» مەن دۇنيەجۇزىلىك ۋنيۆەرسيادانىڭ جەڭىمپازى اتانىپ, باسقا دا كوپتەگەن ءدۇبىرلى دودادا دارالاندى. ءومىرىنىڭ سوڭعى كەزەڭىندە ول جاراقاتىنا بايلانىستى بايراقتى باسەكەلەردىڭ ءبىرازىنان شەت قالعان ەدى.
2018 جىلدىڭ 19 شىلدەسىندە تاپا تال تۇستە قاراقشىلار الماتىداعى قۇرمانعازى مەن بايسەيىتوۆا كوشەلەرىنىڭ قيىلىسىندا تۇرعان سپورتشىنىڭ جەكە كولىگىنىڭ اينەگىن ۇرلاپ, ىزدەرىن سۋىتپاق بولدى. سونى بايقاپ قالعان دەنيس ولاردى توقتاتۋعا تىرىسادى. الايدا قوس قانىپەزەر ايگىلى سپورتشىنى پىشاقتاپ تاستادى. وقيعا ورنىندا ول ءبىراز ۋاقىت قانسىراپ جاتىپ قالادى دا, اقىرى اۋرۋحانادا كوز جۇمدى. مىنە, سودان بەرى بەس جىل زىمىراپ وتە شىققان ەكەن...
دەنيستىڭ ەسىمى – ەل ەسىندە. الماتىدا وعان ەسكەرتكىش, ءوزى تۇرعان ۇيگە مەموريال تاقتاسى ورناتىلدى. دەرەكتى فيلم ءتۇسىرىلىپ, استانا مەن الماتى قالالارىندا ساڭلاق سپورتشىنى ەسكە الۋعا ارنالعان حالىقارالىق تۋرنير جىل سايىن ءوتىپ تۇرادى. وعان الەمنىڭ ءار قيىرىنان كەلگەن اتاقتى مانەرلەپ سىرعاناۋشىلار قاتىسادى.