Western Edge Open روبوتوتەحنيكا چەمپيوناتى اقش-تىڭ كاليفورنيا شتاتىندا لونگ بيچ قالاسىندا ءوتتى. 20 ەلدەن كەلگەن 80 كوماندا FIRST LEGO League كاتەگورياسىندا باق سىناپ, «ەنەرگيا» تاقىرىبى بويىنشا ءوز يننوۆاتسيالىق جوبالارىن قورعادى, دەپ حابارلايدى Egemen.kz قر وقۋ-اعارتۋ مينيسترلىگىنە سىلتەمە جاساپ.
اتالمىش دوداداعا قازاقستان اتىنان الماتىداعى High Tech Academy مەكتەبى مەن قاراعاندىداعى ن.نۇرماقوۆ اتىنداعى مامانداندىرىلعان مەكتەپ-ينتەرناتىنىڭ وقۋشىلارى قاتىستى. ۇزدىك يننوۆاتسيالىق جوبا نوميناتسياسىندا High Tech Academy اتىنان بارعان Arturli كومانداسى جەڭىسكە جەتتى. ولاردىڭ يننوۆاتسيالىق جوبالارى ەنەرگيانى ءۇي شارۋاشىلىعىندا ساقتاۋ جانە قولدانۋدىڭ رەۆوليۋتسيالىق تاسىلىنە نەگىزدەلگەن.
ء«بىز ەكولوگيالىق زياندى ءارى اسا قىمبات اككۋمۋلياتورلى پوليمەرلى باتارەيالاردى پايدالانباۋعا تىرىستىق. ونىڭ ورنىنا رەۆوليۋتسيالىق شەشىم ۇسىنىپ وتىرمىز, بۇل گراۆيتاتسيالىق باتارەيالار. مۇنداعى وي – كۇندىز وندىرىلگەن ەنەرگيادان قور جيناقتاپ, ءتۇن مەزگىلىندە پايدالانۋ. جوبا ءۇشىن تەرەڭدىگى 100 مەتر بولاتىن شاحتا ازىرلەنىپ, ارقايسىسى 300 توننا بولاتىن جەتى جۇك ىسكە قوسىلادى. كوتەرىلگەن جۇكتەر قاجەت بولعان كەزدە بوساتىلاتىن «ەنەرگەتيكالىق قور» رەتىندە قاراستىرىلادى. جالپى ءبىزدىڭ جۇيەمىز شامامەن 75 ءۇيدى تاۋلىكتىك نورمامەن قامتاماسىز ەتە الادى, بۇل ءۇي شارۋاشىلىقتارىنا ەنەرگيامەن قامتىلۋدا تولىقتاي دەربەس بولۋعا مۇمكىندىك بەرەدى», دەيدى ءوز جوبالارىن تانىستىرعان كوماندا مۇشەلەرى.
USTEM Robotics قورىنىڭ جەتەكشىسى اسىلبەك مۇرزاحمەتوۆتىڭ ايتۋىنشا, ءبىزدىڭ وقۋشىلارىمىز ەلىمىزدىڭ نامىسىن ابىرويمەن قورعاپ قانا قويماي, الەمدىك قاۋىمداستىققا حالقىمىزدىڭ باي تاريحى مەن مادەنيەتىن دە لايىقتى تانىستىرا الدى.
«بالالار سايىسقا بىرنەشە اي بويى وتە مۇقيات دايىندالدى. ولاردىڭ كوپشىلىگى اعىلشىن ءتىلىن جاقسى مەڭگەرگەن جانە ۇلتتىق اسپاپتاردا وينايدى. ونىڭ ۇستىنە ولاردىڭ عىلىمي زەرتتەۋلەرى وتاندىق ۋنيۆەرسيتەتتەر پروفەسسورلارىنىڭ ساراپتاۋىنان وتكەن. بايقاۋ كەزىندە قازاقستاننىڭ ۇلتتىق بۇرىشىن تاماشالاۋشىلاردىڭ تاراپىنان كوپتەگەن جاعىمدى پىكىرلەر ەستىدىك», دەپ اتاپ ءوتتى اسىلبەك مۇرزاحمەتوۆ.
ەسكە سالا كەتەيىك, مەكتەپ وقۋشىلارى اقپان ايىنىڭ سوڭىندا قازاقستان رەسپۋبليكاسى وقۋ-اعارتۋ مينيسترلىگىنىڭ قولداۋىمەن وتكەن FIRST Central Asia ورتالىق ازيا ويىندارىندا Western Edge Open چەمپيوناتىنا قاتىسۋعا ليتسەنزيا العان بولاتىن.