باتىس قازاقستان وبلىسىندا 27 جاڭا مەكتەپتىڭ قۇرىلىسى باستالادى, دەپ حابارلايدى Egemen.kz.
«بۇگىندە وبلىستا 12 اپاتتى جانە 9 ءۇش اۋىسىمدى مەكتەپ بار. 2023 جىلى 27 مەكتەپتىڭ قۇرىلىسى باستالادى, ونىڭ ىشىندە 9 مەكتەپ «جايلى مەكتەپ» ۇلتتىق پيلوتتىق جوباسى اياسىندا سالىنادى. جىل سوڭىنا دەيىن 18 مەكتەپتى پايدالانۋعا بەرۋدى جوسپارلاپ وتىرمىز», دەدى وبلىس اكىمى ناريمان تورەعاليەۆ ورتالىق كوممۋنيكاتسيالار قىزمەتىندە وتكەن جيىندا.
ول مەكتەپ وقۋشىلارىن تاسىمالداۋ ءۇشىن 54 اۆتوبۋس ساتىپ الىنعانىن اتاپ ءوتتى. وبلىس اۋماعىندا 9 سپورت كەشەنى پايدالانۋعا بەرىلدى, تورتەۋى سالىنىپ جاتىر. تاعى ءبىر كەشەن قۇرىلىسىن 2024 جىلى باستاۋ جوسپارلانىپ وتىر. بيىل م.وتەمىسوۆ اتىنداعى باتىس قازاقستان ۋنيۆەرسيتەتىنىڭ ستۋدەنتتەرىنە ارنالعان 500 ورىندىق جاتاقحانا قۇرىلىسى اياقتالادى.
«وبلىستا 3 پەن 6 جاس ارالىعىنداعى بالالاردى مەكتەپكە دەيىنگى تاربيەمەن قامتاماسىز ەتۋ 100 پايىزدى قۇرادى. بۇگىنگى تاڭدا 1 جاستان 6 جاسقا دەيىنگى بالالاردى بالاباقشامەن قامتۋ 84,3 پايىزدى قۇرايدى. بۇل كورسەتكىشتى 2025 جىلعا قاراي 100 پايىزعا جەتكىزۋ جاسپارلاندى», دەپ قوستى سپيكەر.