5 ماۋسىمدا وتكەن بريفينگتە سىرتقى ىستەر مينيسترلىگىنىڭ رەسمي وكىلى ايبەك سمادياروۆ تايلاندتىڭ پحۋكەت قالاسىندا قايتىس بولعان قازاقستان ازاماتىنا قاتىستى پىكىر ءبىلدىردى. ونىڭ ايتۋىنشا, بۇل 7 كۇن ىشىندە بولعان ەكىنشى جاعداي, دەپ حابارلايدى Egemen.kz.
ايبەك سمادياروۆ قازاقستان ازاماتى ارتۋر ىسقاقوۆتىڭ جۇرەگى توقتاعانىن اتاپ ءوتتى. شومىلۋعا شەكتەۋلەر مەن تىيىم سالىنعانىنا قاراماستان, ول ءوزىنىڭ قالىڭدىعىمەن بىرگە سۋعا كىرگەن.
«ارتۋر ىسقاقوۆ اۋرۋحاناعا جەتكىزىلدى, كوماعا ءتۇسىپ, اۋىر جاعدايدا بولدى. وقيعا تۋرالى ەستىگەن اناسى مەن اكەسى قالاعا دەرەۋ ۇشىپ باردى. سول جەردە دارىگەرلەرمەن كەلىسسوز جۇرگىزىلدى. تاي دارىگەرلەرى ەر ادامنىڭ ءمايىتىن تاسىمالداۋعا قارسى بولعان. الايدا ەكى تاراپ مامىلەگە كەلىپ, بۇل ماسەلە شەشىمىن تاپتى», دەدى ايبەك سمادياروۆ.
ونىڭ ايتۋىنشا, بۇل سوڭعى اپتاداعى ەكىنشى جاعداي.
«3 ماۋسىمدا ءدال سول جاعالاۋدا ءبىزدىڭ تاعى ءبىر جەرلەسىمىز قايتىس بولدى. بارلىق تىيىمدارعا قاراماستان, ول دا سۋعا كىرىپ, ۇلكەن تولقىنداردىڭ استىندا قالدى. جاقىن ارادا ولاردىڭ مايىتتەرى قازاقستانعا جەتكىزىلەدى», دەپ قوستى ءسىم وكىلى.
تاي پوليتسياسى مەن قۇتقارۋشىلارىنىڭ ايتۋىنشا, مۇنداي قايعىلى جاعدايلارعا نەگىزىنەن تمد ەلدەرىنەن كەلگەن تۋريستەر تاپ بولادى.
ايتا كەتسەك, 24 جاستاعى ارتۋر ىسقاقوۆ تايلاندتاعى كۋرورتتاردىڭ بىرىندە سۋعا باتىپ, قايتىس بولدى.
ناقتىلانعانداي, ارتۋر ىسقاقوۆ سۋعا ءوزىنىڭ قالىڭدىعىمەن بىرگە كىرگەن. شومىلۋ كەزىندە تولقىندار كوتەرىلىپ, قىز باتا باستاعان. سول كەزدە قالىڭدىعىن سۋدان شىعارىپ ۇلگەرگەن ارتۋردىڭ ءوزى باتىپ كەتكەن.