قازاق دومبىرادان استە جالىقپايدى ەكەن. ايگىلى كونتسەرت اراسىندا اتتى قوسىن لاپ بەرگەندەي قۇرمانعازى «سارىارقاسىنىڭ» ءۇزىندىسى زالدى كۇڭىرەنتە بارعاندا, تىڭدارمان ورنىنان تۇرىپ كەتەردەي قوشەمەت ءۇستى-ۇستىنە ۇدەي ءتۇستى. بۇل مادەنيەت جانە ونەر قىزمەتكەرلەرى كۇنىنە وراي «استانا وپەرا» تەاترىندا قويىلعان مارات بيسەنعاليەۆتىڭ « ۇلى دالا اۋەنى» اتتى سالتاناتتى وداسىنىڭ ورتاسىنداعى ءسات قانا. تەڭىزدەي نايقالعان تىڭدارمان ىقىلاسىن تامشىداي ساتىنەن-اق اڭعارا بەرىڭىز. دومبىراعا, ۇزاق سارىندى كۇي مەن اۋەنگە, جالپى مادەنيەتكە دەگەن سۇيىسپەنشىلىگى وسىنداي حالىقتىڭ.
اقشاڭقان «استانا وپەرادا» مەملەكەتتىك دەڭگەيدەگى كونتسەرتتى كورگەن دە, كورمەگەن دە ارماندا شىعار. زالداعى ءيىن تىرەسكەن كورەرمەن-تىڭدارماندى كورىپ-ءبىلىپ ءجۇرمىز عوي, ال مۇندا ات شاپتىرىم دەرلىك ساحنانى تولتىرىپ سىرەسىپ تۇرعان ونەرپازدار قاتارىنان كوز تۇنىپ-اق كەتتى. قازاق دالاسىنىڭ ءار وڭىرىنەن كەلگەن 24 شىعارماشىلىق ۇجىم وكىلدەرى, اسپاپتاعىسى بار, حورداعىسى جانە باسقاسى, بارلىعى 1000-نان استام مۋزىكانتتىڭ ونەرى سىرەسكەن زالدىڭ سەڭىن لىقسىتقانداي اسەرگە بولەدى. ءسىز ويلاڭىز, 1000 جۇرەكتىڭ ءلۇپىلى نە ارەكەتىنەن سوگىلىپ ۇشقان اۋەن سيقىرى قۇلاقتان كىرىپ, بويدى الماسا, وندا, انىعىن ايتقاندا, وزدەرى ءبىلسىن! كۇيشى دينا العاش رەسمي ساحناعا كوتەرىلگەندە جۇمەكەن اقىننىڭ «جەتپىس التى داۋرەن-اي, جەتپىس التى جىل وتكەن, جەتپىس التى قاسىرەت – جەتپىس التى جۇرەكپەن» دەپ تولعايتىنى بار. مۇندا ءبىر مەزەتتە مىڭ جۇرەك تولعاپ الا جونەلگەندە... حالىق اندەرىندە شىرقالعانداي «جۇرەگىڭ تاس تا بولسا ءبىر ەريدى». وسىنشاما ادام ورىنداعان مۋزىكالىق تۋىندى دا ۇزاق ەكەن. ايتارلىقتاي اسەرى بولماسا, ءسوز باسىندا ايتقانىمىزداي ەل ارقالانىپ كەتپەس-ءتى اراسىندا. باسىندا ەپتەپ سكريپكا, ساكسافوننىڭ ۇنىمەن ىلگەرىلەي بەرگەندە, ارينە ءبىز اۋەلى دومبىرانىڭ كۇمبىرىن ەستي الماي جاتىرقاپ قالعانبىز. قۇراما وركەستر قۇرامىندا دا دومبىراشىلار كورىنبەگەن. الدىندا جالعىز-اق دومبىراشى وتىردى. سىبىزعى, سازسىرناي, شاڭقوبىز دا ءبىر-بىردەن. قازاقتىڭ قىلقوبىزى بولدى ما, جوق پا, بىلمەيمىز. سوعان قاراماستان, كونتسەرت بويى حالىقتى ءۇيىرىپ الىپ وتىرعان ءبىر-بىرەۋدەن بولسا دا ۇلتتىق اسپاپتار ءۇنى, اسىرەسە دومبىرا. ءبىر جارىم ساعاتقا سوزىلعان مۋزىكالىق تۋىندىنىڭ باسىم بولىگى شەتەلدىك اسپاپتاردا ورىندالعانىمەن, تىڭدارماندى سىلكىندىرگەن تۇستارى ۇلتتىق اسپاپ ءۇنى ەكەنى ايقىن ءبىلىندى.
مەرەكەلىك ءىس-شارا مادەنيەت جانە ونەر قىزمەتكەرلەرى مەن قايراتكەرلەرىنە مەملەكەت باسشىسى قاسىم-جومارت توقاەۆتىڭ جولداعان قۇتتىقتاۋ حاتىن مادەنيەت جانە سپورت ءمينيسترى اسحات ورالوۆتىڭ وقىپ بەرۋىمەن اشىلدى. پرەزيدەنت جاھاندانۋ داۋىرىندە قازاق مادەنيەتىن ساقتاۋ وتە ماڭىزدى ەكەنىن, ونىڭ دامۋىنا ۇلەس قوسۋ ءبىزدىڭ ورتاق مىندەتكە جاتاتىنىن ايتقان. سونداي-اق بارلىق مادەنيەت جانە ونەر قايراتكەرلەرىنە العىس جولداپ, ولاردىڭ ەڭبەكتەرى وسكەلەڭ ۇرپاقتىڭ رۋحاني بايۋىنا, سول ارقىلى دامۋعا كومەكتەسەتىنىن اتاپ ءوتىپتى.
« ۇلى دالا اۋەنى» وداسىنا قۇرمانعازىنىڭ, تىلەپ, اباي, شاكارىم, نۇرعيسا شىعارمالارىمەن قاتار, «دۋدار-اي» ءانى ەنگەن. اۋەلى جايماشۋاق, سىزدىقتاتا باستالعانىمەن, ءبىرازدان سوڭ اباي اندەرىنىڭ تەرەڭ تولعاقتى ۇنىمەن شيرىقتىرىپ بارىپ, ءارى قاراي قۇرمانعازى كۇيلەرىنە ۇلاسقاندا شارىقتاعان اۋەن ءتانتى ەتەدى. بۇل حالىقتىڭ ىقىلاسىنان دا ايقىن بايقالىپ وتىردى. ءبىر ساعاتتان استام ۋاقىتقا جالعاسقان تۋىندى بويىنا ۇلتتىق جانە كلاسسيكالىق مۋزىكانى ۇيلەستىرگەن. ۇلت ونەرىندەگى شوقتىقتى مۋزىكالىق شىعارمالاردى جاڭاشا اسىرەلەپ ۇسىنا بىلگەن شىعارماشىلىق توپتىڭ ەڭبەگىن اتاپ وتكەن ءجون. حور ۇجىمدارى, وركەسترلەر, ۆيرتۋوز اسپاپشىلار, وپەرا جانە حالىق انشىلەرى, سكريپكاشى, ديريجەر (ابزال مۇحيتدين), تاعى باسقالاردان قۇرالعان 1000 ادامدى وسىلاي ءبىر تۋىندىعا جۇمىلدىرۋ دا ەرەن ەڭبەك.
مادەنيەت پەن ونەر – ەلدىڭ جانى مەن ارىن ايگىلەپ قانا قويماي, ۇلتتىڭ اتىن شىعاراتىن دا سالا. مايتالمان جانە جاس ونەرپازدار بىرلەسىپ, ونەرسۇيەر قاۋىمعا قازاق كۇيى ءھام ءان-اۋەندەرى مەن كلاسسيكالىق مۋزىكانىڭ عاجايىپ ۇيلەسىمىن تارتۋ ەتە الدى. بۇل شىعارما قازاقتىڭ كلاسسيكالىق تۋىندىلارىن زاماناۋي ينتەرپرەتاتسيامەن تارتىمدى جانە اۋقىمدى فورماتتا ورىنداعانىمەن ەستە قالسا كەرەك.
مادەنيەت جانە ونەر قىزمەتكەرلەرى كۇنى قارساڭىندا ءبىر اپتا بويى بۇكىل ەلىمىزدە كونتسەرتتەر, كورمەلەر, دوڭگەلەك ۇستەلدەر جانە باسقالارىن قوسقاندا بارلىعى 100-دەن استام ءىس-شارا ءوتىپتى. 300 مادەنيەت قىزمەتكەرى «مادەنيەت سالاسىنىڭ ۇزدىگى» توسبەلگىسىمەن, 2000-ى قۇرمەت گراموتاسىمەن جانە العىسحاتپەن ماراپاتتالعان. ال مىنا كونتسەرت وسى ۇلكەندى-كىشىلى مەرەكەلىك دۇنيەلەردىڭ بارلىعىنىڭ قورىتىندىسىنداي بولدى.
كونتسەرتتىك باعدارلاما اياقتالعاننان كەيىن ا.ورالوۆ ساحنادا ونەر كورسەتكەن ارتىستەر مەن شىعارماشىلىق ۇجىمداردىڭ جەتەكشىلەرىنە العىسحات تابىستادى.
«مادەنيەت جانە ونەر قىزمەتكەرلەرى كۇنىنە ارنالعان ءىس-شارالار اپتالىعىن لايىقتى تۇردە اياقتادىق دەپ ويلايمىن. ءبىزدىڭ باستامامىزدى قولداعانداردىڭ بارلىعىنا جانە مەملەكەتتىك وپەرا جانە بالەت تەاترىنىڭ ساحناسىندا ونەر كورسەتۋگە شاقىرۋدى قابىلداعان شىعارماشىلىق ۇجىمدارعا راحمەت ايتقىم كەلەدى. وسى جوباعا قولداۋ ءبىلدىرىپ, قاتىسقانى ءۇشىن مارات بەيسەنعاليەۆكە ەرەكشە العىس. مينيسترلىگىمىز مادەنيەت پەن ونەر سالاسىن دامىتۋ جانە قولداۋ باعىتىنداعى جۇمىستى جالعاستىرادى. الداعى ۋاقىتتا بەلگىلەنگەن ناقتى تاپسىرمالاردى سىزدەرمەن بىرگە ورىنداي الاتىنىمىزعا كۇمانىم جوق», دەدى مادەنيەت جانە سپورت ءمينيسترى ا.ورالوۆ.