بۇگىنگى جاھاندىق جاعداي بۇرىنعىدان مۇلدە باسقاشا. بىراق بۇرىنعى الەمدىك ءتارتىپ پەن تاجىريبەنى بىردەن قيراتۋدىڭ قاجەتى جوق. دۇنيەجۇزىلىك بانك, دۇنيەجۇزىلىك ۆاليۋتا قورى بار. بۇلار بولۋى كەرەك.
جاھان قۇقىق ۇستەمدىگىنە نەگىزدەلەدى دەگەنگە سەنەمىن. بۇدان باسقا بالاما جول كورىپ تۇرعان جوقپىن. حالىقارالىق قۇقىق دەگەنگە باسقا ەلدەردىڭ تاۋەلسىزدىگىن قۇرمەتتەۋ دە جاتادى. اۋماقتىڭ قاۋىپسىزدىگى جانە كەلىسسوز تالقىلاۋ ءۇشىن قاجەت. بۇل – الەمدىك بەيبىتشىلىكتىڭ ءبىر بەلگىسى. ءبىز ارقاشان اشىق ديالوگتى قولداۋىمىز كەرەك. جاۋدىڭ وزىمەن ديالوگ قۇرىلۋعا ءتيىس. ديالوگ – حالىقارالىق قۇقىقتاردىڭ نەگىزى.
مۇنىڭ ءبارى بۇۇ شەڭبەرىندە كەلىسكەن قاعيداتتار بويىنشا جۇزەگە اسۋعا ءتيىس. بۇل – ەۋرووداقتىڭ كوزقاراسى ەمەس, مەنىڭ جەكە ازاماتتىق پىكىرىم. سانكتسيالار تۋرالى دا ايتىلىپ جاتىر. مەن ءوزىمنىڭ شىنايى ويىمدى ايتقىم كەلەدى. ەۋرووداقتا جۇمىس ىستەپ جۇرگەن كەزدە رەسەي مەن قىرىم ماسەلەسى تالقىعا ءتۇستى. سودان باستاپ ەۋرووداقتىڭ قاۋىپسىزدىك كەڭەس مۇشەلەرى رەسەيگە سانكتسيا سالۋ ماسەلەسىن كوتەردى. الايدا مەن سانكتسيالاردىڭ ءتيىمدى بولاتىنىنا سەنبەيمىن. ەگەر سانكتسيالار سونداي اسەرلى بولسا, سولتۇستىك كورەيا مەن يران يسلام رەسپۋبليكاسى يادرولىق قارۋدان باس تارتاتىن ەدى.
سوعىس, اگرەسسيا جاقسى نارسە ەمەس, بىراق سانكتسيا دا جاقسى ەمەس. ونىڭ سالماعى ەكونوميكاعا تۇسەدى. مىسالى, ەۋروپانىڭ ءبىر ەلى اگرەسسور بولسا, باسقا بەيبىت ەلدەرگە ونىڭ سالقىنى ءتيىپ, زارداپ شەگەدى. ماسەلەن, بۇرىن رەسەي ەۋروپاعا تاسىمالدايتىن گازدىڭ ۇلەس سالماعى 60% ەدى, قازىر ءنول. بۇل قاراپايىم حالىق ءۇشىن وتە قيىن جاعداي. بۇل رەتتە قازاقستان تۋرالى دا ايتۋعا بولادى. ەۋروپا مەن قازاقستان اراسىنداعى ساۋدا-ساتىقتىڭ ۇلەسى 40% بولسا, قازىر بۇل تومەندەپ كەتتى. سوندىقتان قازىرگى سانكتسيالار قازاقستان ءۇشىن ادىلەتسىز. ءبىز دە بۇل سالداردى سەزىنەمىز. قاراپ تۇرساڭىز بۇل سانكتسياعا ەۋروپا مەن قازاقستانىڭ كىناسى جوق. سوندىقتان حالىقارالىق ديالوگتى كۇشەيتۋىمىز قاجەت.
جوزە مانۋەل بارروزۋ,
ەۋروپالىق كوميسسيانىڭ
بۇرىنعى پرەزيدەنتى جانە
Goldman Sachs International اتقارۋشى توراعاسى