سىبايلاس جەمقورلىققا قارسى قىزمەت جاسىرىن ءىس-شارالار كەشەنىنىڭ ناتيجەلەرى بويىنشا ەكس-ۆيتسە-مينيستر ن.ب. التاەۆتى اسا اۋىر جەمقورلىق قىلمىس جاسادى دەگەن كۇدىك بويىنشا ۇستادى, دەپ حابارلايدى Egemen.kz.
«نۇرجان التاەۆ ەڭبەك جانە الەۋمەتتىك قورعاۋ ۆيتسە-ءمينيسترى, كەيىننەن قر پارلامەنتى ءماجىلىسىنىڭ دەپۋتاتى رەتىندە جۇيەلى نەگىزدە «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ا.ي. مىرزاحمەتوۆتەن اسا ءىرى مولشەردە پارا الدى دەگەن كۇدىككە ءىلىندى», دەپ حابارلادى سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى.
ۆەدومستۆو مالىمەتىنشە, 2018-2020 جىلدار كەزەڭىندە جاۋاپتى مەملەكەتتىك لاۋازىمداردى اتقارا وتىرىپ, ول ا.ي. مىرزاحمەتوۆتىڭ مۇددەسى ءۇشىن ارەكەت ەتىپ, ونىڭ ۇيىمىنا مەملەكەتتىك تاپسىرىستاردى الۋىنا ىقپال ەتىپ, جالپى قامقورشىلىق كورسەتكەن.
قازىر التاەۆ استانا قالاسى پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى. تەرگەۋ امالدارى جالعاسىپ جاتىر.
قر قپك 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.
«كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى», دەپ جازدى اگەنتتىكتەن.