قارۋلى كۇشتەر باس شتابىنىڭ گەواقپاراتتىق قامتاماسىز ەتۋ دەپارتامەنتى قارۋلى كۇشتەر تۇرلەرىنىڭ, اسكەر تەكتەرىنىڭ, وڭىرلىك قولباسشىلىقتاردىڭ, اسكەري بولىمدەر مەن اسكەري وقۋ ورىندارىنىڭ توپوگرافيالىق قىزمەتتەرى باسشىلارىنىڭ وقۋ-ادىستەمەلىك جيىندارىن ۇيىمداستىردى.
ءىس-شارالار «استانا» وڭىرلىك قولباسشىلىعىنىڭ سپاسسك وقۋ ورتالىعىندا جانە دەپارتامەنتكە باعىنىستى 92835 اسكەري بولىمىندە ءوتتى. وعان قاتىسۋشىلارعا قىسقى وقۋ كەزەڭىندەگى توپوگەودەزيالىق قامتاماسىز ەتۋدى تالداۋ ناتيجەلەرى ايتىلىپ, 2023 جىلعى جازعى وقۋ كەزەڭىنە ناقتى مىندەتتەر قويىلدى. توپوگەودەزيالىق اقپاراتتى پايدالانۋدى ۇيىمداستىرۋ جانە اسكەري ماقساتتاعى گەواقپاراتتىق جۇيەلەرگە ارنالعان دارىستەر, سونداي-اق توپوگەودەزيالىق اقپاراتتى ەسەپكە الۋدى, ساقتاۋدى, بەرۋدى جانە پايدالانۋدى ۇيىمداستىرۋ بويىنشا نۇسقاۋلىق-ادىستەمەلىك ساباقتار ءوتتى.
بۇل قىزمەت ءتۇرىنىڭ ماماندارى دوڭگەلەك ۇستەل فورماتىندا اسكەرلەردى جاۋىنگەرلىك قامتاماسىز ەتۋ جۇيەسىندەگى گەوكەڭىستىكتى بارلاۋدىڭ ءرولى مەن ورنىن تالقىلادى. وتىرىسقا قاتىسۋشىلار توپوگەودەزيالىق قامتاماسىز ەتۋدىڭ قايتا وڭدەلگەن باسشىلىق قۇجاتتارى مەن توپوگەودەزيالىق اقپارات الۋدىڭ زاماناۋي قۇرالدارىن قولدانۋ تۋرالى پىكىر الماستى.
پراكتيكالىق ساباقتاردا قىزمەت ماماندارى زىمىران اسكەرلەرى مەن ارتيللەريانىڭ, سونداي-اق اۋە شابۋىلىنا قارسى قورعانىس اسكەرلەرىنىڭ اتىس جانە ۇشىرۋ پوزيتسيالارىن توپوگەودەزيالىق بايلانىستىرۋدى دايىنداۋ مەن جۇرگىزۋ ماسەلەلەرىن پىسىقتادى. دەرەكتەر جوعارى دالدىكتەگى توپوگەودەزيالىق اسپاپتاردىڭ كومەگىمەن الىندى. وفيتسەرلەر گەواقپاراتتىق جۇيەدە ءارتۇرلى مىندەتتەردى شەشۋ بويىنشا پراكتيكالىق جۇمىستاردى ورىندادى.
جيىن اياقتالعاننان كەيىن قاتىسۋشىلار اسكەري توپوگرافيانى ءبىلۋ ءۇشىن تەستىلەۋدەن ءوتتى.