مەملەكەت باسشىسى باس كونسۋلدىقتى قىسقا مەرزىم ىشىندە اشۋعا قولداۋ كورسەتكەنى ءۇشىن قىتاي تاراپىنا ريزاشىلىعىن ءبىلدىردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
– توراعا سي تسزينپينمەن وتە مازمۇندى كەلىسسوزدەر جۇرگىزدىك. سونداي-اق بىرلەسكەن مالىمدەمە جاسالدى, بىرقاتار ماڭىزدى كەلىسىمدەرگە قول قويىلدى. شىن مانىندە, بۇل ساپار قازاق-قىتاي ىقپالداستىعىنىڭ «30 جىلدىق التىن ءداۋىرىن» باستادى دەۋگە بولادى. ارينە, بۇل ساپاردىڭ ءمان-ماعىناسى ەرەكشە. بۇگىن – قازاقستان مەن قىتاي ىنتىماقتاستىعى ءۇشىن تاعى دا ءبىر اسا ماڭىزدى ءارى تاريحي كۇن. ءبىز سيان قالاسىندا قازاقستاننىڭ باس كونسۋلدىعىن اشقالى تۇرمىز. بۇگىندە سيان – ء«بىر بەلدەۋ – ءبىر جول» ەكونوميكالىق بەلدەۋىنىڭ ماڭىزدى بەكەتى. شەنسي ولكەسى جانە سيان قالاسى قازاقستانمەن تىعىز بايلانىس ورناتقان. سولتۇستىك قازاقستان وبلىسىمەن جانە شىمكەنت قالاسىمەن باۋىرلاستىق قاتىناس تۋرالى كەلىسىمگە قول قويىلدى. بۇل شارالار ەكى ەل اراسىنداعى بارىس-كەلىستى جانداندىرا تۇسەرى ءسوزسىز. باس كونسۋلدىق وسى ىنتىماقتاستىقتى ودان ءارى دامىتۋعا ۇلەس قوسادى دەپ سەنەمىن, – دەدى قاسىم-جومارت توقاەۆ.
مەملەكەت باسشىسى سياندا باس كونسۋلدىق اشۋ تۋرالى ءتيىستى جارلىققا 2022 جىلى 5 قاراشادا قول قويعان بولاتىن. كونسۋلدىق عيماراتىندا ديپلوماتتارمەن قاتار قازاقستاننىڭ ەكونوميكالىق مۇددەسىن ىلگەرىلەتۋ ءۇشىن ۇلتتىق كومپانيالاردىڭ وكىلدىكتەرى دە ورنالاستىرىلادى.
باس كونسۋلدىقتىڭ اشىلۋ سالتاناتىنا مەملەكەتتىك كەڭەس مۇشەسى, قحر سىرتقى ىستەر ءمينيسترى تسين گان قاتىسىپ, قىتاي ۇكىمەتىنىڭ اتىنان قۇتتىقتاۋىن جەتكىزدى. قىتايلىق ديپلوماتتىڭ ايتۋىنشا, سيان قالاسىندا قازاقستاننىڭ باس كونسۋلدىعىنىڭ اشىلۋى ەكى ەلدىڭ جان-جاقتى ستراتەگيالىق ىنتىماقتاستىعى جاڭا دەڭگەيگە كوتەرىلگەنىن بىلدىرەدى.
قازاقستان – قىتايدىڭ شەنسي پروۆينتسياسىندا ءوزىنىڭ ديپلوماتيالىق وكىلدىگىن اشىپ وتىرعان ورتالىق ازياداعى جالعىز ەل.