پرەزيدەنت قاسىم-جومارت توقاەۆ استانا حالىقارالىق فورۋمىنا قاتىسۋعا كەلگەنى ءۇشىن حەلگا شميدكە العىس ايتىپ, اتالعان فورۋم باتىس پەن شىعىس اراسىنداعى بايلانىستاردى نىعايتۋعا ىقپال ەتەتىن جاڭا الاڭ ەكەنىنە نازار اۋداردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ء«سىز باستاپ كەلگەن ەقىۇ دەلەگاتسياسى وسى فورۋمدا كوپتەگەن تۇيتكىلدى ماسەلەلەردىڭ وڭ شەشىلۋىنە ەلەۋلى ۇلەس قوسادى دەپ سانايمىن. وكىنىشكە قاراي, قازىر الەمدە ونداي پروبلەمالار بار. ەقىۇ-مەن ىنتىماقتاستىقتى نىعايتۋ قازاقستان ءۇشىن باسىم باعىت سانالادى. ءبىزدى ۇيىمنىڭ ءرولى تۋرالى پىكىرلەر قايشىلىعى الاڭداتادى. 2010 جىلى استانادا وتكەن سامميتتەن كەيىن مينيستەرلەر دەڭگەيىندە دە, باسقا فورماتتا دا بىردە-ءبىر رەسمي قۇجات قابىلدانعان جوق. ارينە, بۇل – الاڭداتارلىق جايت. ءبىز ۇيىم اياسىنداعى بايلانىستاردى نىعايتۋ قاجەت ەكەنىنە بۇرىنعىداي كامىل سەنەمىز», دەدى قاسىم-جومارت توقاەۆ.
پرەزيدەنتتىڭ ايتۋىنشا, قازاقستان – ەقىۇ-نىڭ بەلسەندى مۇشەسى. پرەزيدەنت ەلىمىزدىڭ ەقىۇ-مەن اراداعى ءوزارا ءتيىمدى سەرىكتەستىك جانە اشىقتىق رۋحىنداعى تىعىز قارىم-قاتىناسىن ودان ءارى نىعايتۋعا جانە وسى ۇيىمنىڭ باس حاتشىسى حەلگا شميدكە جان-جاقتى قولداۋ كورسەتۋگە دايىن ەكەنىن مالىمدەدى.
حەلگا شميد ءوز كەزەگىندە استانا حالىقارالىق فورۋمىنا قاتىسۋعا شاقىرعانى ءۇشىن قاسىم-جومارت توقاەۆقا العىس ايتتى.
«دۇرىس ايتاسىز. قازىر كۇردەلى كەزەڭ دەپ ويلايمىن. قيىندىقتارعا قاراماستان, ەقىۇ بىرەگەي ديالوگ الاڭى رەتىندە قىزمەتىن جالعاستىرا بەرەدى. سونداي-اق قازاقستاننىڭ ەۋروپاداعى قاۋىپسىزدىك جانە ىنتىماقتاستىق ۇيىمىنداعى بەلسەندى ءرولىن وڭ باعالايمىن. ءسىز استانا ءسامميتى تۋرالى ايتىپ ءوتتىڭىز. مەن ول جيىنعا قاتىستىم. دۇرىس ايتاسىز, بۇل سوڭعى سامميت بولدى. استانا دەكلاراتسياسى, شىن مانىندە, ۇيىمنىڭ قىزمەتىن رەتتەيتىن ماڭىزدى قۇجاتتاردىڭ ءبىرى. مەن استانا فورۋمىندا سويلەيتىن ءسوزىڭىزدى اسىعا كۇتەمىن. قازىر مامىلەگە كەلۋ ءۇشىن ءبىر-ءبىرىمىزدىڭ پىكىرىمىزگە قۇلاق اسۋ وتە ماڭىزدى دەپ ويلايمىن. ەقىۇ-نىڭ نەگىزى مىندەتى دە – وسى», دەدى ەقىۇ باس حاتشىسى.
كەزدەسۋدە قازاقستان مەن ەقىۇ اراسىنداعى ىنتىماقتاستىقتىڭ قازىرگى جاي-كۇيى مەن ونىڭ دامۋ پەرسپەكتيۆالارى تالقىلاندى. سونداي-اق ايماقتىق جانە جاھاندىق كۇن تارتىبىندەگى وزەكتى ماسەلەلەر قاراستىرىلدى.