5 ماۋسىمدا «بولاشاق» باعدارلاماسىنا قۇجات قابىلداۋدىڭ ءۇشىنشى لەگى باستالادى. وتىنىمدەر 7 شىلدەگە دەيىن eGov.kz مەملەكەتتىك قىزمەتتەر پورتالى ارقىلى قابىلدانادى, دەپ حابارلايدى Egemen.kz حالىقارالىق باعدارلامالار ورتالىعىنا سىلتەمە جاساپ.
2023 جىلى «بولاشاق» باعدارلاماسى اياسىندا 555 ستيپەنديا ءبولىندى. ونىڭ ىشىندە:
ماگيستراتۋرا جانە رەزيدەنتۋراعا – 395; دوكتورانتۋراعا – 50, تاعىلىمداما باعدارلامالارىنا – 110 ستيپەنديا.باسىم ماماندىقتار تىزىمىندە 262 ماماندىق بار.
«بيىل «بولاشاق» ستيپەندياسى اياسىندا ۇمىتكەرلەردى ىرىكتەۋ قاعيدالارى جەتىلدىرىلدى. ەندى كونكۋرسقا شەتەلدىك جوعارى وقۋ ورنى نەمەسە ۇيىمنان اكادەميالىق وقۋعا گرانتى بار ۇمىتكەرلەر دە قاتىسا الادى. بۇل رەتتە «بولاشاق» باعدارلاماسى بىلىمگەردىڭ تۇرۋ, تاماقتانۋ, مەديتسينالىق ساقتاندىرۋ, ۇشۋ, ۆيزالىق الىمدار, وقۋ ماتەريالدارىن ساتىپ الۋ شىعىندارىن وتەيدى. سونداي-اق ەڭبەكپەن وتەۋ مەرزىمى ءبىر جىلعا قىسقارادى», دەدى «حالىقارالىق باعدارلامالار ورتالىعى» اق باسقارما توراعاسى ولجاس ساكەنوۆ.
ەسكە سالايىق, بۇدان كەيىن وتىنىمدەر 17 شىلدە مەن 15 قىركۇيەك ارالىعىندا قابىلدانادى.