اقتوبەدەگى 66/55 اسكەري بولىمىندە بورىشىن وتەپ جۇرگەن 24 جاستاعى سارباز قازىر وبلىستىق پسيحيكالىق دەنساۋلىق ورتالىعىندا ەم قابىلداپ جاتىر, دەپ حابارلايدى Egemen.kz.
قازىرگى ۋاقىتتا 66/55 اسكەري بولىمىندە بولعان جاعدايعا قاتىستى جان-جاقتى زەرتتەۋ جۇمىستارى جۇرگىزىلىپ جاتىر.
مىنەز-قۇلقى وزگەشە جىگىت ورتالىقتا ەم قابىلداۋىن جالعاستىرادى.
«66/55 اسكەري ءبولىمىنىڭ ساربازى بىزدە ەم قابىلداپ جاتىر. اتا-اناسىنىڭ ايتۋىنشا, ول بۇرىننان تۇيىق, كوپشىلىك ورتانى ۇناتپايتىن. شىنىمەن دە, جىگىت ورتاسىمەن ارالاسپايدى, مىنەز-قۇلقى دا وزگەشە. وسىعان بايلانىستى ونى ۇيىنە قايتارۋ ءۇشىن ءتيىستى اكت تولتىرىپ بەرەمىز. ونى عىلىمدا «سوتسيوفوبيا» دەپ اتايدى. ول سارباز, ءتىپتى, كوپشىلىكپەن بىرگە تاماق تا ىشپەگەن. وزگە اقپاراتتى بەرە المايمىز. قۇپيا بولىپ ەسەپتەلەدى», دەدى وبلىستىق پسيحيكالىق ورتالىق باس دارىگەرىنىڭ ورىنباسارى گ.ۋرازوۆا.
قر ۇلتتىق ۇلان «باتىس» وڭىرلىك قولباسشىلىعىنىڭ ءباسپاسوز قىزمەتى وسى وقيعاعا قاتىستى تۇسىنىكتەمە بەردى.
جاس جىگىت اسكەري قىزمەتكە كەلگەن كۇننەن باستاپ ەشكىممەن ارالاسپاعان, وزگەلەردەن جات جۇرگەن.
وڭتۇستىك ءوڭىرىنىڭ تۋماسى اتا-اناسىمەن حابارلاسقان كەزدە دە سوزگە وتە ساراڭ بولعان. سۇراققا ءبىر سوزبەن عانا جاۋاپ بەرگەن ەكەن.
«اسكەري بولىمدەگى پسيحولوگتىڭ باقىلاۋى بارىسىندا جاۋىنگەرلىك, دەنە دايىندىعى ساباقتارىنان باس تارتىپ, اسكەري قىزمەتكە ءوز ەركىمەن كەلمەگەنىن ايتقان. ءارى قاراي دا اسكەري بورىشىن وتەگىسى كەلمەيتىنىن جەتكىزگەن. سۇحبات كەزىندە سارباز پسيحولوگيالىق اۋىتقۋى بار ەكەنىن ايتىپ, ءوزىن پسيحياتر دارىگەرگە قاراتۋىن وتىنگەن. پسيحوكوررەكتسيالىق جۇمىس پەن جەكە اڭگىمە كەزىندە اسكەري قىزمەتشىنىڭ جاعدايى جاقسارمادى. وسىعان بايلانىستى №3 قالالىق ەمحاناسىنىڭ پسيحياترىنا كونسۋلتاتسياعا جىبەرىلدى. پسيحياتر قاراپ, اسكەري قىزمەتشىنى تەكسەرۋ جانە ەمدەۋ ءۇشىن وبلىستىق پسيحيكالىق دەنساۋلىق ورتالىعىنا جىبەرۋ تۋرالى شەشىم قابىلدادى. بيىل ول 19 ساۋىردە «بەيىمدەلۋدىڭ بۇزىلۋى» دەگەن دياگنوزبەن اۋرۋحاناعا جاتقىزىلدى. سول ساتتەن باستاپ اۋرۋحانادا ەم الىپ جاتىر. قازىرگى تاڭدا اسكەري قىزمەتكە جارامدىلىعىن تەكسەرۋ ءۇشىن اسكەري مەديتسينالىق كوميسسيادان وتكىزۋ جوسپارلانىپ وتىر», دەپ حابارلادى ۆەدومستۆونىڭ ءباسپاسوز قىزمەتى.