حالىقارالىق ۆولونتەرلەر فورۋمى

سپيكەردىڭ ايتۋىنشا, ەلىمىزدە ۆولونتەرلىك قىزمەتكە قاتىساتىن ازامات­تاردىڭ سانى كۇننەن-كۇنگە ۇلعايىپ كەلەدى. سوڭعى ءۇش جىلدىڭ وزىندە ۆولون­تەرلىك ۇيىمداردىڭ سانى ءۇش ەسەگە وس­كەن. اتاپ ايتقاندا, 2019 جىلى ۆولون­تەرلىك ۇيىمداردىڭ سانى 224 بولسا, 2023 جىلى ولاردىڭ سانى 680-گە جۋىقتادى. سونداي-اق ۆولونتەرلەردىڭ سانى دا ءتورت ەسەگە ءوسىپ, قازىر 200 مىڭنان اسىپ جىعىلعان.

«وتكەن جىلى ۆولونتەرلىك قىزمەت جونىندەگى زاڭعا وزگەرىستەر ەنگىزىلدى. ول جەردە ەرىكتىلەرگە وقۋعا ءتۇسۋ, جۇمىسقا ورنالاسۋ كەزىندە بىرقاتار پرەفەرەنتسيا بەرىلدى», دەدى ۆيتسە-مينيستر. قازىرگى تاڭدا ۆولونتەرلىك ينفرا­قۇرىلىمدى دامىتۋ باعىتىندا رەسپۋبليكا بويىنشا 20 وڭىرلىك فرونت-كەڭسە جۇمىس ىستەيدى. ولار جىل سايىن 113 مىڭنان استام ۆولونتەردىڭ قاتىسۋىمەن 6 مىڭنان استام ءىس-شارا وتكىزدى.

حالىقارالىق ۆولونتەرلىكتى دامىتۋ سالاسىندا دا بىرقاتار شارا قولعا الىندى. ونىڭ ىشىندە بۇۇ ەرىكتىلەر باعدارلاماسىمەن بىرلەسىپ قازاقستان ۇكىمەتىنىڭ قارجىلاندىرۋىمەن 7 ادام وتكەن جىلى دا, وسى جىلى دا شەتەلدە ەرىكتى رەتىندە جۇمىس ىستەيدى. الەمدە 16 ەل عانا وسىنداي مۇمكىندىككە يە, سولاردىڭ ىشىنە قازاقستان دا كىرىپ وتىر, دەدى اقدم وكىلى.

«بيىل 20-21 ماۋسىمدا استانا قالاسىندا حالىقارالىق ۆولونتەرلەر فورۋمىن وتكىزۋدى جوسپارلاپ وتىرمىز. فورۋمنىڭ نەگىزگى ماقساتى – ۆولونتەرلىك قوزعالىستى دامىتۋ جانە قولداۋ سالاسىنداعى قازاقستاندىق تاجىريبەنى حالىقارالىق دەڭگەيدە پاش ەتۋ, قازاقستاننىڭ ورتالىق ازيا ەلدەرى اراسىندا ەرىكتىلەر باعىتىنداعى كوشباسشىسى ەكەنىن كورسەتۋ. بۇل فورۋمعا بارلىق قازاقستاندىق ۆولونتەرلەر, نەگىزىنەن ۇلتتىق ۆولونتەرلەر جەلىسى دە بارىنشا اتسالىسىپ وتىر», دەدى د.قادىروۆ.

فورۋمعا الەمنىڭ 34 ەلىنەن 140-تان اسا ادام قاتىسپاق. ەلىمىزدىڭ بارلىق وڭىرىنەن ۆولونتەرلىك جۇمىستارعا بەلسەندى قاتىسىپ جۇرگەن ەرىكتىلەردى قوسقاندا, جالپى سانى 400-دەن استام ادام فورۋم قوناعى بولادى. «جيىن بارىسىندا ۆولونتەرلىك قىزمەتتىڭ ءتۇرلى باعىتتارى بويىنشا 10 سەسسيا وتەدى», دەپ ءسوزىن تۇيىندەدى دانيار قادىروۆ.