وسكەمەن قالاسىنداعى مەكتەپ اسحانالارىندا بىرقاتار كەمشىلىك انىقتالدى, دەپ حابارلايدى Egemen.kz.
قالالىق ءماسليحات دەپۋتاتتارى ءبىلىم وشاقتارىن ارالادى. №11, 44 مەكتەپ ليتسەيلەرى مەن قوسىمشا ءبىلىم بەرەتىن №48 مەكتەپ-ورتالىعىندا بولعان ولار اسحانالاردى تەكسەرىپ شىقتى.
بۇل اسحانالارعا بيىل جوندەۋ جۇمىستارى جۇرگىزىلگەن. ىشتەگى ستەندتەردە اسحانانىڭ جۇمىس رەجيمى, مازىرلەر, تاعامدار, شاعىمدار مەن ۇسىنىستار كىتاپتارى ورنالاستىرىلعان.
«2023 جىلى ءبىر وقۋشىعا بىررەتتىك تەگىن ىستىق تاماقتىڭ قۇنى كۇنىنە 620 تەڭگەنى قۇرادى. الايدا №11 مەكتەپ-ليتسەيدە بۇدان قىمباتىراق بولعان. مەكتەپ باسشىلىعىنا وسىعان قاتىستى ەسكەرتۋ جاسالدى», دەيدى قالالىق ءماسليحات توراعاسى الەكساندر سۆەتاش.
سونىمەن قاتار مەكتەپتەردە بالىق ونىمدەرىنىڭ جوقتىعى انىقتالعان. تەكسەرۋ قورىتىندىسى بويىنشا دەپۋتاتتار وسكەمەن قالاسىنىڭ ءبىلىم بولىمىنە وقۋشىلار مەن ولاردىڭ اتا-انالارى اراسىندا مەكتەپتەگى تاماقتىڭ ساپاسى تۋرالى ساۋالنامالاردى جۇيەلى تۇردە جۇرگىزۋدى ايتىپ ءوتتى.