روزا سادىق ماتەماتيكانى وقىتۋ ادىستەمەسىن جەتىلدىرەتىن جاڭا ماتەماتيكالىق كەستە جاساپ شىعاردى, دەپ حابارلايدى Egemen.kz وقۋ-اعارتۋ مينيسترلىگىنە سىلتەمە جاساپ.
عىلىمي-زەرتتەۋ جۇمىستارىنىڭ ناتيجەسىندە ۇلتتىق زياتكەرلىك مەنشىك ينستيتۋتىنىڭ تاپسىرىسى بويىنشا روزا مەن ونىڭ جەتەكشىسى عابيدەن تولەباي ۇلىنا تسيفرلىق كۋالىك بەرىلگەن.
اتالمىش كەستە «روزا – ولشەم بىرلىكتەرى كەستەسى» دەگەن رەسمي اتاۋعا يە بولدى.
ي.ۆ.پانفيلوۆ اتىنداعى №5 مەكتەپ-ليتسەيى وقۋشىسىنىڭ بۇل جاڭالىعى رەسپۋبليكالىق «زەردە» عىلىمي جوبالار بايقاۋىنىڭ رەسپۋبليكالىق كەزەڭىندە ۇزدىك دەپ تانىلىپ, عالىمداردىڭ وڭ باعاسىن الدى. ناتيجەسىندە روزا گران-پري يەگەرى اتاندى.
«مۇنداعى باستى جاڭالىق - ەسەپتەردى شىعارۋدا ماتەماتيكالىق ولشەم بىرلىكتەرىمەن جۇمىس ىستەۋگە ارنالعان ادىستەمەلىك كەستەنى پايدالانۋ. قازىردىڭ وزىندە ماتەماتيكانى وقىتۋ ادىستەمەسىن جەتىلدىرەتىن بۇل جاڭا كەستە ءبىلىم بەرۋ ۇيىمدارىنداعى وقۋ ۇردىسىندە كەڭىنەن قولدانىلىپ ءجۇر», دەدى روزانىڭ جەتەكشىسى عابيدەن تولەباي ۇلى
ءبىر ايتا كەتەرلىگى, وقۋشى قىزدىڭ بۇل جۇمىسى ءبىلىم سايىسىندا 600-گە جۋىق قاتىسۋشىنىڭ اراسىنان ۇزدىك اتانىپ, تاعى ءبىر جاڭا فورمۋلا رەتىندە ماتەماتيكا ءپانىن وقىتۋعا ەنگىزىلگەن.
ارۋجان ناعاشباي,
ل.ن.گۋميلەۆ اتىناداعى ەۇۋ ستۋدەنتى