تۇركياداعى پرەزيدەنت سايلاۋىنىڭ ءبىرىنشى كەزەڭدەگى ناتيجەسى بويىنشا كانديداتتار 50% داۋىس جيناي المادى. ەندى جەڭىمپاز 28 مامىردا وتەتىن ەكىنشى كەزەڭدە انىقتالادى. بۇل تۋرالى ەلدىڭ ورتالىق سايلاۋ كوميسسياسىنىڭ توراعاسى احمەت تەرنەر مالىمدەدى, دەپ حابارلايدى Egemen.kz «انادولى» اگەنتتىگىنە سىلتەمە جاساپ.
سايلاۋ كوميسسياسى تۇركياداعى پرەزيدەنت سايلاۋىنىڭ ەكىنشى كەزەڭى بولاتىنىن راستادى. كوميسسيا توراعاسىنىڭ ايتۋىنشا, داۋىستاردى ساناۋ تولىعىمەن اياقتالدى. ءبىرىنشى كەزەڭ قورىتىندىسى بويىنشا كانديداتتاردىڭ ەشقايسىسى 50%-دان ارتىق داۋىس جيناي المادى. سول سەبەپتى سايلاۋ ەكىنشى كەزەڭگە ۇلاسادى.
وسك مالىمەتىنشە, ەلدە سايلاۋشىلاردىڭ سايلاۋعا قاتىسۋى 88,92% جانە شەتەلدە 52,69%-دى قۇراعان.
ەسكە سالايىق, 14 مامىردا تۇركيادا پرەزيدەنت جانە پارلامەنت سايلاۋى ءوتتى. پرەزيدەنتتىككە 20 جىل بيلىكتە وتىرعان قازىرگى پرەزيدەنت رەجەپ تايپ ەردوعان, 6 پارتيا اتىنان كانديدات بولعان كەمال كىلىچداروگلۋ جانە كواليتسيا وكىلى سينان وگان ۇمىتكەر.