*كەشە ەرتەڭگىسىن ءماسكەۋ مەتروسىندا توتەنشە وقيعا ورىن الدى. ازىرشە بەلگىسىز سەبەپ بويىنشا ۆاگوندار رەلستەن شىعىپ كەتتى. وپات بولعاندار سانى 19 ادام دەلىنىپ وتىر. 161 ادام جارالانعان. ونىڭ
118-ءى اۋرۋحانالارعا جاتقىزىلىپتى.
*يزرايل ۇكىمەتى مىسىردىڭ باستاماسى بويىنشا گازا سەكتورىندا وق اتۋدى توقتاتۋعا كەلىسىمىن بەردى. بىراق بۇعان حاماس كونەر ەمەس. بۇل ۇيىم ءوزى تاراپىنان يزرايلگە بىرنەشە قارسى تالاپ قويدى.
*بۇۇ قاۋىپسىزدىك كەڭەسى سيرياداعى مۇقتاجدارعا جانجالداسۋشى تاراپتار اراسىنداعى مايدان جەلىسى ارقىلى كومەك جەتكىزۋگە ءمۇمكىندىك بەرەتىن قاراردى ءبىراۋىزدان قابىلدادى. شەكارا مەن مايدان شەبىنىڭ اشىلۋ مەرزىمى 180 كۇن دەپ بەلگىلەنگەن. قاجەت دەپ تابىلسا, ونى ۇزارتۋعا دا بولادى.
*رەسەي پرەزيدەنتى ۆلاديمير پۋتين بريكس (برازيليا, رەسەي, ءۇندىستان, قىتاي جانە وڭتۇستىك افريكا رەسپۋبليكاسى) ەلدەرىن اقش جانە ونىڭ وداقتاستارىمەن كەلىسپەيتىن مەملەكەتتەرگە ايداپ سالۋ ارەكەتتەرىنە قارسى تۇرۋعا شاقىردى.
*بۇۇ باس حاتشىسى پان گي مۋن ءوزىنىڭ سيريا بويىنشا ارنايى ەلشىسى ەتىپ يتاليالىق ديپلومات ستاففان دە ميستۋرۋدى تاعايىندادى. باس حاتشى مۇنداي شەشىمگە بىرقاتار كونسۋلتاتسيالار وتكىزگەننەن كەيىن كەلگەن.
n ۇلىبريتانيا ۇكىمەتىنىڭ باسشىسى دەۆيد كەمەرون وتستاۆكاعا كەتكەن ۇكىمەت مۇشەلەرىنىڭ ورنىنا جاڭالارىن تاعايىندادى. قورعانىس ءمينيسترى ورىنتاعىنا مايكل فەللون, ال سىرتقى ىستەر مينيسترى ورىنتاعىنا فيليپ حەمموند وتىراتىن بولدى.
*شەنگەن كەلىسىمىنە مۇشە ەلدەر تاياۋداعى جىلدارى شەكارادا 15 كۇنگە دەيىنگى قىسقا مەرزىمدى ۆيزالار بەرۋدى جوسپارلاپ وتىر. ۆيزالاردىڭ بۇل جاڭا ءتۇرى «تۋرنە-ۆيزا» دەپ اتالماق. «تۇراقتى ساياحاتشىلار» كاتەگورياسىنا يەلەر 3-5 جىلعا ارنالعان كوپ دۇركىن ۆيزالار الاتىن بولادى.
*اقش اسكەري-تەڭىز كۇشتەرىنىڭ «ۆەللا گالف» زىمىراندىق كرەيسەرى قارا تەڭىزدى تاستاپ شىعىپ, جەرورتا تەڭىزى اۋماعىنا ەندى. اتالعان كورابل «بريز-2014» دەپ اتالعان ناتو-بولگاريا بىرلەسكەن اسكەري-تەڭىز جاتتىعۋلارىنا قاتىسقان بولاتىن.
*جاپونيانىڭ سولتۇستىك-شىعىسىنداعى حونسيۋ ارالىندا ماگنيتۋداسى (جەر استىنداعى ءدۇمپۋ) 6,8 بالدىق جەر سىلكىنىسى تىركەلدى. اۋەلدە تسۋنامي قاتەرى تۋرالى جاريالانعانىمەن, ول ۇلكەن قاۋىپ توندىرە قويعان جوق.
اقپارات اگەنتتىكتەرىنىڭ ماتەريالدارى بويىنشا دايىندالدى.