بۇگىن تەمىرتاۋدا پارلامەنت ءماجىلىسىنىڭ ەكولوگيا جانە تابيعاتتى پايدالانۋ ماسەلەلەرى جونىندەگى كوميتەتىنىڭ كوشپەلى وتىرىسى ءوتتى. وتىرىسقا مينيسترلىكتەر مەن ۆەدومستۆولاردىڭ وكىلدەرى, قاراعاندى وبلىسى مەن تەمىرتاۋ قالاسىنىڭ جانە وبلىستىڭ اۋماقتىق دەپارتامەنتتەرى مەن باسقارمالارىنىڭ باسشىلارى قاتىستى.
وتىرىستى ءماجىلىستىڭ ەكولوگيا جانە تابيعاتتى پايدالانۋ ماسەلەلەرى جونىندەگى كوميتەتىنىڭ توراعاسى ەدىل جاڭبىرشين اشتى. وتىرىسقا «ارسەلورميتتال تەمىرتاۋ» كومپانياسىنىڭ مەنەدجمەنتى – تەحنيكالىق ديرەكتور ك.تسيمبال, باس ديرەكتوردىڭ قاۋىپسىزدىك تەحنيكاسى ماسەلەلەرى جونىندەگى ورىنباسارى ۆ. ۆوروپاەۆ, ەكولوگيا جونىندەگى ديرەكتور م. قۋانتاەۆا جانە باسقالار قاتىستى.
جيىن بارىسىندا «ارسەلورميتتال تەمىرتاۋ» اق-نىڭ ەكولوگيالىق, ەنەرگەتيكالىق جانە ونەركاسىپتىك قاۋىپسىزدىك ماسەلەلەرى قارالدى.
- ءبىزدىڭ جوسپارىمىز – 2030 جىلعا قاراي شىعارىندىلاردى 18 پايىز ازايتۋعا قول جەتكىزۋ, مۇندا نەگىزگى ءرولدى ءوندىرىستى جانە دومنا ۇدەرىسىنىڭ وتىن شىعىنىن وڭتايلاندىرۋ, جەو-نى ارالاس جانە گاز تارىزدەس وتىنعا كوشىرۋ, جانۋ ۇدەرىسىن جاقسارتۋ اتقارادى. قازىرگى ءىرى جوبالارىمىز – ەۋروپالىق ەكولوگيا نورمالارىنا سايكەس كەلەتىن جاڭا كوكس باتارەيالارىن سالۋ. جاڭا باتارەيالار ورناتىلعاننان كەيىن ەسكىلەرى تولىق توقتاعانعا دەيىن وندىرىستەن بىرتىندەپ شىعارىلادى. ءبىز كوكس گازىن تازارتاتىن جاڭا تسەح سالىپ جاتىرمىز, ءبىرىنشى قايتا وڭدەۋ تسەحتارىندا گازدى تازارتۋ جۇيەلەرىن جاڭعىرتۋ جۇمىستارىن جۇرگىزۋدەمىز, №7 جاڭا قازاندىقتى پايدالانۋعا بەرۋ جوباسى اياقتالۋعا جاقىن, - دەدى «ارسەلورميتتال تەمىرتاۋ» اق تەحنيكالىق ديرەكتورى كونستانتين تسيمبال.
كوشپەلى وتىرىس اياسىندا ماجىلىسمەندەر مەتاللۋرگيا كومبيناتىنا باردى. ولار اگلووندىرىستى, № 5 اگلوماشيناداعى ەلەكتر سۇزگىلەرىن, جەو-نى, قازاندىق تسەحىن, ءتۇتىن قۇبىرىن, №3 قالدىق قويماسىن جانە كۇلجيناعىشتى, سونداي-اق قوج وڭدەۋ ۋچاسكەسىن ارالاپ كوردى.كوشپەلى وتىرىس بارىسىندا ماجىلىسمەندەر مەن كەزدەسۋگە قاتىسۋشىلار كوتەرگەن ماسەلەلەر كەڭىنەن تالقىلاندى. باسىم ماسەلەلەر – ەنەرگيامەن جابدىقتاۋ, جەو قىزمەتى, ەكولوگيالىق اسپەكتىلەر جۇمىس بارىسىندا قارالۋ ۇستىندە.
- ءبىزدىڭ پەرسپەكتيۆالى جوبالارىمىز –ەلەكترفيلترلەردى ورناتۋ جانە اگلودومەن وندىرىسىندە گيبريدتىلەرگە دەيىن جاڭعىرتۋ, كونۆەرتەرلىك گازدى كادەگە جاراتۋ جوباسى, جەو قازاندىقتارىن وتىن تۇتىنۋدىڭ ارالاس تۇرىنە اۋىستىرۋ, جەل گەنەراتورلارىن ورناتۋ. تەحنولوگيالىق ۇدەرىستى جاقسارتۋ بويىنشا – بايىتۋ فابريكالارىن ىسكە قوسۋ, جانۋ پروتسەسىن جاقسارتۋ جانە سۋ رەسۋرستارى مەن ەلەكتر ەنەرگياسىن تۇتىنۋدى ازايتۋ.
زاڭناما تالاپتارىنا سايكەس شىعارىندىلاردى ۇنەمى باقىلاۋ ءۇشىن كومپانيادا قازىردىڭ وزىندە ونلاين مونيتورينگتەۋ جۇيەلەرى بار جانە نەگىزگى كوزدەردە لاستاۋشى زاتتاردىڭ جينالۋىن باقىلاۋ ءۇشىن جاڭا جۇيەلەردى ورناتۋ ۇستىندەمىز. ءبىز دەرەكتەردى تىكەلەي ەكولوگيا دەپارتامەنتىنە تەستىلەۋگە بەرۋ ءۇشىن مونيتورينگ جۇيەلەرىن قوسۋدىڭ قاناتقاقتى جوباسىنا قاتىسامىز, - دەپ قورىتىندىلادى تەحنيكالىق ديرەكتور.