اتىراۋ قالاسىندا تۇراتىن ەرلى-زايىپتى سلادكوۆتار اۋلاداعى باقشاسىنان كۇلگىن ءتۇستى كىرپى تاۋىپ الدى. الەۋمەتتىك جەلىگە جۇكتەلگەن كىرپىنىڭ ءتۇسى جۇرتشىلىقتىڭ قىزىعۋشىلىعىن تۋدىردى.
كىرپىنىڭ وزگەشە ءتۇسى مامانداردى دا تاڭداندىرىپ وتىر. اتىراۋ قالالىق وباعا قارسى ستانساسى ەپيزووتولوگيا جانە اسا قاۋىپتى ينفەكتسيالاردىڭ الدىن الۋ زەرتحاناسىنىڭ بۇرىنعى مەڭگەرۋشىسى فەدور ساراەۆتىڭ ايتۋىنشا, بۇرىن كىرپىنىڭ مۇنداي ءتۇسى كەزدەسپەگەن.
– جاڭا تۋعان كىرپىنىڭ باسىنداعى تىكەنى عانا اقشىل ءتۇستى بولۋشى ەدى. باستاپقىدا كىرپىنىڭ تىكەندەرى وتە جۇمساق, ءجۇن ءتارىزدى بولاتىنىن بايقاپ ءجۇرمىز. ويتكەنى بۇل – تابيعاتتىڭ قۇبىلىسى. كىرپىنىڭ تىكەنەگى اناسىنا زاقىم كەلتىرمەۋى قاجەت. تىكەنەك ۋاقىت وتە كەلە سۇر تۇسكە اينالادى. بىراق مەنىڭ تاجىريبەمدە كۇلگىن ءتۇستى كىرپى كەزدەسكەن جوق, – دەيدى فەدور ساراەۆ.
ەرلى-زايىپتىلار كىشكەنتاي كىرپىگە سۋ بەرگەن. شولدەگەن كىرپى سۋدى ءىشىپ الىپ, ءوز جونىمەن كەتىپ قالعان.
اتىراۋ وبلىسى