اتىراۋ قالالىق پەرزەنتحاناسىندا 3 جاسقا دەيىنگى ەرەكشە بالالاردى وڭالتاتىن ورتالىق اشىلدى. «قامقورلىق قورى» قوعامدىق قورىنىڭ ديرەكتورى ارايلىم ەركىنوۆانىڭ ايتۋىنشا, ورتالىقتا نەيرو-ورتوپەديالىق سىرقاتى بار بالالارعا كەشەندى وڭالتۋ جۇرگىزىلەدى.
وبلىس اكىمى سەرىك شاپكەنوۆتىڭ پىكىرىنشە, قوعامدا ەرەكشە بالالاردىڭ ساۋلىعىن نىعايتۋعا ايرىقشا كوڭىل ءبولىنىپ وتىر. سول سەبەپتەن, جاڭا ورتالىقتا سىرقات بالالاردى وڭالتۋ ءۇشىن جاڭا ادىستەر قولدانىلادى. بۇل اۋرۋدى ەرتە انىقتاۋعا, اسىرەسە ەرەكشە بالالاردى ومىرگە بەيىمدەۋگە وڭ ىقپالىن تيگىزەدى.
«قامقورلىق» اتاۋى بەرىلگەن وڭالتۋ ورتالىعى مەديتسينالىق, الەۋمەتتىك جانە پەداگوگيكالىق باعىتتا جۇمىس ىستەيدى. ورتالىققا شىلدە ايىنان باستاپ تسەرەبرالدى سال اۋرۋىنا شالدىققان, شالا تۋ, داۋن سيندرومى, دامۋىندا تۋا بىتكەن اقاۋى, بۇلشىقەت ديستروفياسى, جۇيكە جۇيەسى بۇزىلعان جانە باسقا دا سىرقاتى بار بالالار قابىلدانادى.
«مۇندا ەمدەلەتىن ءار ءسابيدى وڭالتۋدىڭ جەكە جوسپارى جاسالادى. وڭالتۋدى نەۆروپاتولوگتەر, وڭالتۋ دارىگەرلەرى مەن پەدياترلار, ەمدىك دەنەشىنىقتىرۋ نۇسقاۋشىلارى, كاسىپتىك تەراپەۆتەر مەن لوگوپەدتەر جۇزەگە اسىرادى. ورتالىققا بالالاردى وڭالتۋ ءۇشىن وزىق تەحنولوگيالار ۇسىنىلىپ وتىر. بۇل – مەحانوتەراپيا جانە ەمدىك دەنە شىنىقتىرۋ زالى, سەنسورلىق بولمە, يممەرسيالىق ۆاننا, شۋنگيت جانە تۇز بولمەسى. بۇعان قوسىمشا ەستۋ جانە باس ميىن زەرتتەۋگە ارنالعان دياگنوستيكالىق جابدىقتار ورناتىلدى. مۇنداي جابدىقتار دامۋدىڭ العاشقى كەزەڭىندەگى بۇزۋشىلىقتاردى انىقتاۋعا, سوعان سايكەس وڭالتۋ باعىتىن ازىرلەۋگە مۇمكىندىك بەرەدى», دەيدى ارايلىم ەركىنوۆا.
اتىراۋ وبلىسى