قىزىلوردادا ءتورت جەڭىل اۆتوكولىك سوقتىعىسىپ, بىرەۋىنىڭ الدىڭعى بولىگى جانىپ كەتتى, دەپ حابارلايدى Egemen.kz.
10 ماۋسىمدا ساعات 22:25-تە 101 پۋلتىنە اباي كوشەسىنىڭ بويىندا اۆتوكولىك ورتەنىپ جاتقانى تۋرالى حابارلاما كەلىپ ءتۇستى.
«وقيعا ورنىنا №2 مامانداندىرىلعان ءورت ءسوندىرۋ ءبولىمىنىڭ 2 تەحنيكاسى مەن 7 قىزمەتكەرى شىقتى. ولار 22:29-دا وقيعا ورنىنا جەتتى. كوشە بويىندا 4 اۆتوكولىكتىڭ سوقتىعىسۋى سالدارىنان «Toyota Estima» اۆتوكولىگىنىڭ الدىڭعى قوزعالتقىش بولىگى جانىپ كەتكەنى انىقتالدى. اۆتوكولىككە گاز ورناتىلعانى بەلگىلى بولدى. ءورت 22:45-تە تولىعىمەن ءسوندىرىلدى. ادامدار امان», دەپ حابارلادى وبلىستىق توتەنشە جاعدايلار دەپارتامەنتىنە قاراستى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ ءباسپاسوز حاتشىسى ءاليا ەرەجەپوۆا.