قازىر ادامزات الدىندا تۇرعان مىندەتتەر وتە زور. تەك دەموكراتيالىق تۇرعىدا ەمەس, كليماتتىڭ وزگەرۋى, ازىق-ت ۇلىك قاۋىپسىزدىگى سالاسىندا اتقارىلاتىن جۇمىس وتە اۋقىمدى. ونىڭ ۇستىنە كەيبىر كورشىلەس ەلدەر اراسىندا ىنتىماقتاستىقتىڭ جوقتىعى, التىباقان الاۋىزدىق ءبىرشاما قيىندىق تۋعىزىپ وتىر. وسى ورايدا ءبىز ايماقتىق سەرىكتەستىككە قاتتى كوڭىل ءبولىپ وتىرمىز. ويتكەنى ءبىزدىڭ قۇرلىقتا قاي ەل بولسىن قوسىمشا كومەكتى, قولداۋدى وتە قاجەت ەتەدى. دونورلىق دامۋدىڭ جوقتىعى بۇكىل الەمدى ءبىر قاۋىزعا سىيعىزىپ جىبەرگەن «COVID-19» پاندەمياسى كەزىندە ايقىن بايقالدى.
استانا حالىقارالىق فورۋمىندا ادامزاتقا قاتىستى ءتۇرلى پروبلەمامەن قاتار كەيبىر ەلدەردىڭ جەتىستىكتەرىن دە اتاپ كورسەتكەن دۇرىس. ماسەلەن, قازاقستان تسيفرلاندىرۋ بويىنشا كەرەمەت پروگرەسكە قول جەتكىزگەنىن ايتقىم كەلەدى.
قازىرگى ەكونوميكانىڭ وركەندەۋىنە اسەر ەتەتىن ماڭىزدى فاكتورلاردىڭ ءبىرى تسيفرلىق بايلانىس ەكەنى انىق. بۇگىندە ادامدار تسيفرلىق تەحنولوگيانىڭ ارقاسىندا قاشىقتان جۇمىس ىستەي الدى. بالالار ۇيدە وتىرىپ-اق ساباق وقي الادى. سونداي-اق, ۇيدە ءجۇرىپ دارىگەردەن اقىل-كەڭەس الۋعا مۇمكىندىك بار. دەگەنمەن, ءبىر وكىنىشتىسى, تسيفرلىق تەحنولوگيالارعا قولجەتىمدىلىك ينتەرنەتى بارلار مەن ينتەرنەتى جوقتار اراسىن الىستاتىپ جىبەردى.
قازاق ەلىنىڭ تسيفرلاندىرۋدا عاجايىپ پروگرەسكە جەتىپ, ايماقتا ينتەرنەتتى ەنۋ كورسەتكىشتەرى ەڭ جوعارى ەكەنىن اتاپ ايتقىم كەلەدى. وندا ينتەرنەتكە قوسىلۋدىڭ سالىستىرمالى تۇردە تومەن قۇنى جانە تسيفرلىق ساۋاتتىلىقتىڭ جوعارىلاۋى نەگىزگى فاكتور بولىپ وتىر.
ينتەرنەتكە قولجەتىمدىلىكتىڭ جاقسى دەڭگەيى ۇكىمەتكە مەملەكەتتىك قىزمەتتەردىڭ كوپشىلىگىن تسيفرلاندىرۋعا مۇمكىندىك بەرگەن. وعان قوسا, 2025 جىلعا دەيىن مەملەكەتتىك قىزمەتتەردىڭ 100 پايىزىن «ە-ۇكىمەت» موبيلدىك قوسىمشاسىمەن قامتۋ جوسپارلانعانىنا وتە قۋانىپ وتىرمىز. قازاقستان وسى پروگرەسكە سۇيەنە وتىرىپ, ەكونوميكا سالاسىن تسيفرلىق ترانسفورماتسيالاۋدا. تەحنولوگيانى پايدالانۋدى كەڭەيتە الادى. سونداي-اق, تسيفرلىق ەكونوميكانى دامىتۋداعى سەرپىلىس پەن الداعى ءتورتىنشى ونەركاسىپتىك رەۆوليۋتسياعا دايىندىق جۇمىسىن جالعاستىرا الادى.
دەگەنمەن, بۇل جەردە مۇمكىندىكتەر دە, سىن-قاتەرلەر دە بارشىلىق. ەكى جىل بۇرىن قازاقستانداعى يننوۆاتسيانىڭ جاي-كۇيىنە جۇرگىزگەن زەرتتەۋىمىز وتە قىزىقتى كەزەڭدەردى انىقتادى.
الدىمەن, تۇتاستاي العاندا كاسىپورىنداردى تسيفرلاندىرۋ پروتسەسىنە باسشىلىقتى قامتاماسىز ەتۋدە ۇكىمەتكە شەشۋشى ءرول بەرىلەدى. مەنىڭ بىلۋىمشە, قازىر 4 مينيسترلىك ەلەكتر, سۋ جانە جىلىتۋ ءۇشىن اقىلدى ەسەپتەگىشتەردى ەنگىزىپ جاتىر. وسىلاردى قاپەرگە الا وتىرىپ, ۇلتتىق ستاندارتتار ازىرلەنىپ جاتقان كەزدە «اقىلدى» ەسەپتەگىشتەردى ستاندارتتاۋدى ۇيلەستىرۋ مۇمكىندىگى تۋدى.
تاعى ءبىر مىندەت – ەنەرگەتيكالىق سەكتوردا تسيفرلىق تەحنولوگيالاردى قولدانۋدى كەڭەيتۋگە, ۇكىمەتتىڭ ەلەكتر جەلىلەرىندەگى قۋات شىعىنىن ازايتۋعا كۇش سالۋعا جانە 2060 جىلعا دەيىنگى دەكاربونيزاتسيا ستراتەگياسىنىڭ ءورشىل ماقساتتارىنا جەتۋگە قاتىستى. ەگەر ينتەللەكتۋالدى جانە ەنەرگەتيكالىق جۇيەنى, بىلايشا ايتقاندا «اقىلدى» ەلەكتر جەلىلەرىن قۇرۋدا كوشباسشىلىق كورسەتىلمەسە, جوعارىدا اتالعان ماقساتتارعا قاتەر ءتونۋى مۇمكىن.
قازاقستاننىڭ باسەكەگە قابىلەتتى, ارتاراپتاندىرىلعان, عىلىممەن قامتىلعان ەكونوميكاعا كوشۋىن قولداۋ ءۇشىن عىلىمي زەرتتەۋلەر مەن ازىرلەمەلەرگە جاردەمدەسۋدە ۇكىمەتتىڭ شەشۋشى ءرول اتقاراتىنىن ايرىقشا ايتقىم كەلەدى. بۇعان عىلىمي زەرتتەۋ جانە تاجىريبەلىك-كونسترۋكتورلىق جۇمىستارعا بولىنەتىن بيۋدجەتتىڭ تۇراقتى ءوسۋى ىقپال ەتەدى.
ازيا دامۋ بانكى قازاقستاننىڭ دامۋ سالاسىنداعى سەنىمدى سەرىكتەسى رەتىندە يننوۆاتسيالاردى ەنگىزۋگە ىقپال ەتەتىن جاعدايدى ودان ءارى جاقسارتۋ بويىنشا جۇمىس ىستەۋگە دايىن. وسىلايشا ءبىز قازاقستانعا تسيفرلىق الشاقتىقتى قىسقارتۋعا, ەكونوميكالىق دامۋ جولىندا كەيبىر كەدەرگىلەردى ەڭسەرۋگە جانە ەشكىمنىڭ ارتتا قالماۋىن قامتاماسىز ەتۋگە كومەك قولىن سوزامىز.
ماساتسۋگۋ اساكاۆا,
ازيا دامۋ بانكىنىڭ پرەزيدەنتى