ۇلتتىق مۋزەيدە وتكەن «مۋزەي ءتۇنى» حالىقارالىق اكتسياسىنا بارلىعى 47 مىڭنان استام ادام باردى. وسىلايشا, وتكەن جىلعى رەكورد جاڭارتىلدى. بىلتىر بۇل ءىس-شاراعا 30 مىڭعا جۋىق ادام قاتىسقان ەدى. بۇل تۋرالى مادەنيەت جانە سپورت ءمينيسترى اسحات ورالوۆ الەۋمەتتىك جەلىدەگى پاراقشاسىندا جازدى, دەپ حابارلايدى Egemen.kz.
«ەڭ الدىمەن كوزگە تۇسكەنى, مۋزەيگە كىرەبەرىستىڭ ارقايسىسىندا بىرنەشە مەترلىك كەزەك پەن كەلۋشىلەرگە لىق تولى زالدار. اۋا رايى مەن كەشكى ۋاقىت ەكەنىنە قاراماستان, ادامدار وتباسىلارمەن كەلىپ جاتتى. ال اۋدانى 74 مىڭ شارشى مەتردى قۇرايتىن جانە 200 مىڭنان استام ەكسپوناتى بار ەلدەگى ەڭ ۇلكەن مۋزەي بارلىق تىلەك بىلدىرۋشىلەردى ارەڭ ورنالاستىردى, ال كەيبىر زالداردا ينە شانشار جەر قالمادى. سوعان قاراماستان, مۋزەيدەگى اتموسفەرا ەرەكشە, ناعىز وتباسىلىق جانە شىنىمەن مەرەكەلىك بولدى», دەپ جازدى مينيستر Instagram پاراقشاسىندا. اسحات ورالوۆ ءىس-شاراعا جينالعان كەلۋشىلەرگە قۇتتىقتاۋ ءسوز سويلەپ, سودان كەيىن ۇلتتىق مۋزەي قىزمەتكەرلەرىن كاسىبي مەرەكەمەن جانە الداعى مادەنيەت جانە ونەر قىزمەتكەرلەرى كۇنىمەن قۇتتىقتادى. ەستەرىڭىزگە سالا كەتەيىك, «مۋزەيلەر ءتۇنى» — وتاندىق مادەني قىزمەتكەرلەر كۇنىن مەرەكەلەۋگە ارنالعان ءىس-شارالار باعدارلاماسىنىڭ ءبىر بولىگى. سالتاناتتى ءراسىم بارىسىندا مينيستر ەلىمىزدىڭ ءار وڭىرىنەن كەلگەن ۇزدىك مۋزەي قىزمەتكەرلەرىن «مادەنيەت سالاسىنىڭ ۇزدىگى» توسبەلگىسىمەن ماراپاتتادى. ۇلتتىق مۋزەي قابىرعاسىندا كونتسەرتتىك جانە ويىن-ساۋىق باعدارلامالارى, ويىندار, كۆەستتەر, دارىستەر, مۋزەي رەستاۆراتورلارىنىڭ شەبەرلىك ساباقتارى, قولونەرشىلەر جارمەڭكەسى, تەاترلاندىرىلعان ەكسكۋرسيالار جانە بىردەن بىرنەشە ەكسپوزيتسيا ۇيىمداستىرىلدى. كەلۋشىلەر «مۋزەيلەر تۇنىنە» ارنايى دايىندالعان كىتاپتار مەن اۆتورلىق قۋىرشاقتار كورمەسىن تاماشالادى, سونداي-اق بەلگىلى تاريحشىلار مەن باسقا دا تانىمال تۇلعالار ەكسكۋرسيالار وتكىزگەن «جۇلدىزدى گيد» جوباسىنا قاتىستى. مىڭداعان كەلۋشىلەرمەن بىرگە اسحات ورالوۆ بىرنەشە زالدى ارالاپ, ولاردا ۇسىنىلعان ەكسپوناتتارمەن تانىستى. اتاپ ايتقاندا, جاقىندا اشىلعان پالەونتولوگيا زالى قوناقتار اراسىندا ەرەكشە تانىمال بولدى. سونداي-اق مينيستر مەديامەنەدجەر ارمانجان بايتاسوۆ جۇرگىزگەن «جۇلدىزدى» ەكسكۋرسياعا باردى. ءىس-شارادا باسقا ەلدەردەن كوپتەگەن قوناقتار بولدى.
«بۇل قازاقستاندىقتاردىڭ ءوز مادەنيەتىنە, تاريحىنا جانە ونەرىنە دەگەن قىزىعۋشىلىعىنىڭ ارتىپ كەلە جاتقانىن كورسەتەدى. ءبىزدىڭ مىندەتىمىز — وسىنداي ءىس-شارالار ارقىلى ادامدارعا ەلىمىزدىڭ رۋحاني مۇراسىن قولجەتىمدى ەتۋ», دەپ اتاپ ءوتتى مادەنيەت جانە سپورت ءمينيسترى.