ەلەۋلى ەڭبەك – وقىرمان ولجاسى

اتالعان جيناقتى شىعارۋعا باستاماشى بولىپ, دەمەۋشىلىك ەتكەن – ىسكەر ازامات نۇركەن اسانوۆ. شارانىڭ ەرەكشەلىگى, ءماشھۇر-ءجۇسىپ كوپەي ۇلى بەس تومدىعى 100 مەكتەپ پەن 100 جوعارى وقۋ ورنىنا تەگىن تاراتىلادى. بۇل – ماتىندىك تۇرعىدان ماماندار پىسىقتاعان باسىلىم. شاراعا مەملەكەتتىك كەڭەسشى ەرلان قارين, اقپارات جانە قوعامدىق دامۋ ءمينيسترى دارحان قىدىرالى قۇتتىقتاۋ جولدادى.   

بىردەن ايتايىق, بۇل بەس كىتاپ اقىننىڭ تولىق شىعارمالارىنىڭ جيناعى ەمەس, تاڭدامالىسى عانا. قۇراستىرۋشىلار الدا ءماشھۇر-ءجۇسىپ مۇرالارىنىڭ تولىق اكادەميالىق جيناعىن شىعارۋ ءىسى تۇرعانىن ايتادى. بىراق مىنا بەس تومنىڭ ءوزى از ەڭبەك ەمەس. كوبىنە ولەڭدەرى مەن داستاندارى, عيبراتتى دۇنيەلەرى ءھام ايتىستارى توپتاستىرىلعان. بۇرىنعى باسىلىمداردا كەتكەن كەمشىلىكتەر­دىڭ كوبى تولىقتىرىلعان, تۇزەتىلگەن. تۇسىنىكتەر بەرىلگەن. سونىسىمەن قۇندى, سونىسىمەن ساپالى جيناقتاردىڭ قايتا باسىلۋىنا مۇرىندىق بولىپ, دەمەۋشىلىك ەتكەن «سەنىمەن بولاشاق» رەسپۋبليكالىق اتا-انالار قوعامدىق بىرلەستىگىنىڭ قۇرىلتايشىسى, ۇلت جاناشىرى نۇركەن اسانوۆ: ء«بىز بالالارىمىزدى ۇمىتۋعا اينالدىق. بالاباقشا, مەكتەپكە بەرىپ تاستادىق, سەنىپ تاپسىردىق. پاندەميا كەزىندە بالاممەن سويلەسە كەلە, ءماشھۇر بابامىزدىڭ 20 توم مۇراسىن پاراقتاي كەلە, وسىنداي ويعا كەلدىم. ۇل-قىزى مەن اتا-اناسى بولىپ, بوساعاسى مەن ءتورىن الاستاپ, جامان ادەتتەن ارىلمايىنشا, التىن زامان كەلمەسى انىق. قاسيەتتى بولاشاقتى بىرگە جاساۋعا ۇيىتقى بولۋ ءۇشىن «سەنىمەن بولاشاق» دەگەن رەسپۋبليكالىق اتا-انالار قوعامدىق بىرلەستىگىن قۇردىق, 18 فيليالى بار, وعان 110 مىڭ اتا-انا ىلەستى. ماقسات – ەلدى وياتۋ. اباي, شاكارىم, ءماشھۇر شىعارمالارى ارقىلى ۇلتتى وزەگىنە قايتارىپ, ءوزىن تابۋعا ۇلەس قوسساق دەگەن نيەتتەن تۋدى. سوندىقتان بۇل كىتاپتار 100 مەكتەپ, 100 مەشىت, 100 ۋنيۆەرسيتەت, 100 كىتاپحاناعا تەگىن تاراتىلادى», دەدى.

تۇساۋكەسەر ءراسىمىن «قازاق گازەت­تەرى» جشس باس ديرەكتورى, اكادەميك ديحان قامزابەك ۇلى جۇرگىزىپ وتىردى. «قازىر ءبارىمىز اتا-انامىز. قوعامعا جاۋاپتىمىز. قوعام مەن بي­لىكتى, اتا-انالار مەن عىلىمي ورتا­لىق­تار اراسىن بايلانىستىراتىن التىن كوپىر – وسىنداي قوعامدىق بىرلەس­تىكتەر. «سەنىمەن بولاشاق» الاش قايراتكەرلەرى مۇراسىن اتا-انالارعا لايىقتاپ شىعارعانىن بىلەمىز. الەمدىك دەڭگەيدەگى پەداگوگتەردى شىعارىپ كەلە جاتىر. بۇگىنگى بەس تومدىق تا حالىق شولدەپ وتىرعان ەڭبەكتەر قاتارىندا», دەپ اتاپ ءوتتى ول.

ءماشھۇر-ءجۇسىپ شىعارمالارى توپ­تاستىرىلعان بەس تومدىق تاڭدا­مالىنىڭ تۇساۋكەسەر ءراسىمىن پرەزيدەنت كەڭەسشىسى, اكادەميك باۋىرجان وماروۆ, باس ءمۇفتي ناۋرىزباي قاجى تاعان­ ۇلى, عالىم, ەلشى ءادىل احمەتوۆ, پارلامەنت سەناتىنىڭ دەپۋتاتى التىنبەك نۋح­ ۇلى, بەلگىلى ادەبيەتتانۋشى سەرىك نەگيموۆ جاسادى.

ءبىرىنشى كەزەكتە ادەبيەت جانە ونەر ينستيتۋتىنىڭ عىلىمي قىزمەتكەرى ءتورالى قىدىر بۇل جيناقتاردىڭ بۇعان دەيىن جارىق كورگەن كىتاپتاردان ارتىقشىلىعى مەن تيىمدىلىگىنە توقتالدى. اسىرەسە ءدىني ماتىندەردە كەتكەن ءبىراز قاتەلىك تۇزەتىلگەن. ءماشھۇر ەڭبەگى رەتىندە ەنىپ كەتكەن سۇلەيمەن باقىرعاني, ءشادى جاڭگىر ۇلىنىڭ ولەڭدەرى الىنىپ تاستالعان.

ادەبيەتتانۋشى, قالامگەر باۋىرجان وماروۆ: «ادەبيەت پەن رۋحانياتتا وشپەس ءىز قالدىرعان الىپتارىمىزدىڭ ءبىرى ءماشھۇر-ءجۇسىپ ەكەنى بەلگىلى. ەلدىڭ ەڭ مىقتى عالىمدارىنىڭ قولىنان ءوتىپ, سارالانعان بۇل ەڭبەك – ۇلت رۋحانياتى ءۇشىن ۇلكەن ولجا. اقىن ەڭبەكتەرى كوپتەپ شىقسا دا, ءوز دەڭگەيىمەن سالىستىرعاندا ازدىق ەتەدى. ءماشھۇر مۇرالارى جالپىعا بىردەي تۇسىنىكتى بولا بەرمەۋى ابدەن مۇمكىن. ءدىني, ادەبي تۇرعىدان كەلگەندە دايىندىعى بار وقىرمان بولماسا, بىردەن قابىلداپ كەتە الماسى انىق. ءدىني ماتىندەر كوپ بولعاندىقتان, شىعىستانۋشىلاردىڭ ءتۇسىندىرۋىنسىز ۇعۋ قيىنداۋ سياقتى» دەپ كىتاپتاردىڭ كوپشىلىك وقىپ ءتۇسىنۋى ءۇشىن تيىمدىلىگى ارتقانىن اتاپ ءوتتى.

«بۇل, ارينە, ۇلكەن ەڭبەك. بابالارى­مىزدىڭ رۋحاني ءىلىمىن تاسقا باسىپ, عالىمدار مەن زيالى قاۋىمنىڭ باسىن بىرىكتىرۋ – ۇلكەن ساۋاپ. ءماشھۇر بابامىز – مەدرەسەدە وقىعان, ءدىني عالىم. يسلام ءدىنىنىڭ عۇلاماسى ەكەنى تالاسسىز. سوندىقتان قۇراستىرۋشىلار ماتىن­دەردىڭ شاريعاتقا ساي تۇسىندىر­مەسىن بەرىپ, قازىرگى زاماناۋي تىلمەن ەجىكتەپ تۇسىندىرسە, نۇر ۇستىنە نۇر بولدى», دەدى ناۋرىزباي قاجى تاعان ۇلى.

ءىس-شارا بارىسىندا سەناتور التىن­بەك نۋح ۇلى, تاعى باسقا زيالى قاۋىم وكىلدەرى ءسوز سويلەپ, لەبىزدەرىن ءبىلدىردى.