«قازگيدرومەت» رمك 16 مامىرعا ارنالعان اۋا رايى بولجامىن جاريالادى, دەپ حابارلايدى Egemen.kz.
كاسىپورىننىڭ دەرەكتەرىنە قاراعاندا, وڭتۇستىك تسيكلون جىراسىنىڭ جانە ونىمەن بايلانىستى اتموسفەرالىق فرونتالدى بولىمدەردىڭ اسەرىنەن ەلىمىزدىڭ باسىم بولىگىندە كۇن رايى قۇبىلمالى بولادى. جاڭبىر جاۋىپ, نايزاعاي وينايدى, تۇندە ەلىمىزدىڭ وڭتۇستىك-باتىسىندا قاتتى جاڭبىر جاۋادى. قازاقستاننىڭ وڭتۇستىك-باتىسىندا, وڭتۇستىگىندە, ورتالىعىندا بۇرشاق جاۋى مۇمكىن. رەسپۋبليكانىڭ سولتۇستىگىندە, شىعىسىندا, وڭتۇستىك-شىعىسىندا سولتۇستىك-باتىس انتيتسيكلونىنىڭ اسەرىنەن كۇن جاۋىن-شاشىنسىز بولادى. رەسپۋبليكا بويىنشا جەل كۇشەيىپ, سولتۇستىكتە, شىعىستا تۇمان تۇسەدى, وڭتۇستىكتە شاڭدى داۋىل تۇرادى.
تۇندە ماڭعىستاۋ وبلىسىنىڭ وڭتۇستىگىندە, شىعىسىندا قاتتى جاڭبىر جاۋادى.
تۇندە اقمولا وبلىسىنىڭ باتىسىندا, شىعىسىندا, پاۆلودار, قاراعاندى وبلىستارىنىڭ سولتۇستىگىندە, شىعىسىندا, اباي وبلىسىنىڭ باتىسىندا, شىعىس قازاقستان وبلىسىنىڭ شىعىسىندا 1-3 گرادۋس ۇسىك, سولتۇستىك قازاقستان وبلىسىنىڭ باتىسىندا, قوستاناي وبلىسىنىڭ سولتۇستىگىندە توپىراق بەتىندە 2 گرادۋس ۇسىك جۇرەدى.
قىزىلوردا وبلىسىندا, تۇركىستان وبلىسىنىڭ سولتۇستىگىندە, ورتالىعىندا, اقتوبە, ۇلىتاۋ وبلىستارىنىڭ وڭتۇستىگىندە, الماتى وبلىسىنىڭ سولتۇستىك-باتىسىندا توتەنشە ءورت قاۋپى ساقتالادى.